پالاتا سپيكەرى قابيبوللا جاقىپوۆتىڭ توراعالىعىمەن ءماجىلىس بيۋروسى ءوتىپ, الداعى جالپى وتىرىستىڭ كۇن ءتارتىبى ناقتىلاندى, دەپ حابارلادى ءماجىلىستىڭ ءباسپاسوز قىزمەتى.
دەپۋتاتتار نازارىنا «جەكە دەتەكتيۆتىك قىزمەت تۋرالى» زاڭ جوباسى ىلەسپەلى تۇزەتۋلەرمەن ءبىرىنشى وقىلىمدا ۇسىنىلىپ وتىر. ماجىلىسمەندەر مەنشىك قۇقىعىن قورعاۋدى كۇشەيتۋ, شارتتىق مىندەتتەمەلەردى قورعاۋدى كەپىلدەندىرۋ جانە ولاردى بۇزعانى ءۇشىن جاۋاپكەرشىلىكتى قاتاڭداتۋ ماسەلەلەرى بويىنشا تۇزەتۋلەردى ەكىنشى وقىلىمدا قاراماق.
سونىمەن قاتار, كۇن ءتارتىبى جوباسىندا بولگاريا جانە رۋمىنيا ەلدەرىمەن ادامداردى ۇستاپ بەرۋ تۋرالى شارتتاردى, سونداي-اق, رۋمىنيامەن سوتتالعان ادامداردى بەرۋ تۋرالى شارتتى راتيفيكاتسيالاۋعا قاتىستى زاڭ جوبالارى قامتىلعان.
جالپى وتىرىستا ءماجىلىس سوت جۇيەسى مەن سۋديالارىنىڭ مارتەبەسى تۋرالى كونستيتۋتسيالىق زاڭعا جانە كونستيتۋتسيالىق زاڭدارعا ازاماتتىق پروتسەستىك زاڭنامانى جەتىلدىرۋ ماسەلەلەرى بويىنشا وزگەرىستەرگە قاتىستى زاڭ جوبالارى مەن كاسپي تەڭىزىنىڭ سۋ-بيولوگيالىق رەسۋرستارىن ساقتاۋ مەن ۇتىمدى پايدالانۋ تۋرالى, رەسەيمەن بايقوڭىر قالاسىنىڭ ءبىلىم بەرۋ ۇيىمدارىن بەرۋ تۋرالى كەلىسىمدەردى راتيفيكاتسيالاۋ تۋرالى زاڭ جوبالارىنا بايلانىستى بەيىندى كوميتەتتەرگە قورىتىندى ازىرلەۋ مەرزىمىن تاعايىنداماق.