استانا. 12 مامىر. بۇگىن وزبەكستان شەكاراشىلارى شەكارادان كوكونىس پەن جەمىس-جيدەك الىپ ءوتىپ بارا جاتقان قىرعىزستان ازاماتتارىنا قاراي وق اتىپ, ءبىر ادامدى اتىپ ءولتىردى. بۇل تۋرالى اكيpress حابارلادى.
«12 مامىر كۇنى مەملكەتتىك شەكارانىڭ قىرعىز-وزبەك ۋچاسكەسىندە ينتسيدەنت ورىن الىپ, ونىڭ بارىسىندا قىرعىزستان ازاماتى قازا تاپتى, تاعى ءبىر ازاماتتى وزبەكستان ۇلتتىق قاۋىپسىزدىك قىزمەتى شەكارا اسكەرلەرىنىڭ اسكەري قىزمەتكەرلەرى قاماۋعا الدى», - دەلىنگەن اگەنتتىك حابارلاماسىندا.
قىرعىزستان مەملەكەتتىك شەكارا قىزمەتىنىڭ ءباسپاسوز قىزمەتى حابارلاعانداي, وقيعا مەملەكەتتىك شەكارانىڭ باتكەن وبلىسى باتكەن اۋدانى سوگمەنت ەلدى مەكەنىنىڭ شەتىندەگى ءالى كەلىسىمگە كەلمەگەن قاقىر دەگەن جەرىندە بولعان.
الدىن الا مالىمەت بويىنشا, قىرعىزستاننىڭ ءۇش ازاماتى «مەرسەدەس بەنتس گيگانت» جۇك اۆتوكولىگىمەن وزبەكستان جەرىنەن قىرعىزستانعا قاراي وتكىزىلىم بەكەتىنەن تىس اۋماقتان كوكونىس پەن جەمىس-جيدەك الىپ وتپەك بولعان.
وزبەك جاعىنىڭ اقپارىنا قاراعاندا, قىرعىزستان ازاماتتارى وزبەكستان شەكارا جاساعىنىڭ توقتاۋ جونىندەگى تالاپتارىنا باعىنباعان. سودان كەيىن وزبەك شەكاراشىلارى قىرعىزستان ازاماتتارىنا قارسى قارۋ قولدانۋعا ءماجبۇر بولادى. ناتيجەسىندە قىرعىزستاننىڭ ءبىر ازاماتى جاراقات الىپ, وزبەكستاننىڭ سوح قيشلوعىنداعى اۋرۋحاناعا تۇسەدى. كەيىن سول كەسەلحانادا كوز جۇمادى. تاعى ءبىر ازاماتتى وزبەك شەكاراشىلارى قاماۋعا الادى. ال ءۇشىنشى ازامات ۇستاتپاي, قاشىپ كەتەدى.
قازىر وزبەك جاعى قىرعىزستاننىڭ قولعا تۇسكەن ازاماتىنا قاتىستى تەرگەۋ شارالارىن جۇرگىزىپ جاتىر.
سونىمەن بىرگە وزبەكستانعا قارايتىن سوح انكلاۆى تەرريتورياسىندا قىرعىزستان مەن وزبەكستان شەكاراشىلارىنىڭ وكىلدەرى اتالمىش ينتسيدەنتتىڭ سەبەپتەرى مەن احۋالىن انىقتاۋ ءۇشىن كەزدەسۋ وتكىزۋدە.
قۇرىش نۇرىمبەت.
دەرەك, سۋرەت: اكيpress.