مەملەكەتتىك حاتشى گۇلشارا ابدىقالىقوۆانىڭ شىعىس ءوڭىرىندەگى جۇمىس ساپارى ادامزاتقا كەمەڭگەر پەرزەنت سىيلاعان قاسيەتتى سەمەي توپىراعىندا جالعاستى. مەملەكەتتىك حاتشى سەمەي قالاسىندا باستالعان ابايدىڭ 170 جىلدىق مەرەيتويى اياسىنداعى مەرەكەلىك ءىس-شارالارعا قاتىستى. ەلباسى نۇرسۇلتان نازارباەۆتىڭ ەلىمىزدى جان-جاقتى جاڭعىرتۋعا باعىتتالعان بەس ينستيتۋتتىق رەفورماسى مەن «100 ناقتى قادامىن» ىسكە اسىرۋدا ۇلى اقىن, ويشىل ءھام اعارتۋشى اباي قۇنانباەۆتىڭ رۋحاني مۇراسىن وقىپ-ۇيرەنۋدىڭ ماڭىزى زور. بۇل رەتتە گۇلشارا ناۋشاقىزى «ادامزاتتىڭ ابايى» اتتى سالتاناتتى ءىس-شاراعا قاتىسىپ ءسوز سويلەپ, حاكىمنىڭ ادامزات تاريحىنداعى الار ورنىنا توقتالدى. اباي اتىنداعى تەاتردا وتكەن جيىندا مەملەكەتتىك حاتشى دانا بابامىزدىڭ الەم تاريحىندا ادامزاتتىڭ دامۋىنا ولشەۋسىز ۇلەس قوسقان ساناۋلى تۇلعالاردىڭ قاتارىنان تابىلاتىنىن اتاپ ءوتتى.
اباي بابامىزدىڭ تويىن لايىقتى دەڭگەيدە اتاپ ءوتۋ, ەسىمىن ۇلىقتاۋ ءىسى قازاقستاندا عانا قولعا الىنىپ وتىرعان جوق. اباي مۇراسى مۇحيتتىڭ ارعى جاعىنداعى ەلدەردە دە كەڭىنەن زەرتتەلۋدە. مىسالى, امەريكاداعى سميتسون ينستيتۋتىنىڭ قىزمەتكەرلەرى قازاقتىڭ باس اقىنىن ءار قىرىنان زەرتتەۋ ۇستىندە. تاياۋدا بىرقاتار زەرتتەۋشىلەر جيدەباي-ءبورىلى جەرىندە بولىپ, اباي-شاكارىم مەموريالدىق كەشەنىن, ەڭلىك-كەبەك ەسكەرتكىشتەرىن كورىپ, ۇلى اقىن اتامەكەنىنە باس ءيىپ قايتتى. 2013 جىلى كورشىلەس ءوزبەكستان استاناسىندا ورناتىلعان اباي ەسكەرتكىشىن ەلباسىمىز نۇرسۇلتان ءابىش ۇلى نازارباەۆ اشتى. 2014 جىلى ءمۇسىنشى يۋان سيكۋن سومداعان ۇلى بابامىزدىڭ قولا تۇلعاسى بەيجىڭدەگى «چاويان» ساياباعىندا بوي تۇزەدى. بيىل اباي مەرەيتويىنا, شىعارماشىلىعىنا ارنالعان سان الۋان ءىس-شارالار قىرعىزستان, ءتۇركيا, رەسەي, موڭعوليا جانە ەۋروپانىڭ بىرقاتار ەلدەرىندە ءوتتى. ال ەل ىشىندە ۇلى ويشىل, اقىن, اعارتۋشى, قازاق جازبا ادەبيەتىنىڭ نەگىزىن قالاۋشى اباي قۇنانباەۆتىڭ بولمىسىن تانۋ, مۇراسىن ناسيحاتتاۋ جانە زەرتتەۋ ءىسى جاڭا قارقىنمەن جۇرگىزىلۋدە. ارينە, بۇل باعىتتاعى جۇمىستار ودان ءارى جالعاسا بەرەدى. ويتكەنى, ۇلت ۇستازى ابايدى وقۋ, ونىڭ دانالىعىن ساناعا ءسىڭىرۋ – ۇلكەن رۋحاني