سىرىم اۋدانىندا «جاستار ءتاجىريبەسى» باعدارلاماسىن جۇزەگە اسىرۋ ماقساتىندا رەسپۋبليكالىق ترانسفەرتتەن جانە جەرگىلىكتى بيۋدجەتتەن 12 ملن. 992 مىڭ تەڭگە قارجى ءبولىندى. وسى بولىنگەن قارجىعا شىلدە ايىنىڭ العاشقى ونكۇندىگى ارالىعىندا 61 جاس مامان نەگىزگى ماماندىقتارى بويىنشا اۋدانداعى 42 مەكەمەگە «جۇمىسپەن قامتۋ ورتالىعى» مم ارقىلى 6 اي مەرزىمگە جۇمىسقا جولداندى. جۇمىسقا جولدانعانداردىڭ اراسىندا مال دارىگەرى, ءبىلىم بەرۋ, اقپاراتتىق جۇيەلەر, بايلانىس تەحنيگى, ەلەكترمەن قامتاماسىزداندىرۋ, قارجىگەر, جول قۇرىلىسىن قاداعالاۋ, تۋريزم, الەۋمەتتىك قىزمەتكەر, مادەنيەت, بەينەلەۋ جانە سىزۋ ونەرى سياقتى سالا يەلەرى بار. ەڭ باستىسى, اۋداندا قولعا الىنعان «جاستار تاجىريبەسى» باعدارلاماسىنىڭ ماقساتى ەلىمىزدەگى جوعارى جانە ارنايى ورتا ءبىلىم وردالارىن بىتىرگەن, ايتسەدە ماماندىعى بويىنشا جولى بولماي جۇرگەن جاستاردى تۇراقتى جۇمىسپەن قامتۋ, ولارعا قولداۋ كورسەتۋ بولاتىن.
مۇسىربەك ايتاشەۆ. سىرىم اۋدانى, باتىس قازاقستان وبلىسى.