مەملەكەت باسشىسى نۇرسۇلتان نازارباەۆ ماسكەۋدە رەسەي فەدەراتسياسىنىڭ پرەزيدەنتى ۆلاديمير پۋتينمەن كەزدەستى, دەپ حابارلادى پرەزيدەنتتىڭ ءباسپاسوز قىزمەتى.
نۇرسۇلتان نازارباەۆ پەن ۆلاديمير پۋتين ەكىجاقتى ءوزارا ىقپالداستىقتىڭ, سونىڭ ىشىندە, ساۋدا-ەكونوميكا, وتىن-ەنەرگەتيكا, عارىش سالالارى مەن مادەني-گۋمانيتارلىق سالاداعى كەڭ اۋقىمدى ماسەلەلەرىن تالقىلادى.
قازاقستان مەن رەسەي پرەزيدەنتتەرى وڭىرلىك جانە حالىقارالىق كۇن تارتىبىندەگى بىرقاتار وزەكتى ماسەلەلەردى دە قاراستىردى.
نۇرسۇلتان نازارباەۆ ءوزىنىڭ قازاقستان پرەزيدەنتى بولىپ سايلانعاننان كەيىن شەتەلگە العاشقى رەسمي ساپارمەن شىعىپ وتىرعانىن اتاپ ءوتتى.
– ءبىز 15 جىلدان استام ۋاقىت بويى بىرگە جۇمىس ىستەپ كەلەمىز, وسى جىلدارى قازاقستاننىڭ رەسەيمەن قارىم-قاتىناسى نىعايدى. ءبىز سىزبەن وداقتاستىق تۋرالى شارتقا قول قويدىق, ونىڭ اياسىندا كوپتەگەن ماسەلەلەر جۇزەگە اسىرىلۋدا. ءبىز ەۋرازيالىق ەكونوميكالىق وداقتى قۇردىق. داعدارىس جاعدايىندا ەلدەرىمىزدىڭ اراسىنداعى تاۋار اينالىمى تومەندەگەنىنە قاراماستان, ەاەو-نىڭ بولاشاعى زور دەپ ەسەپتەيمىن. ەلدەرىمىزدىڭ ەكىجاقتى قارىم-قاتىناستارى جاسالعان ۋاعدالاستىقتارعا ساي دامىپ كەلەدى, – دەدى مەملەكەت باسشىسى.
قازاقستان پرەزيدەنتى, سونداي-اق, ۆ.ءپۋتيندى ۇلى وتان سوعىسىنداعى جەڭىستىڭ 70 جىلدىعىمەن قۇتتىقتادى.
ۆلاديمير پۋتين دە نۇرسۇلتان نازارباەۆتى سايلاۋداعى ايقىن جەڭىسىمەن قۇتتىقتاپ, ەكى ەل اراسىنداعى جەمىستى ىنتىماقتاستىقتىڭ جالعاساتىنىنا ءۇمىتىن ءبىلدىردى.
– ەلدەگى سوڭعى جىلدارداعى وزگەرىستەر, قازاقستان ازاماتتارىنىڭ سايلاۋ ناۋقانىنا قالاي قارايتىنى, ولاردىڭ ءسىزدىڭ اتقارعان جۇمىسىڭىزعا قالاي باعا بەرەتىنى – ەڭ قۇندىسى وسى. ءبىزدىڭ ەكىجاقتى بايلانىستارىمىز بۇدان ءارى دە قارقىندى جانە سايلاۋعا دەيىنگى جىلدارداعىداي جەمىستى بولاتىنىنا سەنىمدىمىن, – دەدى رەسەي پرەزيدەنتى.
سونداي-اق, ۆ.پۋتين ينتەگراتسيالىق ۇدەرىستەر سالاسىنداعى باستامالارى ءۇشىن قازاقستان پرەزيدەنتىنە العىس ايتتى.
– بۇگىندە بىزدەردىڭ جاساپ جاتقانىمىزدىڭ, ەكونوميكالىق وداعىمىزدى تەرەڭدەتە ءتۇسۋ باعىتىنداعى قوسىمشا قادامداردىڭ دەنى ءسىزدىڭ ەڭبەگىڭىز. ءسىزدىڭ كەدەن وداعىن, ودان سوڭ ەاەو-نى قۇرۋ تۋرالى باستاما كوتەرىپ, سويلەگەن كەزىڭىز مەنىڭ وتە جاقسى ەسىمدە. ەڭ باستىسى, قازاقستاننىڭ ءوز دامۋىمەن دە, ينتەگراتسيالىق ۇدەرىستەردىڭ ورىستەۋىمەن دە بايلانىستىنىڭ بارلىعى جۇزەگە اسۋدا, – دەدى رەسەي پرەزيدەنتى.
* * *
ەلباسى نۇرسۇلتان نازارباەۆ ۇلى وتان سوعىسىنداعى جەڭىستىڭ 70 جىلدىعىن مەرەكەلەۋ شارالارى اياسىندا ماسكەۋدە ەگيپەت پرەزيدەنتى ابدەل فاتتاح اس-سيسيمەن كەزدەستى, دەپ حابارلادى پرەزيدەنتتىڭ ءباسپاسوز قىزمەتى.
ەكى ەلدىڭ مەملەكەت باسشىلارى ساياسي جانە ساۋدا-ەكونوميكالىق سالاداعى ەكىجاقتى ىنتىماقتاستىق ماسەلەلەرىن, سونداي-اق, قارىم-قاتىناستاردىڭ ودان ءارى دامۋ كەلەشەگىن تالقىلادى.
سونىمەن قاتار, نۇرسۇلتان نازارباەۆ پەن ابدەل فاتتاح اس-سيسي حالىقارالىق كۇن تارتىبىندەگى مەيلىنشە وزەكتى ماسەلەلەر جونىندە پىكىر الماستى.
* * *
ەلباسى نۇرسۇلتان نازارباەۆ ماسكەۋدە ۇلى وتان سوعىسىنداعى جەڭىستىڭ 70 جىلدىعىن مەرەكەلەۋ شارالارى اياسىندا ۆەتنام پرەزيدەنتى چىونگ تان شانگپەن كەزدەستى, دەپ حابارلادى پرەزيدەنتتىڭ ءباسپاسوز قىزمەتى.
ەكى ەلدىڭ كوشباسشىلارى ساۋدا-ەكونوميكا جانە ينۆەستيتسيا سالالارىنداعى ىقپالداستىقتىڭ نەگىزگى باعىتتارىن قاراستىردى.
قازاقستان مەن ۆەتنام پرەزيدەنتتەرى حالىقارالىق كۇن تارتىبىندەگى وزەكتى ماسەلەلەردى دە قوزعادى.
سونىمەن قاتار, چىونگ تان شانگ نۇرسۇلتان نازارباەۆتى پرەزيدەنتتىك سايلاۋداعى جەڭىسىمەن تاعى دا قۇتتىقتادى.