ۇلى جەڭىس

ۇلى وتان سوعىسى قايسارلىق پەن قاھارماندىق ۇلگىسىن كورسەتە بىلگەن ەرجۇرەك ساربازدارىمىزدىڭ  ەل مەن جەرگە دەگەن وراسان زور سۇيىسپەنشىلىگى مەن قاجىر-قايراتىن  ءمىنسىز دالەلدەگەن ايبىن الاڭىنا اينالعان ەدى. «ەشكىم دە ۇمىتىلمايدى, ەشتەڭە دە ۇمىت قالمايدى». ويتكەنى, ول بۇگىندە جىر مەن سازدىڭ جۇرەگىندەگى بۇلكىلدەپ سوعىپ تۇرعان تىرشىلىكتىڭ تامىرىنا اينالىپ ۇلگەرگەن قۇبىلىس. مۇنى تاقىرىپ وزەگىنە ارقاۋ ەتكەن قاي تۋىندى بولماسىن نازدى, سازدى, بويداعى سەزىمدى سەلدەي تاسىتار وزگەشە قۇدىرەتكە يە دەسەك, وتكەن جىلدار جاڭعىرىعىن جادىمىزعا سۋىتپاي قوندىراتىن مۇنداي جالىندى ۇندەر 70 جىل بويى ۇزىلمەي شىرقالىپ كەلەدى. ەرلىكتى تالماي جىرلاۋعا اسىرەسە, اقىندار مەن كومپوزيتورلاردىڭ قوسىپ كەلە جاتقان ۇلەسى ۇشان-تەڭىز. سونىڭ ءبىرى, مىسالى, ءسوزىن اقىن جۇپار اقتومپىشقىزى قوجاق, ال مۋزىكاسىن بەلگىلى كومپوزيتور سەرىك ءابدىنۇروۆ جازعان « ۇلى جەڭىس» ءانى. جەڭىس رۋحىن قۋانىشتى, جىگەرلى قالىپتا جىرلايتىن شىعارماشىلىق دۋەتتىڭ بۇل دۇنيەسى رەسپۋبليكالىق ونەر بايگەسىندە جۇلدەلى ءبىرىنشى ورىندى قانجىعاسىنا بايلاعان بولاتىن.  ءانى: سەرىك ءابدىنۇروۆ ءسوزى: جۇپار قوجاق   قىرعىن سەلىن توقتاتقان, جاقىندى, جاردى جوقتاتقان, سەنىم, بەينەت اقتاتقان, وتاندى, ەلدى ساقتاتقان. قايىرماسى: قان كەشىپ كۇتكەن جەڭىس! جان كەشىپ كۇتكەن جەڭىس! تارىعىپ جەتكەن, زارىعىپ جەتكەن, ساعىنىپ جەتكەن جەڭىس!   جاۋدى جەڭىپ جايراتقان, سان ەلدە بۇلبۇل سايراتقان, جەردى گۇلدەي جايناتقان, قازانىن تويدىڭ قايناتقان. قايىرماسى: قان كەشىپ كۇتكەن جەڭىس! جان كەشىپ كۇتكەن جەڭىس! ەرلىكپەن جەتكەن,    ورلىكپەن جەتكەن, بىرلىكپەن جەتكەن جەڭىس!   شاتتىق تويىن تويلاتقان, باقىتقا بويدى بويلاتقان توردە ءسابي ويناتقان, قادىرىن كۇننىڭ ويلاتقان. قايىرماسى: قان كەشىپ كۇتكەن جەڭىس! جان كەشىپ كۇتكەن جەڭىس! ارمانداپ جەتكەن, ارايلاپ جەتكەن, اڭساتىپ جەتكەن جەڭىس!