قىزىلوردا. 12 مامىر. قىزىلوردا وبلىسى قارماقشى اۋدانىندا جەڭىستىڭ 70 جىلدىعىنا ارنالعان كەڭەس وداعىنىڭ باتىرى تايىمبەت كومەكباەۆ اتىنداعى سامبودان حالىقارالىق مەموريال اياقتالدى. بۇل تۋرالى kyzylorda-news.kz حابارلادى.
جارىس مادەنيەت جانە سپورت مينيسترلىگى, قىزىلوردا وبلىسىنىڭ دەنە شىنىقتىرۋ جانە سپورت باسقارماسى, قارماقشى اۋدانىنىڭ اكىمدىگى, ت.كومەكباەۆ اتىنداعى قوردىڭ ۇيىمداستىرۋىمەن ءوتتى. بيىل جيىرماسىنشى رەت تۋىن كوتەرگەن ءدۇبىرلى دوداعا اقش, ارمەنيا, ءازىربايجان, بەلورۋسسيا, بولگاريا, گرۋزيا, گەرمانيا, گرەكيا, جاپونيا, يران, يرلانديا, يزرايل, لاتۆيا, ليتۆا, موڭعوليا, مولدوۆا, وڭتۇستىك كورەيا, وزبەكستان, رەسەي, سەربيا, تۇركيا, تاجىكستان, ۇلىبريتانيا, قىرعىزستان جانە قازاقستاننان 25 كوماندا قاتىسىپ, 250-گە جۋىق سامبوشى 9 سالماق دارەجەسىندە سىنعا ءتۇستى.
جارىستىڭ سالتاناتتى اشىلۋ راسىمىندە ءسوز العان وبلىس اكىمى قىرىمبەك كوشەرباەۆ اتالمىش ءتۋرنيردىڭ ايماق سپورتىنىڭ دامۋىنا وزىندىك ۇلەس قوسىپ وتىرعانىن ەرەكشە اتاپ ءوتتى. حالىقارالىق سامبو فەدەراتسياسىنىڭ سپورت ديرەكتورى دميتري ماكسيموۆ جارىسقا قاتىسۋشىلاردى قۇتتىقتاپ, ايماق باسشىسىنا قازاقستانداعى سامبونىڭ دامۋىنا قوسقان زور ۇلەسى ءۇشىن حالىقارالىق سامبو فەدەراتسياسىنىڭ العىس حاتىن تابىستادى.
ءدۇبىرلى باسەكەدە قازاقستان سپورتشىلارى وزدەرىنىڭ مىقتىلىقتارىن كورسەتىپ, 5 سالماق دارەجەسىندە چەمپيون اتاندى.
ايتا كەتەيىك, 52 كيلو سالماق دارەجەسىندە ونەر كورسەتكەن قارماقشىلىق باۋىرجان رايسوۆ وسى حالىقارالىق مەموريالدىڭ قاتارىنان ون ەكىنشى مارتە جەڭىمپازى اتانىپ, جارىس دەمەۋشىسى تاعايىنداعان جەڭىل اۆتوكولىكتىڭ كىلتىنە يە بولدى. سونداي-اق, حالىقارالىق مەموريالدىڭ «ۇزدىك سپورتشى» نوميناتسياسىن قاراعاندىلىق ارمان سارسەنبين مەن رەسەيلىك ميحايل پوليانسكوۆ يەلەندى.
جارىستىڭ ەكىنشى كۇنى 62 تۇيە پالۋان ورتاعا شىعىپ, قازاق كۇرەسىنىڭ كورىگىن قىزدىردى. باس جۇلدەگە تىگىلگەن «Toyota Prado» اۆتوكولىگىن شىعىسقازاقستاندىق مۇحيت تۇرسىنوۆ قانجىعالادى. ەكىنشى ورىن العان قارماقشىلىق ەلامان ەرعاليەۆ پەن ءۇشىنشى ورىندى يەلەنگەن موڭعوليا پالۋانى التانگەرەل داۆانيامعا تەمىر تۇلپاردىڭ كىلتتەرى تابىستالدى. ال ءتورتىنشى ورىندى ەنشىلەگەن وزبەكستاندىق وديل تۋلەنديباەۆ اقشالاي سىياقىمەن ماراپاتتالدى.
ەرجان بايتىلەس.
دەرەك: kyzylorda-news.kz.
سۋرەت: جەڭىس ىسقاباي.