بايلىقتى يگەرۋ دەگەن ءسوز. ءبىز بۇل بايلىقتى ءالى سان عاسىرلار بويى يگەرەمىز. سەبەبى, اباي ءبىر ۇلتتىڭ شەڭبەرىندە قالماي, ادامزاتتىڭ رۋحاني بيىگىنە كوتەرىلەتىن تۇلعا, دەدى گۇلشارا ابدىقالىقوۆا. سونداي-اق, مەملەكەتتىك حاتشى اباي شىعارماشىلىعىنا الەمدىك ادەبيەت وكىلدەرى اسەر ەتكەنىن, حاكىمنىڭ انتيك ءداۋىرى وكىلدەرى مەن شىعىس شايىرلارى, باتىس ەۋروپا جانە ورىس ادەبيەتىمەن تانىس بولىپ قانا قويماي, ولاردىڭ وزىق شىعارمالارىن جوعارى دەڭگەيدە اۋدارعانىن اتاپ ءوتتى. سالتاناتتى جيىندا ءوڭىر باسشىسى دانيال احمەتوۆ بۇل تويدىڭ شەجىرەلى شىعىس ءوڭىرى ءۇشىن ۇلى مەرەكە ەكەنىن ايتتى.
سالتاناتتى جيىندا ءوڭىر باسشىسى دانيال احمەتوۆ بۇل تويدىڭ شەجىرەلى شىعىس ءوڭىرى ءۇشىن ۇلى مەرەكە ەكەنىن ايتتى. ەلباسى نۇرسۇلتان نازارباەۆ «اباي الەمى – ءبىزدى جەتى تۇندە اداستىرمايتىن – تەمىرقازىق. سوعان قاراپ تىرلىگىمىزدىڭ دۇرىس-بۇرىسىن ساراپتاي الامىز», دەپ ايرىقشا باعا بەرگەن. ۋاقىت وتكەن سايىن بۇگىنگى ۇرپاق «اتاڭنىڭ بالاسى بولما, ادامنىڭ بالاسى بول» دەپ وتكەن ابايدىڭ دارالىعى مەن دانالىعىن تەرەڭ سەزىنىپ كەلەدى. بۇگىن ول «قالىڭ ەلى قازاعىنا» عانا ەمەس, بارشا الەمگە قادىرلى, ءار ءسوزى اقىل مەن ناقىلعا تولى ادامزاتتىڭ ابايىنا اينالدى! اباي شىعارمالارى ماڭىزى مەن ءمانىن ەشقاشان جوعالتپايدى. بۇل بۇگىنگى قوعام ءۇشىن دە اسىل قازىنا, اينىماس قاعيدات. بۇل رەتتە ول الەم حالىقتارىنىڭ رۋحاني ومىرىندە ەرەكشە ورىن العان پۋشكين, گەتە, تاگور, ناۋاي سىندى ۇلىلاردىڭ قاتارىندا. اباي – ۇلتىن بار بولمىسىمەن ءسۇيىپ وتكەن حالقىنىڭ شىنايى پەرزەنتى. زامانىنان وزىق تۋعان دانىشپان, بار قازاقتى بەرەكە مەن بىرلىككە, وزگەنىڭ ءتىلىن ءبىلىپ, ونەرىن ۇيرەنۋگە, دوستىقتى تۋ ەتۋگە, تالماي ەڭبەك ەتۋگە شاقىردى. اباي مۇراسى – كەلەشەگى كەمەل ەل ءۇشىن تاعىلىم الارلىق رۋحاني كۇش, قايرات بەرەر اسىل قازىنا. ۇلى بابامىزدى ۇلىقتاۋ, ۇرپاققا قالدىرعان ۇلاعاتىن ۇمىتپاۋ – ءبىز ءۇشىن قاسيەتتى پارىز, دەدى د.احمەتوۆ. جيىندا سونىمەن بىرگە تۇركيادان كەلگەن اباي ولەڭدەرىنىڭ اۋدارماشىسى كيبار زافەر, تاتارستاننىڭ ەڭبەك سىڭىرگەن عىلىمي قىزمەتكەرى حاتيپ ميننەگۋلوۆ, ەلىمىزدىڭ پارلامەنتى سەناتىنىڭ دەپۋتاتى, ابايتانۋشى عاريفوللا ەسىم اباي مۇراسىنا قاتىستى ءوز ويلارىن تارقاتسا, مادەنيەت جانە سپورت ءمينيسترى ا.