كەشە چەمپيوندار ليگاسى ىرىكتەۋ ءتۋرنيرىنىڭ ءۇشىنشى كەزەڭىندە «استانا» فينليانديانىڭ حيك كومانداسىن قابىلدادى. «استانا-ارەنا» سپورت كەشەنىندە وتكەن كەزدەسۋدە الاڭ يەلەرى 4:3 ەسەبىمەن جەڭىسكە جەتىپ, ىرىكتەۋ ءتۋرنيرىنىڭ پلەي-وفف باسەكەسىنە جولداما الدى.
ەلوردالىقتار ويىندى وتە سۇرەڭسىز باستادى. ويىنشىلاردىڭ دەنەسى ءالى قىزىپ ۇلگەرمەگەن تۇستا قوناقتار ەسەپ اشىپ كەتتى. ماتچتىڭ 4-مينۋتىندا حيك-ءتىڭ شابۋىلشىسى وسمان دجاللوۋ مەرگەندىگىمەن كوزگە ءتۇستى.
ءوز قاقپالارىنا دوپ جىبەرىپ العاننان كەيىن استانالىقتار جيناقىلىق تانىتقانداي بولعان. الايدا, ماتچتىڭ 41-مينۋتىندا تاعى دا ورەسكەل قاتەلىك جىبەرىپ, قارسىلاستاردىڭ ەكىنشى رەت ءبىزدىڭ قاقپانى ءدال كوزدەۋىنە جول بەرىپ قويدى. اتاپ ايتقاندا, حيك ويىنشىلارىنىڭ ءبىرى ءبىزدىڭ ايىپ الاڭعا دوپتى اۋەلەتە اسىردى. پاستىڭ تىم جوعارى بولعانىن ەسكەرگەن الاڭ يەلەرى, سونىڭ ىشىندە قاقپاشى نەناد ەريچ سوڭىنا دەيىن ويناماي, توقتاپ قالدى. ال سوڭعى ساتكە دەيىن شابۋىلداعان دجاللوۋ تۋرا الاڭ سىزىعىنىڭ بويىنان دوپتى كەيىن قايتارىپ قانا قويماي, ءوز ارىپتەسىنە باسىمەن تاماشا پاس شىعارىپ بەردى. وزىنە بەرىلگەن مۇمكىندىكتى ءمۇلت جىبەرمەگەن دجيدەن باا ەسەپتى ەسەلەدى.
ۇزىلىسكە ءبىر مينۋت قالعان كەزدە «استانا» شابۋىلشىسى پاتريك تۆۋماسي ايىپ الاڭىنىڭ سىرتىنان سوققى جاساپ, ەسەپ ايىرماسىن قىسقارتتى.
ەكىنشى تايمدى الاڭ يەلەرى وتە بەلسەندى باستادى. 46-مينۋتتا حيك ويىنشىلارىنىڭ ءبىرى ءوز ايىپ الاڭىندا قولىمەن ويناپ ءتارتىپ بۇزدى. كەزدەسۋدىڭ باس تورەشىسى الون ەفەت ويلانباستان 11 مەترلىك نۇكتەنى كورسەتىپ, پەنالتي بەلگىلەدى. بۇل رەتتە تاماشا سوققىسىمەن كوزگە تۇسكەن روحەر كانياس تارازى باسىن تەڭەستىرىپ كەتتى. ارادا 9 مينۋت ۋاقىت وتكەندە دميتري شومكو وتە ادەمى سوعىلعان گولدىڭ اۆتورى اتانىپ, «استانانى» العا شىعاردى.
كەزدەسۋدىڭ 70-مينۋتىندا تۆۋماسي الاڭنان قۋىلىپ, ءبىزدىڭ كوماندا قالعان ۋاقىتتا 10 ويىنشىمەن ويناۋعا ءماجبۇر بولدى. ءبىر فۋتبولشىسى ارتىق قوناقتار باسىمدىققا يە بولىپ, شابۋىل شەبىن كۇشەيتتى. ماتچتىڭ 86-مينۋتىندا تورەشى ءبىزدىڭ قاقپاعا پەنالتي بەلگىلەدى. بۇل جولى ەرفان زەنەلي 11 مەترلىكتى ءدال ورىندادى.
دەگەنمەن, العاشقى تايمداعى قاتەلىكتەن ناتيجە شىعارعان استانالىقتار 93-مينۋتتا ءتورتىنشى دوپتى سوعىپ, كلۋب تاريحىنداعى ماڭىزدى جەڭىسكە قول جەتكىزدى.
بۇل جەڭىسىنەن كەيىن «استانا» كەم دەگەندە ەۋروپا ليگاسىنىڭ توپتىق كەزەڭىنە جولداما العانىن ايتا كەتەيىك.
ەلامان قوڭىر,
«ەگەمەن قازاقستان».