ەلباسىنىڭ تاپسىرماسىن ورىنداۋ كەڭ اۋقىم الۋدا. بۇل جونىندە كەشە ورتالىق كوممۋنيكاتسيالار قىزمەتىندە وتكەن ارنايى بريفينگ بارىسىندا مالىمدەگەن «بايتەرەك» حولدينگىنىڭ باسشىسى قۋاندىق بيشىمباەۆ جىل باسىنان بەرى ايماقتاردا ەكى مىڭعا تارتا باسپانا تاپسىرىلا باستاعانىن جەتكىزدى.
حولدينگ باسشىسىنىڭ سوزىنەن بەلگىلى بولعانداي, ۇستىمىزدەگى جىلى «بايتەرەك» ۇلتتىق حولدينگى 487 مىڭ شارشى مەتر نەمەسە 9740 پاتەردى پايدالانۋعا بەرمەك. بۇل رەتتە ولاردىڭ 50 پايىزى (4870 پاتەر) جاس وتباسىلارىنا تابىستالارى ەرەكشە اتالدى. بۇعان دەيىن ۇستىمىزدەگى جىلدىڭ ناۋرىز ايىندا جالپى اۋدانى 76,5 مىڭ شارشى مەتر بولاتىن العاشقى 1357 پاتەر حولدينگ تاراپىنان استانا, الماتى, قوستاناي, كوكشەتاۋ جانە سەمەي قالالارىندا ساتىپ الىنىپ, تۇرعىندارعا ۇلەستىرىلگەنى دە نازاردان تىس قالعان جوق. ال ساۋىردە شىمكەنت قالاسىندا «قازاقستان يپوتەكالىق كومپانيا» يۇ» اق-پەن سالىنعان تۇرعىن ءۇي كەشەنىندە جالپى اۋدانى 56,2 مىڭ شارشى مەتردى قۇرايتىن 1080 پاتەر ءبولۋ باستالعان.
ق.بيشىمباەۆ پاتەر الۋشىلار قاتارىندا بيۋدجەتتىك ۇيىمدار, اسكەري جانە مەملەكەتتىك قىزمەتكەرلەر, تولىق ەمەس جانە كوپبالالى وتباسىلار, مۇگەدەك بالا تاربيەلەپ وتىرعاندار, جەتىم بالالار مەن ورالماندار دا بار ەكەندىگىن ورتاعا سالدى. ونىڭ ايتۋىنشا, پاتەرلەر تۇرۋشىلارعا دايىن كۇيىندە ۇسىنىلعان. سونداي-اق, حولدينگ باسشىسى كەشەدەن باستاپ جالعا بەرىلەتىن تۇرعىن ءۇيدىڭ الاڭى 306,5 مىڭ شارشى مەتر بولاتىن 5416 پاتەر قۇرىلىسى مەن ساتىپ الۋ شارتى جاسالعاندىعىنا نازار اۋدارتتى. ۇستىمىزدەگى جىلى استانا, الماتى, سەمەي, قوستاناي, پاۆلودار, اقتوبە, شىمكەنت, كوكشەتاۋ, تاراز, قىزىلوردا جانە تالدىقورعان قالالارىندا جالپى الاڭى 262,5 مىڭ شارشى مەترلىك 4596 پاتەر پايدالانۋعا بەرىلمەك. ال 2016 جىلى قىزىلوردا مەن شىمكەنت قالالارىندا جالپى الاڭى 44 مىڭ شارشى مەترلىك 820 پاتەر قولدانىسقا ەنگىزىلەدى.
