استانا. 7 تامىز. كەشە, 6 تامىز كۇنى پولشانىڭ جاڭا پرەزيدەنتى اندجەي دۋدا ءوزىنىڭ لاۋازىمىن اتقارۋعا كىرىستى. بۇل تۋرالى ras.kz حابارلادى.
بەيسەنبى كۇنى پولشانىڭ جاڭادان سايلانعان پرەزيدەنتى اندجەي دۋدانىڭ يناۋگۋراتسياسى بولدى. ول ۇلتتىق جينالىس – سەيم مەن سەنات الدىندا انت قابىلداپ, بەس جىلدىق مەرزىمگە بەلگىلەنگەن قىزمەتىنە كىرىستى.
سەيم سپيكەرى مالگوجاتا كيداۆا-بلونسكا ۇلتتىق جينالىستى اشقاننان كەيىن پولشانىڭ مەملەكەتتىك گيمنى ورىندالدى. كونستيتۋتسياعا سايكەس, اندجەي دۋدا ۇلتتىق جينالىس الدىندا انت ءماتىنىن وقىدى. سودان سوڭ ول وزىنە پرەزيدەنت سايلاۋى بارىسىندا داۋىس بەرگەن پولياك حالقىنا العىس سەزىمىن جەتكىزدى. ول ءوزىنىڭ سوزىندە پولشاعا بۇدان دا گورى كۇشتىرەك ناتو-نىڭ كوبىرەك كوز سالۋى كەرەكتىگىن, سولتۇستىك اليانس تاراپىنان بۇدان دا كۇشتىرەك كەپىلدىك بولۋى ماڭىزدى ەكەنىن اتاپ ءوتتى.
دۋدا سونداي-اق, «حالىقارالىق ساياساتتا رەۆوليۋتسيانىڭ كەرەك ەمەس ەكەنىن, دەگەنمەن, ونى رەتتەپ تۇرۋ قاجەتتىگىن ايتتى. سول سياقتى كۇشتى, جاقسى قارۋلانعان پولياك ارمياسىن قۇرۋ كەرەكتىگىن العا تارتتى. ونىڭ ايتۋىنا قاراعاندا, ەلدەن تىسقارى جەرلەردە تۇرىپ جاتقان ۇلتى پولياك جاستارىمەن قارىم-قاتىناس ورناتىپ, ولاردىڭ ەلگە ورالۋى ءۇشىن كەرەكتى بارلىق جاعداي جاساۋ كەرەك.
يناۋگۋراتسياعا قاتىسقان 600-دەن استام مەيمانداردىڭ قاتارىندا پولشانىڭ بۇرىنعى پرەزيدەنتتەرى لەح ۆالەنسا مەن الەكساندر كۆاسنەۆسكي, بۇرىنعى پرەمەر-مينيسترلەر ەجي بۋزەك پەن يان ك. بەلەتسكي, سەيم مەن سەناتتىڭ بۇرىنعى سپيكەرلەرى, ۇلتتىق پولياك بانكىنىڭ باسشىسى, ادام قۇقىعى جونىندەگى ۋاكىل, بالالار قۇقىعى جونىندەگى ۋاكىل, ءدىن باسشىلىعىنىڭ, كۋرودەپۋتاتتار مەن ديپلوماتيالىق كورپۋس بولدى.
تالعات رايىمبەك.
دەرەك, سۋرەت: ras.kz.