استانا. 7 تامىز. لاتۆيادا ورنالاسقان 395 مەكتەپتىڭ ىشىندەگى 31 وقۋ ورنىندا 10-سىنىپ اتاۋلى مۇلدەم جوق. بۇل تۋرالى ras.kz حابارلادى.
لاتۆيانىڭ ءبىلىم جانە عىلىم ءمينيسترى راديوعا بەرگەن سۇحباتىندا سونداي-اق, جوعارىداعىداي مەكتەپتەردىڭ 11-ءى ريگا قالاسىندا ەكەنىن ايتتى.
ساياساتكەر مىسال رەتىندە 10-شى دا, 11-ءشى دە سىنىپتارى جوق, تەك 12-ءشى سىنىبى عانا بار يندرا مەكتەبىن كەلتىردى. سەيلەنىڭ پىكىرىنشە, مۇنداي ءبىلىم مەكەمەلەرى شاكىرتتەرىن ءتيىستى ءبىلىم دەڭگەيىمەن قامتاماسىز ەتە المايدى.
«ارينە, تەورەتيكالىق جاعىنان ءبىز سىنىپ ءۇشىن ءبىر بالانى وتىرعىزىپ, وقۋدى قامتاماسىز ەتە الامىز. بىراق ءبىزدىڭ ەل رەتىندە بىلاي جاساۋعا قۇقىمىز جوق ەكەنىنە دە سەنىمدىمىن», – دەدى مينيستر.
ءبىلىم جانە عىلىم مينيسترلىگى ۇسىنعان پەداگوگتاردىڭ ەڭبەكاقىلارىن تولەۋدىڭ جاڭا مودەلىندە 12 وقۋشىدان از سىنىپتارى بارپ مەكتەپتەر جابىلۋعا ءتيىس. وسى تۇرعىدان كەلگەندە, لاتۆيادا قازىر 80 مەكتەپتى جابۋعا تۋرا كەلەدى. بۇل تۋرالى ءمينيستردىڭ كەڭەسشىسى كاسپار بەرزينش BNS تەلەارناسىندا سويلەگەن سوزىندە ايتتى. ەگەر سىنىپتا 12 بالادان كەم بولسا, وندا مەكتەپ وسى وقۋشىلاردى وقىتۋ ءۇشىن مەملەكەتتەن قارجى المايدى. ال جەرگىلىكتى بيلىك شاعىن مەكتەپتەر ءبارىبىر كەرەك دەپ ەسەپتەسە, ولاردى ۇستاپ تۇرۋ ءۇشىن قاجەتتى قارجىنى ءوزى تاۋىپ بەرەدى.
«ءبىز ەل رەتىندە شاعىن مەكتەپتەردى ۇستاپ وتىرۋعا جول بەرە المايمىز», – دەپ ءتۇسىندىردى وسى ورايدا بەرزينش.
شەنەۋنىكتەردىڭ ەسەپتەۋلەرى بويىنشا, بارىنشا ءتيىمدى ناتيجەگە قول جەتكىزۋ ءۇشىن سىنىپتار 15-25 وقۋشى توڭىرەگىنەن جابدىقتالۋى كەرەك ەكەن. ەگەر بالا سانى بۇدان كوپ بولىپ جاتسا, ول دا شاكىرتتەردىڭ ۇلگەرىم دەڭگەيلەرىنە كەرى اسەر ەتەدى.
مينيسترلەر كابينەتى ءبىلىم بەرۋ مەن مۇعالىمدەردىڭ ەڭبەكاقىلارىن تولەۋدىڭ جاڭا مودەلىن 11 تامىز كۇنى وتەتىن وتىرىسىندا تالقىلايتىن بولادى.
تالعات رايىمبەك.
دەرەك, سۋرەت: ras.kz.