تارقاتىپ ايتقاندا, ءبىرىنشى جارتىجىلدىق سوڭىنا تامان اقتوبە (77 پاتەر), پاۆلودار (35 پاتەر), الماتى (50 پاتەر), استانا (52 پاتەر) قالالارىندا جانە الماتى وبلىسىندا (55 پاتەر) كەزەكتە تۇرعاندار اراسىندا تۇرعىن ءۇيدى ءبولۋ جوسپارلانۋدا. حولدينگ باسشىسى باعدارلامانى ىسكە اسىرۋداعى بەس جىلدىڭ ىشىندە 1,483 مىڭ شارشى مەتر نەمەسە 29 مىڭ پاتەر جالعا بەرۋگە ۇسىنىلاتىن ەرەكشە اتاپ كەتتى. قۇرىلىستىڭ بارلىق كەزەڭىندە تاۋەلسىز قارجى-تەحنيكالىق باقىلاۋ قىزمەتى تارتىلاتىن بولادى. بۇدان باسقا, ۇلتتىق قوردان نىسانالى بولىنگەن قارجىنى ءتيىمدى جۇمساۋ بارىسىن مەملەكەتتىك كوميسسيا مۇشەلەرى, پارلامەنت ماجىلىسىندەگى «نۇر وتان» پارتياسى فراكتسياسىنا تاۋەلدى باعدارلامانى ىسكە اسىرۋ جانە بيۋدجەتتىك قاراجاتتاردى جۇمساۋدى باقىلاۋ بويىنشا ارنايى كوميسسيا مۇشەلەرى باقىلاۋ جۇرگىزەدى.
جالپى, جەڭىلدىك تالاپتارىمەن الەۋمەتتىك جالعا بەرىلەتىن تۇرعىن ءۇيدى بەرۋگە ۇلتتىق قوردان 180 ميلليارد تەڭگە بولىنسە, ونىڭ ىشىندە «بايتەرەك» حولدينگىنە جالعا بەرىلەتىن تۇرعىن ءۇيدى سالۋ جانە ساتىپ الۋ ءۇشىن 145 ميلليارد تەڭگە, ال 35 ميلليارد تەڭگە جەرگىلىكتى اتقارۋشى ورگاندار ءۇشىن بولىنەرى بەلگىلى بولىپ وتىر. بۇل قارجىلار نەگىزىنەن ينجەنەرلىك-كوممۋنيكاتسيالىق ينفراقۇرىلىمداردى جۇرگىزۋگە باعىتتالادى. قارجىنىڭ ءبولىنىسىن ايتقاندا, 2015 جىلى 92,5 ميلليارد تەڭگە ءبولۋ قاراستىرىلسا, 2016 جىلى 52,6 ميلليارد تەڭگە ءبولۋ كوزدەلىپ وتىر ەكەن. بىرتىندەپ, ساتىپ الۋ قۇنى تۋرالى دا مالىمەت بەرە كەتكەن ءجون. مىسالى, ءبىر بولمەلى 33 شارشى مەتر بولاتىن پاتەردىڭ اي سايىنعى تولەمى 34 مىڭ تەڭگەنى قۇرايدى. ال جالپى الاڭى 45 شارشى مەتر بولاتىن ەكى بولمەلى پاتەردىڭ قۇنى 46 مىڭ تەڭگە بولسا, ورتاشا 62 شارشى مەتردى قۇرايتىن ءۇش بولمەلى پاتەردى جالداۋ تولەمى 63 مىڭ تەڭگە. ساتىپ الىنبايتىن, بىراق جالعا بەرىلەتىن ءبىر بولمەلى پاتەردىڭ 20 شارشى مەترى اي سايىنعى تولەمى ەلىمىزدە 10 مىڭ تەڭگەنى قۇرايدى. جالپى الاڭى 30 شارشى مەتر بولاتىن ەكى بولمەلى پاتەر قۇنى ورتاشا ەسەپپەن 15 مىڭ تەڭگە بولسا, الاڭى 45 شارشى مەتر بولاتىن ءۇش بولمەلى پاتەر قۇنى ورتاشا ەسەپپەن 23 مىڭ تەڭگەنى قۇرايدى.
اسقار تۇراپباي ۇلى, «ەگەمەن قازاقستان».