الماتى. 11 مامىر. 57 جاستاعى قىتاي ميللياردەرى لي تسزينيۋان قول استىنداعى 6 400 قىزمەتكەردى پاريجگە, كوكشىل جاعالاۋعا الىپ كەلىپ, تەگىن دەمالدىردى. ءليدىڭ قىتايداعى «تيانشي» كاسىپورنىندا جۇمىس ىستەيتىن جۇمىسشىلارىنىڭ تەڭ جارتىسى وسىلايشا توسىن سىيعا يە بولدى. بۇل تۋرالى اعىلشىننىڭ Daily Mail گازەتى حابارلادى.
قىتاي تۋريستەرى ءۇشىن بۇل كۇنى فرانتسۋز استاناسىنان 140 قوناق ۇيدەن ورىن بوساتىلىپ, وزگە ەلدەردەن كەلۋشى تۋريستەر ءۇشىن اتاقتى لۋۆر مۋزەيى ءبىر كۇنگە جابىلدى. كوكشىل جاعالاۋدا ورنالاسقان كانن جانە موناكو قوناق ۇيلەرىنەن 79 ءتورت جۇلدىزدى جانە بەس جۇلدىزدى جاتىن ورىندار الدىن-الا الىنىپ قويىلدى. قىتاي ميلياردەرى بۇعان قوسىمشا قىزمەتكەرلەرىن نيتستسا قالاسىنا الىپ بارۋ ءۇشىن 147 جايلى اۆتوبۋسقا تاپسىرىس بەرگەن. «تيانشي» كومپانياسىندا ەڭبەك ەتەتىن قىتاي جۇمىسشى-تۋريستەرىنىڭ فرانتسياعا بۇل كۇنگى ساپارى ەرەكشەلىگى جاعىنىن بىردەن گيننەستىڭ رەكوردتار كىتابىنا جازىلدى.
فيلانتروپ لي تسزينيۋاننىڭ «فوربس» جۋرنالىنا بەرگەن سۇحباتىندا قازىر يەلىگىندە 1 ميلليارد دوللارى بار ەكەنى ايتىلعان. قىزمەتكەرلەرىن فرانتسيادا دەمالدىرعان ءليدىڭ بۇل جولى جۇمساعان قاراجاتى 33 ميلليون ەۋرونىڭ توڭىرەگىندە دەگەن بولجام بار.
تالعات ءسۇيىنباي.
دەرەك, سۋرەت: Daily Mail.