استانا. 10 مامىر. كاسىپقوي بوكستا ەل نامىسىن قورعاپ جۇرگەن بوكسشىلارىمىزدىڭ ءبىرى جانات جاقيانوۆ كەزەكتى جەڭىسىنە قول جەتكىزدى. جەڭىل سالماقتا سىنعا تۇسەتىن ول كەشە تۇندە ارگەنتينا بوكسشىسى گەكتور رولاندودان باسىم ءتۇسىپ, WBA International تۇجىرىمى بويىنشا چەمپيون اتاندى. بۇل تۋرالى vesti.kz حابارلادى.
جەكپە-جەك اسا تارتىستى ءوتتى. العاشقى مينۋتتاردان-اق تىزگىندى قولعا العان جانات ۇزىلىسكە دەيىن قارسىلاسىن ءبىر مارتە نوكداۋنعا جىبەرىپ ۇلگەردى. دەگەنمەن, ەكىنشى راۋندتا رولاندونىڭ كەبىن ءوزى كيىپ, نوكداۋنعا ءتۇستى.
ءتورتىنشى راۋندتا تارتىسقا تولىعىمەن باقىلاۋ جۇرگىزگەن قازاق بوكسشىسى ارگەنتينالىقتى تاعى ءبىر ەسەڭگىرەتىپ الدى. جەكپە-جەكتىڭ كەلەسى بولىگىندە رولاندونىڭ قارسىلىق كورسەتۋگە ەش شاماسى بولمادى. ال التىنشى راۋندتا جاقيانوۆ قارسىلاسىن نوكاۋتقا جىبەردى.
بۇل – وتانداسىمىزدىڭ كاسىپقوي بوكستاعى 25-جەڭىسى. سونىڭ ىشىندە 18-ءىن نوكاۋتپەن اياقتادى. ءبىر مارتە قارسىلاسىنا ەسە جىبەرگەنىن ايتا كەتەيىك.
ءوز كەزەگىندە گەكتور رولاندو وسىعان دەيىن 14 جەكپە-جەك وتكىزىپ, بارلىعىندا جەڭىسكە جەتكەن. ياعني, بۇل ونىڭ العاشقى جەڭىلىسى.
قازىرگى تاڭدا كاسىپقوي بوكستان بۇكىلالەمدىك بوكس كەڭەسىنىڭ (WBC) رەيتينگىندە جانات جاقيانوۆ كوش باستاپ تۇر. دەسەك تە, اتالعان تۇجىرىم بويىنشا الەم چەمپيونى جاپونيالىق شينسۋكي ياماناكا ەكەنىن ايتا كەتەيىك. سونداي-اق, جەرلەسىمىز بۇكىلالەمدىك بوكس قاۋىمداستىعى (WBA) تۇجىرىمى بويىنشا رەيتينگتىك كورسەتكىشتە ءۇشىنشى ورىندا كەلەدى. بۇل تۇجىرىمدا الەم چەمپيونى اتاعىنا – دومينيكان رەسپۋبليكاسىنىڭ وكىلى حۋان كارلوس پايانو يە.
جاقيانوۆتىڭ پروموۋتەرى ريككي حاتتون شاكىرتىنىڭ الداعى ۋاقىتتا وسى الەم چەمپيوندارىمەن جەكپە-جەك وتكىزۋگە نيەتتى ەكەنىن جەتكىزدى.
ەلامان قوڭىر.
دەرەك: vesti.kz.
سۋرەت: vringe.com.