بيىلعى كوكتەمدەگى قاراعاندى ايماعىندا بۇرىن-سوڭدى بولىپ كورمەگەن سۋ تاسقىنىنىڭ زاردابى 35 ەلدى مەكەندى قيىندىققا ۇشىراتسا, سونىڭ ىشىندە اسىرەسە, بۇقار جىراۋ اۋدانىنداعى عابيدەن مۇستافين اتىنداعى 2 مىڭعا تارتا وتباسى بار كەنت تۇرعىندارىنا دا اۋىر ءتيدى. 12 ساۋىردە توسىننان لاپ قويعان سەل كوشەلەر مەن اۋلالاردى كولكىگەن سۋعا تولتىرعان بولاتىن. بىرقاتار ۇيلەردى اعىن شايىپ اكەتتى. دەرەۋ قۇتقارۋ شارالارىن قولدانۋ ارقاسىندا ادامدار قاۋىپسىز جەرگە كوشىرىلىپ, امان قالدى. ولار جاقىن ماڭداعى تەمىرتاۋ مەن اقتاۋدا بوساتىلعان جاتاقحانالارعا, تۋعان-تۋىسقاندارى ۇيلەرىنە ورنالاستىرىلدى. جان-جاقتان جەدەل كومەككە كەلۋشىلەر ازىق-ت ۇلىكپەن, كيىممەن, توسەك ورىندارمەن قامتاماسىز ەتىپ, قيىندىقتى جەڭىلدەتتى.
بۇل كۇندە جەر اياعى كەڭىسىمەن تابيعات اپاتى سالدارىن جويۋ جۇمىستارى كەڭ كولەمدە جۇرگىزىلىپ جاتىر. وبلىسپەن قاتار باسقا وڭىرلەردەن دە مۇستافيندىكتەرگە قامقورلىق جاساۋشىلار كوپ. الدىمەن قولعا الىنعان شارالاردىڭ ءبىرى تاسقىن ەكپىنىنەن وپىرىلىپ, مەكەن ەتۋگە جارامسىز بولىپ قالعان ۇيلەر ورنىنا جاڭالارىن سالۋعا جۇمىلدىرىلىپ وتىر. وبلىس بويىنشا انىقتالعان اۆاريالىق جاعدايداعى ۇيلەردىڭ 359-ىنىڭ 272-ءسى وسى اتالعان كەنت ەسەبىنە ەنۋى, ال ونىڭ 198-ءى بۇزىلۋىنا بايلانىستى ءىستىڭ كەشىكتىرىلمەۋى تۇرعىندار تىلەۋىنەن شىقتى.
كەنتتى قالپىنا كەلتىرۋ جۇمىستارىمەن بىرگە مامىردىڭ العاشقى كۇندەرىنەن-اق جاڭا قونىستاردىڭ ىرگەتاسى قالانا باستالدى. بۇل ءىس-شاراعا ايماق باسشىسى نۇرمۇحامبەت ابدىبەكوۆ قاتىسىپ, كۇزگە دەيىن بىرنەشە باسپانا پايدالانۋعا بەرىلەتىندىگى تۋرالى ءسوزىن جەرگىلىكتى جۇرت ريزاشىلىقپەن قابىل الدى. «ءبىزدىڭ وسىنداي قيىن شاقتا مەملەكەت پەن حالىق تاراپىنان دەر كەزىندە كورسەتىلىپ جاتقان كومەك-قولداۋعا العىسىمىز شەكسىز. جاز قانشا ايتقانمەن جايلى ماۋسىم عوي. ەڭ باستىسى ەلدىڭ كوڭىل-پەيىلى ۋاقىتشا قينالىسىمىزدى جەڭىلدەتەرى ءسوزسىز. بۇگىندە بىرلەسە قيمىلداۋشى قۇرىلىس ۇيىمدارىنىڭ تاۋلىك بويعى ەڭبەگىنىڭ شاراپاتى تەز تيەرىنە سەنەمىز, – دەيدى بولاشاق قونىستارىنىڭ قابىرعاسى كوتەرىلۋىنە قۋانىشتى نۇرلان جاباەۆ پەن يۋليا مالىشەۆا وتباسىلارى.
ولار عانا ەمەس, باسقالاردىڭ دا الداعى قىركۇيەك ايىندا جاڭا ۇيلەرگە قونىس اۋدارۋعا مۇمكىندىكتەرى بار. الدىن الا ەسەپتەۋلەر بويىنشا كەنتتە تۇرعىن ءۇي قۇرىلىسىن سالۋ ءۇشىن عانا 3,5 ملرد. تەڭگە قارجى قاجەت. بۇل ماسەلەنىڭ شەشىمى تابىلىپ كەلەدى.
وسىندا قۇرىلىس جۇمىستارىن جۇرگىزۋشى مەردىگەر ۇيىمداردىڭ ءبىرى – «جولقۇرىلىسى» جشس پرورابى ۆلاديمير ۆەدنيتسكيدىڭ ايتۋىنشا, مىندەتتى اتقارۋعا كۇش تە, تەحنيكا دا جەتكىلىكتى. قۇرىلىسشىلاردىڭ كومەككە دەگەن ىنتاسى زور.
ايقىن نەسىپباي, «ەگەمەن قازاقستان».
قاراعاندى وبلىسى.