استانا. 12 مامىر. قازاقستان حالقى اسسامبلەياسىنىڭ 20 جىلدىعىن اتاپ ءوتۋ اياسىندا ءال-فارابي اتىنداعى قازاق ۇلتتىق ۋنيۆەرسيتەتىندە «اينالاڭدى نۇرلاندىر!» اتتى فەستيۆال بولىپ ءوتتى. بۇل تۋرالى egemen.kz حابارلادى.
اتالمىش جوبا بۇدان 4 جىل بۇرىن ۋنيۆەرسيتەت رەكتورى, اكادەميك عالىمقايىر مۇتانوۆتىڭ باستاماسىمەن قولعا الىنعان بولاتىن. سودان بەرى ول ءوزىنىڭ جالعاسىن تاۋىپ, جەمىسىن بەرىپ كەلەدى.
كەش بارىسىندا فيلولوگيا, ادەبيەتتانۋ جانە الەم تىلدەرى فاكۋلتەتىنىڭ دەكانى ومارحان ءابدىمان ۇلىنا ءسوز الىپ, ءاربىر تۇلعانىڭ ءوز بويىندا ادامي قۇندىلىقتاردى قالىپتاستىرۋعا نازار اۋدارۋى كەرەكتىگىن اتاپ ءوتتى. ال جاراتىلىستانۋ فاكۋلتەتتەرىنە ارنالعان شەت ءتىلى كافەدراسىنىڭ مەنگەرۋشىسى ايجان مولداعاليەۆا جوبانىڭ تاريحىنا توقتالدى. ول ءوز سوزىندە كورەيا عالىمى يۋنگ سيل كيمنىڭ «Brighten your corner where you are!» دەگەن كىتابىنداعى وسى قوزعالىستىڭ نەگىزگى تۇجىرىمدامالىق ۇستانىمدارعا نازار اۋداردى.
شارا بارىسىندا حيميا جانە حيميالىق تەحنولوگيا فاكۋلتەتىنىڭ ستۋدەنتتەرى ا. ەسەنبەكوۆ, ق. ەرعالي, ا. ءاشىمجان, ن. ورمانبەك, ا. دۇيسەنباي ءوز شىعارمالارىنان ۇزىندىلەر وقىدى. ولار سونىمەن قاتار ابايدىڭ قارا سوزدەرىن قازاق, اعىلشىن, ورىس تىلدەرىندە ايتىپ بەردى. بۇدان باسقا, كوپتەگەن ستۋدەنتتەر اعىلشىن تىلىندەگى تانىمال اندەردى ناقىشىنا كەلتىرە ورىندادى.
قازۇۋ عىلىمي كەڭەسى بەكىتكەن «100 كىتاپ» رۋحاني جوباسىنىڭ دا جاستار ءۇشىن ماڭىزىن ايتا كەتكەن ءجون. وسى ورايدا «مەحانيكا-ماتەماتيكا» فاكۋلتەتىنىڭ ستۋدەنتتەرى اعىلشىن اقىنى جانە دراماتۋرگى ۋيليام شەكسپيردىڭ «كورول لير» اتتى كويىلىمىنان ءۇزىندى كورسەتتى.
قايرات ق ۇلىمبەت.
دەرەك, سۋرەت: egemen.kz.