« ۇلى قازاق دالاسىنىڭ اقساقالى» كوزى تىرىسىندە وسىنداي قوشەمەت كورسەتىلگەن ابىزدىڭ ەسىمى تۋعان جەرىندە ەسكەرۋسىز قالمادى
ەسىل اۋدانىنا قاراستى ج.قيزاتوۆ اتىنداعى اۋىل شارۋاشىلىعى كوللەدجىندە بەلگىلى مەملەكەت جانە قوعام قايراتكەرى بايكەن اشىموۆكە مەموريالدىق ەسكەرتكىش ورناتىلىپ, اشىلۋ راسىمىنە الماتىدان, استانادان, قىزىلجار وڭىرىنەن قوناقتار, تۋعان-تۋىستارى جينالدى.
بايكەن ءاشىم ۇلى 1935-1938 جىلدار ارالىعىندا وسىنداعى لەنين اۋىل شارۋاشىلىعى تەحنيكۋمىندا وقىعان. لەنينگراد قولدانبالى زوولوگيا ينستيتۋتىن, جوعارى پارتيا مەكتەبىن ءبىتىرگەن. 1942-1945 جىلدارى ۇلى وتان سوعىسىنا قاتىسىپ, جاۋدى تالقانداۋدا ۇلكەن ەرلىكتەر كورسەتكەن. مايداننان ورالعاننان كەيىن ايىرتاۋ, زەرەندى اۋداندارىندا, كوكشەتاۋ, قاراعاندى, تالدىقورعان وبلىستارىندا باسشىلىق قىزمەتتەر اتقارعان. 14 جىل بويى قازاقستان ۇكىمەتىن باسقارعان, كەيىن جوعارعى كەڭەس پرەزيديۋمىنىڭ توراعاسى قىزمەتىن اتقارعان. ول ەل باسقارعان كەزەڭدە دارىندى باسشى, داناگوي ساياساتكەر رەتىندە تانىلىپ, اسقان بىلىمدىلىگى مەن ومىرلىك تاجىريبەسىن ەل ەكونوميكاسىن وركەندەتۋگە جۇمساعان.
مەموريالدىق ەسكەرتكىشتىڭ اشىلۋ سالتاناتىندا سويلەگەن سوزىندە وبلىس اكىمى ەرىك سۇلتانوۆ ەلىمىزدىڭ تاريحىندا وزىندىك ويىپ الار ورنى بار مەملەكەت جانە قوعام قايراتكەرىنىڭ تالانتتى ۇيىمداستىرۋشىلىق, زور ادامگەرشىلىك قاسيەتتەرىن ەرەكشە اتاپ ءوتتى.
– مەن بايكەن اعامەن تالاي رەت دامدەس بولدىم. ءار كەزدەسكەن سايىن عيبراتتى ۇلگى-ونەگە الۋشى ەدىك. قاراپايىمدىلىعى مەن ىسكەرلىگىنە ءتانتى بولىپ, ەلىكتەۋگە ۇمتىلاتىنبىز, – دەي كەلىپ قازاقستاننىڭ ەڭبەك ەرى گەننادي زەنچەنكوعا ءسوز بەردى. ول كوزى تىرىسىندە اڭىزعا اينالعان تۇلعاعا قانداي قۇرمەت كورسەتىلسە دە لايىقتىلىعىنا توقتالدى.
بايكەن اعانىڭ ۇلى, م.قوزىباەۆ اتىنداعى سولتۇستىك قازاقستان مەملەكەتتىك ۋنيۆەرسيتەتىنىڭ رەكتورى, اكادەميك وڭداسىن ءاشىموۆ الماتىدا اكەسى تۇرعان ءۇيگە ەسكەرتكىش تاقتا ورناتىلعانىن, ەلباسىنىڭ ۇسىنىسىمەن جاڭادان سالىنعان ءزاۋلىم مەشىتكە ەسىمى بەرىلگەنىن جەتكىزە كەلىپ, بۇگىنگى اتقارىلعان يگى شاراعا ريزاشىلىعىن ءبىلدىردى. وزگە شەشەندەر دە ءومىرى تۇتاس ءداۋىردى قامتىعان, ارقاشان حالقىنىڭ, ەلىنىڭ يىعىنا تۇسكەن اۋىرتپالىقتاردىڭ الدىڭعى لەگىندە جۇرگەن جان جايلى ءتالىمدى ەستەلىكتەر ايتتى.
وزگەشە كەسكىنمەن تۇرعىزىلعان مەموريالدىق ەسكەرتكىش اشىلعاننان كەيىن گۇل شوقتارى قويىلىپ, تاعزىم ەتىلدى. مەيماندار كوللەدجدىڭ مۇراجايىن ارالاپ, ابىز اقساقالعا قاتىستى جادىگەرلەرمەن تانىستى.
ءومىر ەسقالي, «ەگەمەن قازاقستان».
سولتۇستىك قازاقستان وبلىسى, ەسىل اۋدانى.
سۋرەتتى تۇسىرگەن امانگەلدى بەكمۇراتوۆ.