فرانتسۋز ەكونوميكاسىنداعى ونەركاسىپتىك سەكتوردىڭ ىسكەرلىك بەلسەندىلىگىنىڭ يندەكسى ءوز تومەندەۋىن بارعان سايىن كۇشەيتىپ كەلەدى.
Markit ساراپتامالىق كومپانياسىنىڭ مالىمەتتەرى بويىنشا, فرانتسيا ونەركاسىپتىك سەكتورىنداعى ءرمى يندەكسى ءساۋىر ايىندا 48 پۋنكتتىك دەڭگەيگە دەيىن تومەندەدى. ال ناۋرىز ايىندا بۇل كورسەتكىش 48,8 پۋنكتتىك دەڭگەيدە بولاتىن. دەمەك, قۇلدىراۋ كورسەتكىشى بارعان سايىن تەرەڭ سيپات الىپ كەلەدى. ساراپشىلاردىڭ پىكىرىنە قاراعاندا, ءرمى يندەكسى 50 پۋنكتتىك دەڭگەيدەن تومەندەگەن تۇستا سالاداعى بەلسەندىلىك بارىنشا ازاياتىن بولادى.
وسى جونىندە ازىرلەنگەن باياندامادا اتاپ كورسەتىلگەنىندەي, فرانتسيا ەكونوميكاسىنداعى ونەركاسىپتىك ءوندىرىس كولەمى تومەندەۋى وسىمەن 11 اي بويى جالعاسۋ ۇستىندە. سونىڭ ىشىندە ءساۋىر ايىندا قۇلدىراۋ دەڭگەيى بارىنشا كۇشەيە تۇسكەندىگى انىقتالىپ وتىر.
ونەركاسىپتىك سەكتورداعى جاڭا تاپسىرىستار كورسەتكىشى 47,8 بەلگىسىنەن 46 پۋنكتكە دەيىن تومەندەگەن. ال ەكسپورتقا جاڭا تاپسىرىستار دەڭگەيى 48,5 بەلگىسىنە 47,6 پۋنكتىك كورسەتكىشكە دەيىن قۇلدىراعان.
Markit ساراپتامالىق كومپانياسىنىڭ اعا ەكونوميسى دجەك كەننەدي وسى وقيعاعا بايلانىستى تۇسىنىكتەمە جاسادى. ول ءوز تۇسىنىكتەمەسىندە سوڭعى جولعى ستاتيستيكالىق دەرەكتەردى نەگىزگە الدى.
«فرانتسيانىڭ ونەركاسىپتىك سەكتورى ءوزىنىڭ اينالىم دەڭگەيىن بارعان سايىن جوعالتا تۇسۋدە. ءبىز جاڭا تاپسىرىستاردىڭ نەعۇرلىم تومەندەۋى ەكپىنىندە ءوندىرىستىڭ كۇرت قىسقارعاندىعىن بايقاپ وتىرمىز. مۇنداي كۇردەلى دە كەرى اعىم شىعىستاردى ازايتۋ جانە ەۋرو باعامىن ودان ءارى تومەندەتۋ شارالارىنا قاراماستان, جالعاسىپ قانا قويماي, ودان ءارى كۇشەيە تۇسۋدە. اتالعان شارالار ونەركاسىپشىلەردىڭ جاعدايىن جاقسارتۋ باعىتىندا قولعا الىنعان ەدى. بىراق قازىرگى كۇنى ول شارالاردىڭ جاعدايعا ىقپال ەتە الماي كەلە جاتقاندىعىن كورىپ وتىرمىز», دەگەن ءوز تۇسىنىكتەمەسىندە دجەك كەننەدي.