استانا. 9 مامىر. رەسەي استاناسى – ماسكەۋدە ۇلى جەڭىستىڭ 70 جىلدىعىنا وراي اسكەري پاراد وتۋدە. وعان ۇلى وتان سوعىسىنىڭ ارداگەرلەرى مەن تىل ەڭبەككەرلەرى جانە 30-عا جۋىق مەملەكەتتىڭ باسشىسى قاتىسۋدا. پارادقا قاتىسۋشى مارتەبەلى مەيمانداردىڭ اراسىندا قازاقستان پرەزيدەنتى نۇرسۇلتان نازارباەۆ تا بار. بۇل تۋرالى egemen.kz حابارلادى.
ماسكەۋدەگى قىزىل الاڭدا ءوتىپ جاتقان پارادقا رەسەي قارۋلى كۇشتەرىنىڭ 15 مىڭ جاۋىنگەرى مەن وفيتسەرى قاتىسۋدا. سونداي-اق, قازاقستان, قىتاي, ءۇندىستان, تۇرىكمەنستان, موڭعوليا, ارمەنيا, سەربيا, بەلارۋس, ازەربايجان جانە قىرعىزستان مەملەكەتتەرىنىڭ جاۋىنگەرلەرى مەن وفيتسەرلەرى دە اتالعان پارادتا جۇرتشىلىق الدىندا ءجۇرىپ ءوتتى.
جالپى, پاراد بارىسىندا 194 اسكەري تەحنيكا بىرلىگى كورسەتىلەدى. ال اۆياتسيالىق بولىگىندە 143 اسكەري ۇشاق پەن تىكۇشاق ەلدىڭ نازارىنا ۇسىنىلادى دەپ كۇتىلۋدە.
اتالعان شاراعا قاتىسۋ ءۇشىن قازاقستاننان 6 ۇلى وتان سوعىسىنىڭ ارداگەرى ارنايى باردى. ولار: احات بەكمادى (استانا ق.), كامالي دۇيسەمبەكوۆ (قاراعاندى ق.), قاراتاي تولەبەكوۆ (شىمكەنت ق.), دميتري مالىشەۆ (الماتى ق.), فەدور فەدوتوۆ (الماتى وبل.) جانە ميحايل سمولەنكوۆ (پاۆلودار ق.).
ەلامان قوڭىر.
دەرەك: egemen.kz.
سۋرەت: twitter.com.