بالا دا جاس شىبىق سەكىلدى. جاس شىبىقتى قالاي يسە سولاي وسەتىندىگى سياقتى, ءار بالا الدىمەن وتباسىنداعى تاربيەمەن جەتىلەدى. ارينە, قورشاعان ورتا, قوعامداعى دامۋ ءۇردىسىنىڭ دە اسەرى تيەتىنى داۋسىز. دەگەنمەن, اتا-انا باقىلاۋىندا بولعان, وتباسىلىق قۇندىلىقتارمەن تاربيەلەنگەن جاس ۇرپاقتىڭ ومىردەن ءوز ورنىن تاباتىنى دالەلدەۋدى قاجەت ەتپەيتىن شىندىق ەكەنىنە ەشكىم داۋ ايتا قويماس. جاس ۇرپاقتىڭ ءبىلىمدى, سانالى بولۋىنا ءبىلىم وردالارىنداعى ۇستازدار تاربيەسىنىڭ دە ىقپالى زور. وسىلاي دەسەك تە, بۇگىنگى جاس بۋىننىڭ اراسىندا مەزگىلسىز ۋاقىتتا كوشە كەزەتىن, ءتىپتى بۇزاقىلىق جاساۋعا, ىشىمدىك ىشۋگە بەيىم تۇراتىنى دا جوق ەمەس. بۇعاناسى قاتا قويماعان جاسوسپىرىمدەردىڭ مۇنداي جۇگەنسىز ارەكەتكە بوي الدىرۋىنىڭ سەبەبى نەدە؟
گازەت ءتىلشىسىنىڭ وسى ساۋالىنا وراي وبلىستىق ءبىلىم باسقارماسى قوسىمشا ءبىلىم بەرۋ جانە تاربيە جۇمىسى ءبولىمىنىڭ باسشىسى الماگۇل قايىرليەۆا «بۇل الدىمەن, اتا-انانىڭ بالا تاربيەلەۋدەگى مىندەتىن ورىنداماۋىنان تۋىندايدى» دەگەن پىكىرىمەن ءبولىستى. وعان دالەل رەتىندە كەلتىرگەن دەرەكتەرىن سارالار بولساق, جىل باسىنان بەرگى التى ايدا قۇقىق قورعاۋ ورگاندارىمەن بىرلەسە جۇرگىزىلگەن رەيد بارىسىندا كامەلەتكە تولماعان 2000-نان استام ءجاسوسپىرىمنىڭ ىشكى ىستەر بولىمىنە اكەلىنگەنىن ايتۋعا بولادى. ولاردىڭ كوپشىلىگىنىڭ ءتۇرلى قۇقىق بۇزۋشىلىق جاساعانى انىقتالىپ وتىر. كامەلەتكە تولماسا دا قوعامدىق ورىندارعا ماساڭ كۇيدە كەلۋى, سول سياقتى ولاردىڭ الكوگولدىك ىشىمدىكتەردى ىشۋىنە قاتىستى 24 دەرەك تىركەلىپ, بۇلاردىڭ اتا-انالارى اكىمشىلىك جاۋاپكەرشىلىككە تارتىلىپتى. وبلىس بويىنشا ىشكى ىستەر ورگاندارىنىڭ پروفيلاكتيكالىق باقىلاۋ ەسەبىندە 400-دەن استام كامەلەتكە تولماعان جانە 227 قولايسىز وتباسى ەسەپكە الىنىپتى. كامەلەتكە تولماعانداردى بەيىمدەۋ ورتالىعىنا 84 ءجاسوسپىرىم ورنالاستىرىلىپتى. وسى دەرەكتەردىڭ وزىنەن بالا تاربيەسىنە جاۋاپتى اتا-انا تاراپىنان باقىلاۋدىڭ السىرەگەنى بايقالادى. ءتىپتى, كەي اتا-انالار تاڭعى 6-عا دەيىن كامەلەتكە تولماعان بالاسىنىڭ قايدا جۇرگەنىنەن بەيحابار بولاتىن سەكىلدى. ايتپەسە, قۇقىق قورعاۋ ورگاندارى 1372 كامەلەتكە تولماعانداردىڭ زاڭدى وكىلدەرىنىڭ ەرتىپ ءجۇرۋىنسىز تۇرعىن-جايدان تىس جەردە ساعات 23-تەن تاڭعى 6-عا دەيىن بولعاندىعىن انىقتاماس ەدى. بۇعان قوسا 66 ءجاسوسپىرىم دە تۇنگى مەزگىلدە, ياعني, ساعات 22-دەن تاڭعى 6-عا دەيىن ويىن-ساۋىق مەكەمەلەرىندە كوڭىل كوتەرمەس ەدى. وسىنداي جاسوسپىرىمدەر ەڭبەكتى قاناۋ پروبلەماسىنا ۇشىراپ جۇرمەي مە؟ كوكەيدەگى وسى ساۋالىمىزدى الماگۇل قايىرليەۆاعا قويعان ەدىك. ونىڭ پىكىرىنشە, 1-12 ماۋسىم ارالىعىندا «بالا ەڭبەگىن قاناۋعا قارسى 12 كۇن» تاقىرىبىندا ءتۇرلى شارالار ءوتىپتى. «وقۋشىلار مەن اتا-انالار اراسىندا بالالاردىڭ قۇقىقتىق ساۋاتتىلىعىن ارتتىرۋ» جانە «بالا ەڭبەگىنىڭ ەڭ ناشار تۇرلەرى, پروبلەمالارى جانە بالالاردى ساتۋدىڭ الدىن الۋ» تاقىرىپتارىندا ۇيىمداستىرىلعان ونلاين رەجيمىندە ساباققا وقۋشىلار, اتا-انالار مەن پەداگوگتار قاتىستىرىلعان. – وبلىستاعى ءبىلىم بەرۋ ۇيىمدارى, ىشكى ىستەر ءبولىمى جانە قوعامدىق بىرلەستىكتەر وكىلدەرىنىڭ قاتىسۋىمەن رەيدتەر ۇيىمداستىرىلدى. رەيد كەزىندە قوعامدىق جانە كوڭىل كوتەرۋ ورىندارى باقىلاۋعا الىنىپ, بالا ەڭبەگىن قاناۋعا بايلانىستى قۇقىق بۇزۋشىلىقتار انىقتالعان جوق. سونىمەن قاتار, كامەلەتكە تولماعانداردىڭ قۇقىقتارىن قورعاۋ جانە ولاردىڭ ىستەرى جونىندەگى كوميسسياعا 75 قۇجات جولداندى, – دەيدى الماگۇل قايىرليەۆا.
جولداسبەك شوپەعۇل, «ەگەمەن قازاقستان».
اتىراۋ.
سۋرەت: http://press.mediaovd.kz/