ەۋروايماقتاعى ەلدەردىڭ وبليگاتسيالارىنىڭ كەرى كىرىستىلىگىنىڭ ارتۋى دەفولت تاريحىنداعى ەڭ ىرىلەرىنىڭ بىرىنە اينالۋى ابدەن مۇمكىن. وسىعان وراي, ساراپشىلار سوڭعى ۋاقىتتارى دامىعان ەلدەردىڭ قارجى پروبلەماسىنداعى وسى ءبىر جاعدايدى جاھاندىق كولەمدەگى باقىلاۋعا كونبەيتىن داعدارىسقا الىپ كەلۋى عاجاپ ەمەس دەگەندەي پىكىرلەر بىلدىرە باستادى.
The Telegraph اگەنتتىگى ءوز ماقالالارىندا اتاپ كورسەتكەندەي, قازىرگى كۇنى ەۋروايماق ەلدەرىنىڭ بارلىق مەملەكەتتىك وبليگاتسيالارىنىڭ 30 پايىزدان استامى كەرى پايىزدىق ستاۆكاعا يە بولىپ وتىر. بۇل قۇندى قاعازدار كولەمى 2 تريلليون ەۋرونى قۇرايدى. مۇنداي جاعداي ەۋروايماقتاعى ماكروەكونوميكالىق جاعدايعا قوسىمشا اۋىرتپالىقتار تۇسىرەدى. جانە ايماقتىڭ قارجىلاي تۇراقتىلىعىنداعى تاۋەكەلدى ارتتىرادى.
ساراپشى ۋورنەردىڭ ايتۋىنشا, ەۋروپالىق ورتالىق بانك ساندىق جۇمسارتۋ ساياساتىن جۇزەگە اسىرا باستاعاننان بەرى مەملەكەتتىك وبليگاتسيالار ءوسىمىنىڭ كەرى كىرىستىلىگى بارىنشا وسە تۇسۋمەن قاتار, جۇيەلى سيپاتتا يە بولا باستادى.
«ەگەر ءاربىر ەل جاعدايىنا جەكەلەي ۇڭىلەتىن بولساق, ستاتيستيكا كورسەتكىشتەرى ءبىزدى ءتىپتى, تاڭعالدىرا تۇسەدى. Jefferies ينۆەستيتسيالىق بانكىنىڭ مالىمەتى بويىنشا نەمىس وبليگاتسيالارىنىڭ 70 پايىزعا جۋىعى كەرى كىرىستىلىكپەن ساۋدالانۋدا. فرانتسيادا بۇل كورسەتكىش 50 پايىزعا جەتىپ وتىر», دەپ مالىمدەگەن ۋورنەر.
ەگەر ەۋروايماقتىڭ داعدارىس جاعدايىن ءالى دە جالعاستىرىپ كەلە جاتقاندىعىن ەسكە الاتىن بولساق, بۇل قيىندىقتان قۇتىلۋدىڭ امالدارىنىڭ ازايا تۇسكەندىگىنە, ال دەفولت قاتەرىنىڭ كۇشەيىپ كەلە جاتقاندىعىنا جانە ونىڭ قازىرگى كەزدىڭ وزىندە ناقتى سيپات الا باستاعاندىعىنا كوز جەتكىزەمىز.
ەۋروپالىق ەلدەردىڭ مەملەكەتتىك قارىزدارىنىڭ ارتۋى جاعدايدى ودان ءارى ۋشىقتىرا تۇسۋدە. قازىرگى كۇنى بۇل قارىزدىڭ كولەمى ەۋروايماق بويىنشا ىشكى جالپى ءونىمنىڭ 91,9 پايىزىنا جەتتى. ەۋروايماقتىڭ ەڭ ءىرى ەكونوميكاسى گەرمانيادا بۇل قارىز كولەمى 74,7 پايىزعا جەتسە, فرانتسياداعى بورىش 95 پايىزدى, ۇلىبريتانيادا 98,4 پايىزدى قۇرايدى. سونداي-اق, الەمنىڭ ەڭ ءىرى ەكونوميكاسى سانالاتىن امەريكا قۇراما شتاتتارىندا دا جاعداي وڭىپ تۇرعان جوق. مۇنداعى مەملەكەتتىك قارىز كولەمى قازىردىڭ وزىندە 18 تريلليون دوللاردان اسىپ ءتۇسىپ وتىر.
سونىمەن, بارعان سايىن ايقىن سيپات الىپ كەلە جاتقان بورىش داعدارىسى باتىس ەلدەرىنىڭ ەكونوميكالىق دامۋىنا توتەنشە قىسىم ءتۇسىرىپ وتىر. قازىرگى كۇنگى مۇنىڭ ۇلكەن كورىنىسى مەملەكەتتىك مىندەتتەمەلەر كىرىستىلىگىنىڭ تەرىس سيپاتقا يە بولۋى. ساراپشىلاردىڭ پىكىرىنشە, وقيعالاردىڭ وسىلايشا شيەلەنىسە ءتۇسۋى ءتۇپتىڭ-تۇبىندە باتىس ەكونوميكاسىنىڭ كۇرت قۇلاۋىن تۋىنداتۋى دا عاجاپ ەمەس.