تامىزدىڭ 6-سى كۇنى كەشكە تۇركيادا سالونىندا قازاقستاننىڭ, رەسەيدىڭ, ليتۆانىڭ جانە بەلارۋستىڭ ازاماتتارى وتىرعان تۋريستەر اۆتوبۋسى ءىرى جول اپاتىنا ۇشىرادى.
توتەنشە جاعداي انادولى جەرىنىڭ وڭتۇستىك-باتىس قاپتالىنداعى دەنيزلي قالاسى ماڭىندا استانا ۋاقىتى بويىنشا ساعات 19:30-دا ورىن الدى. اۆتوبۋس پامۋككالەدەن انتالياعا قاراي جول ءجۇرىپ بارا جاتقان ەكەن. اپات سالدارىنان 4 ادام قازا تاۋىپ, 38 ادام جاراقات العان.
اۆتوبۋستا بولعان رەسەيلىك زينايدا بوگدانوۆا «روسسيا-24» تەلەارناسىنىڭ ەفيرىندە اۋدارىلعان اۆتوبۋستىڭ قۇزعا ءتۇسىپ كەتە جازداعانىن ايتتى. «ءبىز تەرەزەدەن قۇلاپ تۇستىك, قازا بولعاندار وتە كوپ», – دەدى ول. «جاڭبىر جاۋىپ وتكەننەن كەيىن جول تايعاق بولدى. جۇرگىزۋشى جىلدامدىقتى اسىرىپ جىبەرسە كەرەك, تىزگىنگە يە بولا المادى. اۆتوبۋس تايعاناقتاي باستادى, شوفەر قۇزعا قۇلاماۋى ءۇشىن ونى جولدا ۇستاپ تۇرماقشى بولدى. مۇنى ول ورىنداي الدى. كولىك اۋدارىلىپ كەتكەنىمەن, قۇزعا قۇلاعان جوق», – دەدى بوگدانوۆا.
قازاقستان سىرتقى ىستەر مينيسترلىگى تۇركياداعى جول اپاتىنا بايلانىستى تۇسىنىكتەمە بەرە كەلىپ, اۋدارىلىپ قالعان اۆتوبۋستىڭ ىشىندە ەلىمىزدىڭ 7 ازاماتى بولعانىن مالىمدەدى. قازىرگى تاڭدا ديپلوماتيالىق ۆەدومستۆو قىزمەتكەرلەرى وسىنداعى 5 وتانداسىمىزبەن بايلانىسقا شىعىپ ۇلگەرگەن. ولار جول-كولىك وقيعاسى كەزىندە جاراقات الىپ, اۋرۋحاناعا تۇسكەن. الايدا, ومىرلەرىنە قاۋىپ ءتونىپ تۇرعان جوق. ال تاعى ەكى ازامات ىزدەستىرىلىپ جاتىر.
ۆەدومستۆو ءباسپاسوز قىزمەتىنىڭ سونىمەن بىرگە جول اپاتىنا ۇشىراعان اۆتوبۋستا بولعان جەرلەستەرىمىزدىڭ كىمدەر ەكەندەرىن دە اتاپ كورسەتتى. ولار شولپان تۇرعانبەكوۆا (22.08.1989), توعجان تۇرعانبەكوۆا (25.04.1993), ايدىن تىلەۋباەۆا (14.07.1999), ازامات تىلەۋباەۆ (25.05.1992), گۇلنار تىلەۋباەۆا (04.01.1966), زارينا تسولوەۆا (05.11.1993), ايدا ساراباەۆا (21.09.1996) ەسىمدى ازاماتتار بولىپ شىقتى.
ءباسپاسوز وكىلدەرىنىڭ مالىمەتىنشە, 19 جاستاعى ايدا ساراباەۆانىڭ قازا تاپقانى بەلگىلى بولدى. ال قالعاندارى دەنيزلي قالاسىنىڭ ءتۇرلى ەمحانالارىنا جەتكىزىلگەن.
جول-كولىك اپاتىنىڭ سەبەپتەرى انىقتالىپ جاتىر, اۆتوبۋس جۇرگىزۋشىسى ۇستالدى. تەرگەۋ جۇمىستارى ءجۇرىپ جاتىر.
قۇرىش نۇرىمبەت.