كاسپي تەڭىزىنىڭ قۇرىق پورتىندا پاروم كەشەنى سالىنىپ, قۇرىلىسشىلار كاسىپكەرلەر مەن كاسپورىندارعا جاعالاۋعا شىعۋعا مۇمكىندىك اپەردى. «قتج» ۇك» اق بۇل جوبانى بيىلعى ءساۋىردە اشقان بولاتىن.
«تاياۋدا ارنايى تەحنيكالار سانى 200-گە جەتەدى. ەكى اۋىسىمدا جۇمىس جاساۋعا بولادى. بيىلعى جىلعى جوسپارىمىزدا تەمىرجولدىڭ توپىراق توسەمىن جاساپ, قۇرىق سەلوسىنان پورتقا دەيىن وپتيكالىق-تالشىقتى ۆل-110 كۆت ەلەكتر جەلىلەرىن تارتامىز. ەرساي ستانساسىنان تەمىرجولدىڭ كىرمە تەلىمدەرىن توسەيمىز», دەيدى جوبانىڭ باس ينجەنەرى مارات دۇيسەنباەۆ. بۇگىنگى تاڭدا تەمىرجولدىڭ پورتقا كىرمە تەلىمدەرى تەگىستەلۋدە. مۇندا 4 ميلليون تەكشە مەتر جەر قاباتىن الۋ قاجەتتىلىگى بايقالادى. قازىردىڭ وزىندە قۇرىلىسشىلار 1 ميلليون 150 مىڭ تەكشە مەتر توپىراق شىعارىپ, جۇمىستىڭ 30 پايىزىن ورىندادى. جەردىڭ قاتتى قاباتىن جارۋ تاسىلدەرى قولدانىلۋدا. قۇرىق پورتى اقتاۋدان ءجۇز شاقىرىم جەردە ورنالاسقان. سوندىقتان دا مۇندا بورجاقتى-ەرساي تەمىرجول جەلىسى توسەلدى. جاڭا تەمىرجول جەلىسىمەن العاشقى جۇمىسشى پويىزدارىن مەملەكەت باسشىسى شىلدەدە جىبەردى. قازىر بۇل جولمەن قۇرىلىس زاتتارى, پاروم كەشەنىنە قاجەتتى اۋىر قوراپتى قاۋسىرمالار, باسقا دا تاۋارلار وتاندىق جانە شەتەلدىك كاسىپورىنداردىڭ سۇرانىسى بويىنشا جەتكىزىلۋدە. تاياۋ ارادا ەرساي ستانساسىنان قۇرىق پورتىنا 14,7 شاقىرىمدىق كىرمەجولدار سالىناتىن بولادى. بۇل جۇمىستارمەن قاتار تەڭىز اۋماعىنىڭ تەرەڭدىگىن زەرتتەۋ جۇمىستارى دا جۇرگىزىلۋدە. ول جۇمىستىڭ اياقتالۋىنا بايلانىستى تەڭىز تابانىن قازۋدىڭ ءادىسى قاراستىرىلادى. سونىمەن قاتار, سۋ ايدىنىن تەڭىز تولقىندارىنان قورعانىش قۇرالدارى باتىس بولىگىندە 1350 مەترگە, شىعىسىندا 540 مەترگە ورناتىلادى. قۇرىلىسشىلارعا جۇمىس ىستەپ, ۋاقىتىندا تىنىعۋىنا قولايلى جاعداي جاسالعان. ۆاگونداردىڭ ورنىنا 150 جۇمىسشى مەن 40 ينجەنەر تەحنيكتەرگە ارنالعان شاعىن قالاشىق سالىنادى. قازىردىڭ وزىندە جايلى جاتاقحانا, اكىمشىلىك كورپۋس, اسحانا سالىنۋدا. جىلىنا ءتورت ميلليون توننا جۇك وتكىزە الاتىن پاروم كەشەنى حالىق تۇتىنۋ تاۋارلارىن, استىق, مۇناي ءونىمدەرى, سۇيىتىلعان گاز, تىڭايتقىش, باسقا دا جۇكتەر تاسىمالدايدى. پورتتى تولىق قۋاتىندا ىسكە قوسۋ ءۇشىن 250 ادام تۇراقتى جۇمىسقا قابىلدانادى.
«ەگەمەن-اقپارات».