استانا. 9 مامىر. كاير سوتى ەگيپەتتىڭ بۇرىنعى پرەزيدەنتى حوسني مۋباراكتى وزگەنىڭ مۇلكىن جىمقىرعانى ءۇشىن 3 جىلعا سوتتادى. اتالعان قىلمىستىق ءىستىڭ اياسىندا ونىڭ ۇلدارى اليا مەن گامال دا ءدال وسىنداي ۋاقىتقا تۇرمەگە جابىلدى. بۇل تۋرالى lenta.ru حابارلادى.
ولار مەملەكەت قازىناسىنان 100 مىڭ ەگيپەت فۋنتىن (13 مىڭ اقش دوللارى) ۇرلاعانى ءۇشىن ايىپتى دەپ تابىلدى. بۇل قارجى پرەزيدەنت سارايىن قايتا وڭدەۋگە جۇمسالعان.
وتكەن جىلدىڭ مامىرىندا ايىپتىلار ءدال وسىعان ۇقساس قىلمىستارى ءۇشىن 3 جىلعا باس بوستاندىعىنان ايىرىلعان ەدى. الايدا, اپەللياتسيالىق سوت كەيىن ۇكىمدى وزگەرتىپ, ءىستى قايتا قاراۋعا جىبەردى.
وسى جىلدىڭ ءساۋىر ايىندا بۇقارالىق اقپارات قۇرالدارى 88 جاستاعى حوسني مۋباراكتىڭ ءولىمى جايىندا حابارلاعان ەدى. دەسەك تە, بۇرىنعى پرەزيدەنتتىڭ قورعاۋشىسى بۇل اقپاراتتى تەرىسكە شىعاردى.
2014 جىلى قاراشادا سوت مۋباراك پەن ونىڭ ۇلدارىن شەرۋشىلەردىڭ ولىمىنە قاتىستى دەپ تاپتى. بۇل شەرۋشىلەر 2011 جىلى كايردا بولعان قارسىلىق اكتسياسىنا قاتىسقان ەدى.
ەگيپەتتى 30 جىل باسقارعان حوسني مۋباراك 2011 جىلى اقپان ايىنداعى جاپپاي كوتەرىلىستەن كەيىن تاقتان تۇسكەنى بەلگىلى. كوپ ۇزاماي ساياساتكەر تۇتقىنعا الىنىپ, ونىڭ ۇستىنەن جەمقورلىق, بيلىكتى اسىرا پايدالانۋ جانە مانيفەستانتتاردى ءولتىردى دەگەن ايىپتار تاعىلدى.
ەلامان قوڭىر.
دەرەك: lenta.ru.
سۋرەت: reuters.com.