الامانداعى ابىروي اداي جىلقىلارى رەسەيدە تاعى توپ جاردى

بۇعان دەيىن دە حالىقارالىق بايگەلەردە توپ جارىپ, ءدۇبىرىن ءدۇيىم جۇرتقا تانىتقان قازاقتىڭ اداي جىلقىلارى رەسەيدە وتكەن الامان بايگەدە كوك بايراقتى قازاقستاننىڭ اتى مەن ابىرويىن اسقاقتاتىپ ورالدى. بيىلعى 24-26 شىلدە كۇندەرى رەسەيدىڭ ريازان وبلىسىنداعى سپاسسك-ريازانسكي قالاسىندا حالىق­ارالىق ات بايگەسى وتكەن بولاتىن. بۇل قازاقستان, رەسەي, گەرمانيا, فينليانديا مەملەكەتتەرىنەن ورەن جۇيرىكتەر تاڭدالىپ, ءارتۇرلى تەك پەن تۇقىمنان وربىگەن جۇيرىكتەردى ءوزارا سىنعا سالعان دودا بولدى. الىس قاشىقتىققا شابۋدى ماقسات ەتكەن ايتۋلى جارىس­قا قازاقستاننىڭ اتىنان ماڭعىس­تاۋدان اپارىلعان بەس اداي جىل­قىسى قاتىسىپ, بەسەۋى دە ولجا سا­لىپ ورالدى. 80 شاقىرىمدىق قاشىقتىقتا انەس ەتىرەكوۆ اتتى شاباندوز بالانىڭ تاقىمىنا تيگەن «بۋمەر» اتتى سايگ ۇلىك ءبىرىنشى ورىن الدى. بۇل تۇلپاردىڭ العاشقى الامانى ەكەن. 120 شاقىرىمدىق قاشىقتىقتا «جارى» اتتى جۇيرىك الدىنا قارا سالعان جوق. «جارى» بۇعان دەيىن دە ات جارىستارىندا ىسىلعان, سپاسسك-ريازانسكي قالاسىندا ال­دىڭعى جىلدارى وتكەن سايىس­تاردا جۇلدە الىپ, بىلتىر فرانتسيادا سىناقتان وتكەن تۇلپار. ايتا كەتەيىك, «جارى» دا, «بۋمەر» دە قىزان اۋى­لىنىڭ تۇرعىنى, اتبەگى بۇعاباي مۇقىرباەۆتىڭ جۇيرىكتەرى. 120 شاقىرىمدىق الاماندا «جارىنىڭ» سوڭىنا الا بەرە, ياعني ەكىنشى ورىندا ناتاليا دولگيحتىڭ «جەزكيىك» اتتى اداي تۇقىمدى جىلقىسى مارە سىزىعىن كەسىپ وتسە, اراعا ءبىر-ەكى بايگە اتىن سالىپ, بەسىنشى-التىنشى ورىنداردا تاعى دا اداي جىلقىلارى – ازات قويشيەۆتىڭ «ويلىسى» مەن ءابىش ەتىرەكوۆتىڭ «كوكپارى» شاۋى­پ وتە شىقتى. داريا پوپوۆانىڭ وسى ات تۇقىمىنان شىققان «چە­كيست» تۇلپارى 80 شاقىرىمدىق قاشىق­تىقتى ءتورتىنشى ورىنمەن اياقتادى. سىرت كەلبەتى كوزگە قوراشتاۋ كورىنىپ, سايى­س باستالار الدىندا باسەكەلەستەر تاراپىنان: «بۋمەر, زناچيت ۋمەر», دەگەندەي ءتۇرلى جان جۇدەتەر «باعالاۋلار» ەستىگەن قازاقتىڭ اداي جىلقىلارى وزدەرىن الامان الاڭىندا تانىتىپ, شەتەلدىكتەردىڭ جۇيرىكتەرىنە شاڭ قاپتىرىپ ورالدى. اتبەگىلەردىڭ ايتۋىنشا, الگى «باعا بەرۋ­شىلەر» الامان سوڭىندا تاڭدانىستارىن جاسىرا الماي قازاقستاننان بارعان جۇيرىكتەردىڭ ماڭىندا اينالسوقتاپ كوپ ءجۇرىپتى. گۇلايىم شىنتەمىرقىزى, «ەگەمەن قازاقستان». ماڭعىستاۋ وبلىسى. ––––––––––––––––– سۋرەتتى تۇسىرگەن بەرىك داۋەنوۆ.