وتكەن اپتانىڭ دۇيسەنبىسى كۇنى 900-گە تارتا قاشقىن يتاليالىق سيتسيليا ارالىنىڭ وڭتۇستىگىندە ورنالاسقان پاتستسالو ەلدى مەكەنىنە كەلىپ جەتكەن. مۇنىڭ الدىنداعى دەمالىس كۇندەرى يتاليالىق جانە فرانتسيالىق كورابلدەر سيتسيليا بۇعازىندا 6 مىڭعا جۋىق قاشقىندى سۋعا كەتۋدەن ساقتاپ قالعان بولاتىن. اتالعان وپەراتسيا بارىسىندا ونداعان ادامداردىڭ ءولى دەنەسى دە تابىلعان.
جەرورتا تەڭىزىن جاسىرىن تۇردە ءجۇزىپ وتەمىن دەپ بيىلعى جىلدىڭ وزىندە 1750 ميگرانت قازا تاپقان بولاتىن. وسىعان وراي ءساۋىر ايىندا وتكەن ەۋروپالىق وداقتىڭ توتەنشە سامميتىندە ەۋروپالىق كوشباسشىلار جەرورتا تەڭىزىنىڭ ۇستىندەگى قۇتقارۋ وپەراتسيالارىن قارجىلاندىرۋ دەڭگەيىن 3 ەسە ءوسىرۋ جونىندە شەشىم قابىلداعان ەدى.
ساراپشىلار پىكىرىنەن ءمالىم بولعانىنداي, بيىلعى جىلى يتاليا جاعالاۋلارىنا كەلۋشى جاسىرىن قاشقىندار سانى 200 مىڭ ادامعا جەتۋى مۇمكىن. بۇل وتكەن جىلعى كورسەتكىشتەن 30 مىڭ ادامعا كوپ.
وتكەن جەكسەنبى كۇنى ليۆيانىڭ جاعالاۋ كۇزەتى تريپوليدەن 60 شاقىرىمدىق قاشىقتىقتا ميگرانتتاردىڭ بەس قايىعىن ۇستاپ الدى. قايىقتاعى 500 ادام ەۋروپاعا جاسىرىن تۇردە جەتۋدى كوزدەگەن ەكەن. ولاردىڭ بارلىعى ۇستالدى. وسى وقيعاعا بايلانىستى قولعا تۇسكەندەر جاعدايعا دەگەن ءوز نارازىلىقتارىن اشىنا وتىرىپ جەتكىزگەن.
«ءبىز قاۋىپ-قاتەرگە قاراماستان, وسىلاي ىستەۋگە ءماجبۇر بولىپ وتىرمىز. ايتپەسە, مۇنداي ساپاردىڭ ءبىزدىڭ ءومىرىمىز ءۇشىن قاۋىپتى ەكەندىگىن جاقسى بىلەمىز. بىزگە سۋ بەتىمەن ۇزاق جۇزۋگە تۋرا كەلەدى. ءبىرىنشى كەزەكتە سۋداننان ليۆيانىڭ ادجدابيا قالاسىنا دەيىن كەلۋىمىز كەرەك. مۇنان كەيىن وسىنداي جولمەن تاعى دا قوزعالامىز. تريپوليگە دەيىن جەتەمىز. ءبىزدىڭ مۇنداي ساپارىمىزدىڭ ءاربىر ءساتى وڭايعا سوقپايدى. كەز كەلگەن ساتتە قازاعا ۇشىراۋىمىز مۇمكىن ەكەندىگىن جاقسى بىلەمىز. ءبىز نەگە وسىنداي جاعدايعا ءتۇسىپ وتىرمىز؟ ويتكەنى, ءوز ءومىرىمىزدى تاۋەكەلگە سالا وتىرىپ, ەۋروپاعا جەتۋىمىز قاجەت. سوندا عانا ءبىزدىڭ ازاپتى ومىرىمىزدە وزگەرىس باستالا ما دەگەن ۇمىتتەمىز», دەيدى قاشقىنداردىڭ ءبىرى.
وڭىرگە شەتتەن قاشىپ كەلۋشىلەردىڭ كوبەيۋىنە بايلانىستى ەۋروپالىق وداقتاعىلار جاسىرىن ميگراتسيامەن كۇرەستىڭ اۆستراليالىق تاجىريبەسىن زەرتتەۋدى ءجون كورىپ وتىرعان سەكىلدى. مۇنى پرەمەر توني ەببوت كۋالاندىرعان. بۇل جەردە اڭگىمە اۆستراليا ۇكىمەت ورگاندارىنىڭ جاسىرىن ميگرانتتاردى, كەمەلەر مەن قايىقتاردى قولعا ءتۇسىرىپ, ولاردى وسى ەلدىڭ اۋماعىنداعى سۋلاردان شەتكە شىعارىپ جىبەرۋ وپەراتسيالارىن جۇرگىزۋ تاسىلدەرى تۋرالى بولىپ وتىر. الايدا, قۇقىق قورعاۋشىلار اۆستراليالىق بيلىك ورگاندارى بارىنشا ءساتتى جۇرگىزىپ جاتىر دەپ ەسەپتەلگەن مۇنداي وپەراتسيالاردى ادامگەرشىلىككە, گۋمانيزمگە بارىنشا قايشى دەپ ەسەپتەيدى.