استانا. 7 تامىز. كسرو حالىق ءارتىسى ۆلاديمير زەلدين جامباسىنا وپەراتسيا جاساتتى. بۇل تۋرالى ras.kz حابارلادى.
ءارتىستىڭ جۇبايى يۆەتتا زەلدينانىڭ سوزىنە قاراعاندا, حيرۋرگيالىق ارەكەت كەزىندە اكتەر «ءوزىن وتە جاقسى ۇستاعان, ءتىپتى قالجىڭ ايتىپ قويعان». «وپەراتسيا جاسالىپ بولدى, ول ءساتتى ءوتتى. دارىگەرلەر ايتقانداي, ول ءوزىن جاقسى سەزىنىپ وتىر», – دەپ مالىمدەدى زەلديننىڭ ايەلى.
وپەراتسيا جالپى ناركوزبەن ەمەس, انەستەزيامەن جاسالعان. قازىر زەلدين جانساقتاۋ بولىمىندە جاتىر.
بۇقارالىق اقپارات قۇرالدارى 5 تامىزدا اكتەردىڭ باكۋلەۆ اتىنداعى عىلىمي ورتالىققا قارالۋعا كەلگەندە جامباس سۇيەگىن سىندىرىپ العانىن حابارلاعان بولاتىن.
بيىلعى جىلى اكتەر ۆلاديمير زەلدين ءوزىنىڭ 100 جىلدىق مەرەيتويىن اتاپ ءوتتى. ول ءالى كۇنگە دەيىن تەاتردا ويناپ تۇرادى. ءارتىس 2013 جىلى ءتىپتى ماسكەۋدە وليمپيالىق الاۋدى الىپ جۇگىرۋگە دە قاتىسقان.
زەلدين 1915 جىلعى 10 اقپاندا كوزلوۆ قالاسىندا تۋعان. ول 1941 جىلى ەكرانعا جول تارتقان «شوشقاشى مەن باقتاشى» فيلمىنەن كەيىن كوپشىلىككە كەڭىنەن تانىمال بولا باستادى. ونىڭ ەسەبىندە 40-تان استام فيلم بار. سولاردىڭ اراسىندا «اساۋعا تۇساۋ», «ون نەگر بالاسى», «باقباقتان جاسالعان شاراپ» فيلمدەرى ەرەكشە اتالادى. 2015 جىلى رولدەردىڭ ءبىرىن زەلدين ورىنداعان «كاۆكازدىڭ ۇزدىك قىزى» كارتيناسى ءتۇسىرىلىپ بىتپەكشى.
اكتەر 1945 جىلدان بەرى كەڭەس ارمياسىنىڭ ورتالىق تەاترىندا قىزمەت ەتىپ كەلەدى.
تالعات رايىمبەك.
دەرەك, سۋرەت: ras.kz.