استانا. 6 تامىز. وسى جىلدىڭ 1 شىلدەسىندە استانادا Wi-fi Bus Astana پيلوتتى جوباسى ىسكە قوسىلعان ەدى. سوعان وراي قالانىڭ قوعامدىق كولىكتەرى تەگىن ينتەرنەتپەن قامتاماسىز ەتىلدى. استانا قالاسى اكىمدىگىمەن بىرلەسە جۇزەگە اسىرىلعان جوبا شەڭبەرىندە بارلىق قالا اۆتوبۋستارى, ياعني, 550 قوعامدىق كولىك قامتىلدى. بۇل تۋرالى استانا قالاسى اكىمدىگىنىڭ رەسمي سايتى astana.gov.kz حابارلادى.
Wi-fi Bus Astana جوباسىنىڭ باستى ماقساتى – جولاۋشىلارعا قولايلى جاعداي جاساۋ جانە ولاردى قاجەتتى اقپاراتپەن قامتۋ. كەز-كەلگەن قوعامدىق كولىك پايدالانۋشىسى Wi-fi ارقىلى كەرەكتى مارشرۋت پەن ايالدامالار تۋرالى اقپاراتتى الا الادى.
جوبا ىسكە قوسىلعان 30 كۇن ىشىندە Wifi Bus Astana قىزمەتىن پايدالانۋشىلاردىڭ سانى 1 ميلليون 26 مىڭ ادامدى قۇرادى. تاۋلىگىنە, ورتاشا ەسەپپەن, ءبىر اۆتوبۋستا 114 قولدانۋشى Wifi Bus Astana قىزمەتىنە جۇگىنەدى.
وتكەن ايدا ءبىر عانا اۆتوبۋستىڭ جولاۋشىلارى 2 565 گيگابايت اقپاراتتى پايدالانعان. جۇرگىزىلگەن زەرتتەۋلەر ناتيجەسىندە جولاۋشىلاردىڭ كوپشىلىگى تەگىن ينتەرنەتتى مۋزىكا تىڭداپ, الەۋمەتتىك جەلىلەر ءۇشىن قولداناتىنى بەلگىلى بولدى.
ەلامان قوڭىر.
دەرەك, سۋرەت: astana.gov.kz.