قازىرگى كۇندەرى استاناداعى ەكسپو-2017 كورمە كەشەنى قۇرىلىسىن جۇرگىزۋ جاندانا باستادى. مۇنداعى بىرقاتار قۇرىلىس نىساندارىنداعى جۇمىستار ءتىپتى الدىن الا بەلگىلەنگەن كەستەدەن دە وزىق كەلەدى. سولاردىڭ ءبىرى – اكىمشىلىك عيماراتى بۇگىندە ءبىرشاما بوي كوتەرىپ, ءوزىنىڭ قاتارعا قوسىلاتىن ءساتىن جاقىنداتا تۇسۋدە.
بۇكىلالەمدىك كورمە كەشەنى قۇرىلىسىنىڭ باس مەردىگەرى بولىپ تابىلاتىن كومپانيانىڭ باسشىسى نۇرجەكە احماديەۆتىڭ ايتۋىنا قاراعاندا, اكىمشىلىك عيماراتتى بيىلعى قازان ايىندا پايدالانۋعا بەرۋ جوسپارلانىپ وتىر. قازىر قۇرىلىس كەلبەتىنە قاراي وتىرىپ, ونىڭ تولىق اياقتالعاننان كەيىن قانداي پىشىنگە كوشەتىنىن كوزگە ەلەستەتۋ قيىن ەمەس. بارىنشا جوعارى دەڭگەيدەگى ىڭعايلىلىق پەن قولايلىلىقتى باستى ماقساتى ەتىپ ۇستانعان عيماراتتىڭ اۋقىمى 29 مىڭ شارشى مەتردى قۇرايدى. وسى كەزدە بۇكىل «ەكسپو-2017» كەشەنىنە IT-تەحنولوگيانىڭ جالپى باقىلاۋ جاساۋىن جۇزەگە اسىراتىن جەدەل باسقارۋ ورتالىعى ەكىنشى قاباتقا ورنالاساتىنى دا بەلگىلى بولدى. مۇندا قالاشىق اۋماعىندا قادام باسقان سايىن ورنالاساتىن بارلىق ەكراندار مەن مونيتورلارداعى جازبالار, بارشا نىساندار جونىندەگى مالىمەتتەر ءسات سايىن قۇيىلىپ كەلىپ تۇرادى. بۇل كەشەن قىزمەتكەرلەرىنىڭ كورمە تەرريتورياسىندا نە بولىپ جاتقانىن ۇدايى باقىلاپ وتىرۋلارىنا مۇمكىندىك بەرەدى.
بۇدان بولەك, كورمەنىڭ بارلىق وفيستەرى وسى عيماراتتا ورنالاساتىن بولادى. ولاردىڭ اراسىندا بۇدان باسقا, تاعى ماكەت زالى, كونفەرەنتس-زال, قاراۋ الاڭى سەكىلدى باسپانانىڭ ارنايى جابدىقتارى مەن قۇرالدارى قونىس تەبەدى.
سونىمەن, كەشەننىڭ ەڭ العاشقى نىسان قۇرىلىسى تولىق اياقتالىپ, پايدالانۋعا بەرىلەتىن شاعىنا تىم كوپ قالعان جوق.
مۇرات ايتقوجا.