قازاقستان حالقى اسسامبلەياسىنىڭ قۇتتىقتاۋ حاتى

قۇرمەتتى وتانداستار!

قاستەرلى مەرەكە كۇنى cىزدەردى ۇلى وتان سوعى­سىن­داعى جەڭىستىڭ 70 جىل­دى­عىمەن شىن جۇرەكتەن قۇتتىق­تايمىز. جەڭىس كۇنى – بۇل ەرلىك پەن اسكەري داڭق, ەلدىڭ بىرلىگى مەن ىنتىماعى سالتانات قۇراتىن ءسات. بۇل كۇن – ۇلى جەڭىس جولىندا پارىز بەن نامىستى العا قويعان, ەلى مەن جەرىنىڭ بوستاندىعى ءۇشىن جان اياماي جاۋعا قارسى تۇرعان, قايسار مىنەز باتىرلارىمىز بەن تىلدا تىنىمسىز ەڭبەك ەتكەن اسىل جانداردىڭ ەرەن ەرلىگىنىڭ, بيىك رۋحىنىڭ وشپەس دالەلى رەتىندە ارقاشان ءبىزدىڭ جۇرەگىمىزدە. ەل باسىنا كۇن تۋعان ساتتە تۋعان جەردىڭ نامىسى ءۇشىن مايدانعا اتتانىپ وتان ءۇشىن جانقيارلىق ەرلىك كورسەتكەن جاۋجۇرەك قاھارماندارىمىزدىڭ ەرلىكتەرى ماڭگىلىك ەل ەسىندە. بۇل كۇنى ءبىز قايسارلىقتىڭ, قايتپاس رۋح پەن جالىندى جىگەردىڭ حاس ۇلگىسىن كورسەتكەن بارشا سوعىس جانە تىل ارداگەرلەرىنىڭ الدىندا تاعزىم ەتەمىز. بۇل مەرەكە حالقىمىزدىڭ ماڭگىلىك ماقتانىشى بولىپ قالا بەرمەك. قادىرلى ارداگەرلەر, ۇلى وتان سوعىسىنىڭ قاتىسۋشىلارى جانە تىل ەڭبەككەرلەرى! سىزدەر جارقىن كەلەشەك ءۇشىن ەلىمىزدى جاۋ­دان ەرلىكپەن قورعاي بىلدىڭىزدەر. سىزدەردىڭ تۋعان ەلىمىزدىڭ ازاتتىعى جولىنداعى جاساعان ەرلىك ىستەرىڭىزدى جالعاستىرۋ, ۇرپاقتان-ۇرپاققا جەتكىزۋ – ءبىزدىڭ بورىشىمىز. سىزدەرگە جانە جاقىندارىڭىزعا زور دەنساۋلىق, باقىت, وتباسىلارىڭىزعا ىرىس, ىنتىماق تىلەيمىز! ارقاشان ەلىمىز تىنىش, اسپانىمىز اشىق بولسىن! ارداگەرلەرىمىز امان بولسىن! ۇلى جەڭىس داڭقى ماڭگىلىك جاساسىن! قازاقستان حالقى اسسامبلەياسى