بيىل وڭتۇستىكتە كۇن ەرەكشە ىستىق بولدى. اپتاپ جالىن جەر بەتىندەگى تىرشىلىك يەسىن الىپ تاباعا سالىپ قۋىرىپ جاتقاندا جىلاندار دا دالاعا شىعىپ كەتكەن. ءوزىمىز دە كورگەنبىز. جارقىراپ جولدان ءوتىپ بارا جاتقاندا ماشينانىڭ دوڭگەلەگى استىندا جانشىلىپ قالماۋىن ابايلاعانبىز.
اسا ءبىر قاتىگەزدەۋ ادام بولماسا كوپشىلىك جىلاندى ولتىرە قويمايدى.
سونداي جىلانداردىڭ ءبىرى قالاداعى ءۇيدىڭ ىشىنە كىرىپ كەتكەن. «قۇز باسىنا ورمەلەپ جىلان دا شىعادى» دەگەندەي, اق باۋىر جىلان توڭازاتقىشتىڭ ۇستىنە ورمەلەپ شىعىپ, تور ىشىندەگى توتىقۇسقا تاپ بەرگەندە عانا ءۇي يەلەرى بايقاپ تىلدەرى بايلانىپ قالا جازدايدى. ابدىراپ قالعان ولاردىڭ ءبىرى وبلىستىق توتەنشە جاعدايلار دەپارتامەنتىنىڭ كەزەكشىسىنە تەلەفون شالادى. ول ءوز بەتتەرىمەن جىلاندى ولتىرمەۋگە كەڭەس بەرگەنشە الگى سابازىڭ توتىقۇستى قارنىنا توعىتىپ-اق جىبەرگەن. قۇتقارۋشىلار كەلگەندە كۇتپەگەن وقيعادان ەستەرى شىققان ءۇي يەلەرى سويلەۋگە تىلدەرى يكەمگە كەلمەي, توڭازىتقىش ۇستىندەگى توردى نۇسقاي بەرىپتى. بۇل كەزدە توتىقۇسقا تويىنعان جىلان تور تەسىگىنەن شىعا الماي جانتالاسىپ جاتقان.
قۇتقارۋشىلار كەشە عانا سايراپ تۇرعان, مۇنداي پالەكەت باسىن جۇتادى دەپ ءۇش ۇيىقتاسا تۇسىنە كىرمەگەن توتىقۇستى جەپ قويعان جىلاندى ارناۋلى قۇرالدارىنىڭ كومەگىمەن ۇستاپ اكەتتى.
توتىقۇس تۇرعان تور بوس. ءۇي يەلەرى ەندى ءوز-وزدەرىنە كەلىپ جاتىر.
شىمكەنتتە جىلان كوبەيدى. ماماندار مۇنى كۇننىڭ ىسىپ كەتۋىمەن تۇسىندىرەدى. ولاردىڭ تۇرعىن ۇيگە كىرىپ كەتۋى ءبىرىنشى وقيعا ەمەس ەكەن.
باقتيار تايجان,
«ەگەمەن قازاقستان».
شىمكەنت.