تاڭ اتپاي: «تيتوۆتا» تۇرعىن ءۇيدىڭ قابىرعاسى قۇلادى. ءبىر ادامدى باسىپ قالىپتى», دەگەن اقپارات جەلدەي ەستى. «تيتوۆ» دەگەنىڭىز قىزىلوردا قالاسىنىڭ ءبىر شاعىن اۋدانى. وندا ەسكى ۇيلەردىڭ بارى دا راس ەدى. ونىڭ ۇستىنە وسىدان بىرەر كۇن بۇرىن اتالعان شاعىن اۋدانداعى №16ا ءۇيدىڭ تۇرعىندارى وبلىس اكىمىنە كىرىپ, باسپانالارىنىڭ جاعدايىن دا ايتقان. قۇلاعان دا وسى ءۇي كورىنەدى.
بۇل ءۇي 1971 جىلى سالىنىپتى. العاشىندا تۇرعىندارعا جاتاقحانا رەتىندە بەرىلگەن 5 قاباتتى عيماراتتا 123 پاتەر بار ەكەن. ءوزى سالىنعاننان باستاپ جوندەۋ كورمەگەن. وسىدان ەكى جىل بۇرىن جۇرگىزىلگەن تەكسەرۋ بارىسىندا تۇرعىن ءۇي اپاتتى دەپ تانىلعان. دەگەنمەن, قابىرعالارىنىڭ ءالى دە جارامدى ەكەنى ايتىلعان. قىسقاسى, «قابىرعا وپىرىلىپ قالىپتى» دەگەنگە سەنەتىندەي-اق جاعداي.
تۇرعىن ۇيدە كەلەڭسىز جاعدايدىڭ ورىن العانى راس ەكەن. ءۇيدىڭ توبەسىنە ادامدار شىققان. سول كەزدە توبەدەن كىرپىش قۇلاعان. وسىنىڭ سالدارىنان ەكى قابات ايەلدىڭ دەنساۋلىعىنا قاۋىپ تونگەن. كۋاگەرلەردىڭ ايتۋىنشا, توبەدەن قۇلاعان زاتتىڭ ءبىرى ايەلدىڭ ۇستىنە تۇسسە كەرەك. وقيعا ورنىنا پوليتسيا, جەدەل جاردەم قىزمەتكەرلەرى دەرەۋ جەتكەن. توتەنشە جاعدايلار جونىندەگى قىزمەتتىڭ ادامدارى دا بارعان. ءۇش ادام اۋرۋحاناعا جەتكىزىلگەن. دارىگەرلەر ولارعا ءتيىستى كومەك كورسەتىپ, دەنساۋلىقتارىنا ەشقانداي قاۋىپتىڭ جوق ەكەنىن ايتادى. ال اياعى اۋىر كەلىنشەك «انا مەن بالا» ورتالىعىنا جەتكىزىلگەن. ءتيىستى مامانداردىڭ قاراۋىنا بەرىلگەن. شىندىعىندا, «تيتوۆ» شاعىن اۋدانىندا بىرنەشە اپاتتى ءۇي بار. اپاتتى جاعدايداعى ءۇيدىڭ تۇرعىندارى ءۇشىن جاڭادان باسپانا سالىنىپ تا جاتىر. ونىڭ العاشقىسى پايدالانۋعا بەرىلدى. وندا 24 وتباسى ورنالاستى. ال كەلەر جىلدىڭ ناۋرىز-ءساۋىر ايلارىنا قاراي 60 پاتەرلى تاعى ءبىر تۇرعىن ءۇيدى ەل يگىلىگىنە بەرۋ جوسپارلانعان. 2016 جىلدىڭ سوڭىنا قاراي اپاتتى جاعدايداعى باسپانانىڭ تۇرعىندارى ءۇشىن 100 پاتەرلى تۇرعىن ءۇي سالىنىپ بىتەدى. قىسقاسى, ايماق باسشىلىعى اتالعان جاعدايدان جان-جاقتى حاباردار جانە ونى شەشۋدىڭ جولدارىن الدەقاشان باستاپ كەتكەن. تەك مەرزىمى كەلمەي جاتىر.
ەرجان بايتىلەس, «ەگەمەن قازاقستان».
قىزىلوردا.