استانا. 9 مامىر. الماتى قالاسىندا قارۋلى قاراقشى «رەم كران» جاۋاپكەرشىلىگى شەكتەۋلى سەرىكتەستىگىنىڭ قىزمەتكەرلەرىنە شابۋىل جاساپ, 9 ملن. تەڭگەنى تارتىپ اكەتتى. بۇل تۋرالى news.mail.ru حابارلادى.
ۇرلانعان اقشا «رەم كران» فيرماسى جۇمىسشىلارىنىڭ ەڭبەكاقىسىن تولەۋگە ارنالعان ەكەن. كۋاگەرلەردىڭ ايتۋىنشا, سەرىكتەستىك قىزمەتكەرلەرى كولىكتەن ءتۇسىپ, عيماراتقا كىرىپ بارا جاتقان. تۋرا كىرەبەرىستە ولارعا قولىندا تراۆماتيكالىق تاپانشاسى بار ەر ادام جاقىندايدى. قارۋلى قاراقشى قىزمەتكەرلەردىڭ ءبىرىنىڭ قولىنداعى سومكەنى تارتىپ الىپ, بىرنەشە رەت وق اتقان. وسىدان كەيىن قىلمىسكەر وقيعا ورنىنان قاشىپ كەتكەن.
شابۋىل كەزىندە اۋىر جاراقاتتانعان فيرما قىزمەتكەرلەرىنىڭ ءبىرى سول جەردە كوز جۇمدى. ال ارقاسىنان اۋىر جاراقاتتانعان ەكىنشىسى دەرەۋ اۋرۋحاناعا جونەلتىلدى. قازىرگى تاڭدا بۇل قاندى وقيعا بويىنشا «ادام ءولتىرۋ» بابىمەن قىلمىستىق ءىس قوزعالدى.
وقيعاعا وراي قالالىق ىشكى ىستەر دەپارتامەنتى كريمينالدىق پوليتسيا قىزمەتكەرلەرى مەن ناۋرىزباي اۋداندىق ىشكى ىستەر باسقارماسىنىڭ ساقشىلارىنان ارنايى جەدەل-تەرگەۋ توبى قۇرىلدى. قىلمىسكەردى قۇرىقتاپ, جەكە تۇلعاسىن انىقتاۋ ماقساتىندا بىرقاتار جەدەل-تەرگەۋ ءىس-شارالارى جۇرگىزىلۋدە. پوليتسيا قىزمەتكەرلەرى شابۋىلعا قاتىستى وزگە دە مالىمەتتەردى انىقتاۋدى قولعا الدى.
«رەم كران» جاۋاپكەرشىلىگى شەكتەۋلى سەرىكتەستىگىنىڭ سايتىنداعى اقپاراتتارعا سۇيەنسەك, فيرما 1985 جىلى «وبلتەپلوكوممۋنەنەرگو» وندىرىستىك بىرلەستىك بازاسىندا قۇرىلعان. كاسىپورىن قازان, قازان-قوسىمشا جانە تاعى باسقا قۇرىلعىلاردى جاساپ شىعارادى. ال 1996 جىلى «رەم كران» سەرىكتەستىگى جۇك كوتەرەتىن قۇرىلعىلار نارىعىنا قايتا ماماندانادى. كاسىپورىننىڭ قازىرگى باستى قىزمەتى – جۇك كوتەرەتىن كرانداردى جاساپ شىعارۋ, قالپىنا كەلتىرۋ, قايتا قۇرۋ, سونداي-اق, جۇك كوتەرەتىن كولىكتەردىڭ شىنجىرلارىن قۇرامداۋ بولىپ تابىلادى.
ەلامان قوڭىر.
دەرەك, سۋرەت: news.mail.ru.