مۇحامەدي ۇلىنىڭ قۇتتىقتاۋ حاتىن ورىنباسارى مارات ءازىلحانوۆ, قازاقستان جازۋشىلار وداعىنىڭ توراعاسى ن.ءورازاليننىڭ قۇتتىقتاۋ حاتىن اقىن, مەملەكەتتىك سىيلىقتىڭ لاۋرەاتى ۇلىقبەك ەسداۋلەت وقىپ بەردى. كەش سوڭى مەرەكەلىك كونتسەرتكە ۇلاستى. مەملەكەتتىك حاتشى سەمەي قالاسىنا ساپارى بارىسىندا «جۇلدىز-ارداق» جەكەمەنشىك بالاباقشاسىنىڭ قىزمەتىمەن تانىستى. مۇندا زاماناۋي يننوۆاتسيالىق ءادىس بويىنشا 350 بالا تاربيەلەنەدى. گ.ابدىقالىقوۆاعا اباي شىعارمالارىنىڭ جەلىسى بويىنشا سالىنعان سۋرەتتەر, سونداي-اق, بالالاردىڭ اقىننىڭ «قارا سوزدەرىن» وقۋىمەن ەرەكشەلەنگەن كونتسەرتى ۇسىنىلدى. ەلدەگى ءىرى مەديتسينالىق راديولوگيالىق كلاستەر قۇرامىنا كىرگەن «وڭىرلىك ونكولوگيالىق ديسپانسەرى» يادرولىق مەديتسينا بىرەگەي ورتالىعىندا بولعان كەزىندە مەملەكەتتىك حاتشىعا جاڭا مەديتسينالىق قۇرال-جابدىقتار كورسەتىلىپ, ءوڭىر حالقىنا ونكولوگيالىق كومەك كورسەتۋدىڭ كەلەشەگى جايلى ايتىلدى. يادرولىق مەديتسينا ورتالىعى – يادرولىق تەحنولوگيانى بەيبىت ماقساتتا پايدالانۋدىڭ ايقىن مىسالى بولىپ تابىلادى. سونىمەن بىرگە گ.ابدىقالىقوۆا 1985 جىلى ىرگەسى قالانعان نەۆزوروۆتار اۋلەتى اتىنداعى بەينەلەۋ ونەرى مۇراجايىندا بولدى. قازىرگى كەزدە مۇراجاي ەلىمىزدەگى ەڭ ءىرى كوركەمسۋرەت قۇندىلىقتارى جيناقتارىنىڭ ءبىرى بولىپ تابىلادى. مۇراجايدىڭ قورىندا 3600-دەن استام ونەر تۋىندىسى ساقتالىپ, قازاقستانداعى ءارتۇرلى داۋىرلەردەگى ورىس جانە شەتەلدىك كوركەمسۋرەت كوللەكتسيالارى جينالعان. بۇدان بولەك ورتالىق ازيا, رەسەي, گرۋزيا, بەلورۋسسيا ەلدەرىنىڭ ونەر تۋىندىلارى قويىلعان. گ.ابدىقالىقوۆا, سونداي-اق, 1940 جىلى قۇرىلعان «جيدەباي-ءبورىلى» مەملەكەتتىك تاريحي-مادەني قورىعى قۇرامىنداعى اباي مۇراجايىندا بولدى. مۇراجاي قورلارىندا اراب, پارسى جانە تۇركى تىلىندەگى 500-دەن استام كونە كىتاپ ساقتالعان. 2014 جىلى مۇراجاي حالىقارالىق ءىسوم مۇراجاي قوعامداستىعىنا كىرگەن. مەملەكەتتىك حاتشى گ.ابدىقالىقوۆا ساپار قورىتىندىلارى بويىنشا مەملەكەتتىك مەكەمەلەرگە بىرقاتار تاپسىرمالار جۇكتەدى.
دۋمان اناش, «ەگەمەن قازاقستان».
سەمەي.