«قازاق انالارى – داستۇرگە جول» رەسپۋبليكالىق قوعامدىق بىرلەستىگى الماتى قالاسى مەن الماتى وبلىسىنداعى فيليالىنىڭ مۇشەلەرى, ياعني اقجاۋلىقتى اجەلەر ۇزىندىعى 112 مەتردى قۇرايتىن «جىلدىڭ ءتورت مەزگىلىن بەينەلەيتىن سىرلى سىرماق» اتتى ايرىقشا تۋىندىسىمەن الەمدىك رەكوردتار كىتابىنا ەندى.
بۇل باستاما – قازاق اجەلەرىنىڭ ۇلتتىق داستۇرگە دەگەن شەكسىز قۇرمەتىنىڭ كورىنىسى. ولار ءبىر جىل بويى ارنايى بيازى جۇننەن باسىلعان جۇقا كيىزگە باسقا ءتۇستى كيىزدەن نەمەسە ماتادان ويۋ-ورنەك سىرىپ, استار سالىپ تىكتى. وعان قوشقار ءمۇيىز, تۇيە تابان, سىنىق ءمۇيىز سىندى بەس ءتۇرلى تۇسپەن كومكەرىلگەن ويۋ-ورنەكتىڭ كلاسسيكالىق ۇلگىسىن پايدالاندى.
اتالعان تۋىندى ناۋرىز مەيرامىندا العاش كورمەگە ۇسىنىلدى. سىرماقتى تۇرعىندارمەن بىرگە «الەمدىك رەكوردتار كىتابىنىڭ» وكىلدەرى دە تاماشالادى.
سىرماقتى جاساعاندار ىشىندە قاراساي اۋدانىنا قاراستى ىرگەلى اۋىلدىق وكرۋگىنىڭ اجەلەرى دە بولدى. تاياۋدا اۋىلدىق وكرۋگ اكىمىنىڭ ورىنباسارى ەسكەندىر ەگەۋبەك اقجاۋلىقتى اجەلەرگە العىسىن ءبىلدىرىپ, «الەمدىك رەكوردتار كىتابى» ۇيىمى جىبەرگەن سەرتيفيكاتتى رەسمي تۇردە تابىس ەتتى.
اقتوتى مىرزابەكقىزى
الماتى وبلىسى,
قاراساي اۋدانى