ۇستىمىزدەگى جىلدىڭ 26 ساۋىرىنە بەلگىلەنگەن قازاقستان رەسپۋبليكاسى پرەزيدەنتىنىڭ سايلاۋىنا بايقاۋ جۇرگىزەتىن رەسپۋبليكالىق قوعامدىق كوميسسيانىڭ وبلىستىق فيليالى ءوز جۇمىسىن باستادى. وسىعان وراي, وبلىستىق «قازاقستان – اقتوبە» تەلەارناسىنىڭ ءماجىلىس زالىندا قوعامدىق كوميسسيانىڭ اشىلۋىنا ارنالعان بريفينگ وتكىزىلدى.
ونىڭ قۇرامىنا بەلگىلى عالىمدار, قوعام قايراتكەرلەرى, باق پەن جاستار ۇيىمدارىنىڭ وكىلدەرى كىردى. ولار ەلەكتورالدى ناۋقاننىڭ اشىق ءارى شىنايى وتۋىنە باقىلاۋ جۇرگىزەتىن بولادى. بريفينگتە كوميسسيا ءتوراعاسى, ق.جۇبانوۆ اتىنداعى اقتوبە وڭىرلىك مەملەكەتتىك ۋنيۆەرسيتەتىنىڭ ەكونوميكا جانە قۇقىق ينستيتۋتىنىڭ ديرەكتورى حالەل قۇسايىنوۆ بۇل تۋرالى جان-جاقتى باياندادى.
ول كوميسسيا جۇمىسىنىڭ باستى باعىتى وبلىستا سايلاۋ تۋرالى زاڭنىڭ ساقتالۋىنا كانديداتتاردىڭ سايلاۋالدى شتابتارىمەن, باق جانە سايلاۋ كوميسسيالارىمەن باقىلاۋ جۇرگىزۋ ەكەنىن تىلگە تيەك ەتە كەلىپ, كوميسسيا مۇشەلەرى سايلاۋ ناۋقانىنا قاتىسۋشى بارلىق كانديداتتارعا بىردەي جاعداي جاسالۋىن قامتاماسىز ەتەتىنىن, سايلاۋ ۇدەرىسىن بۇزۋدىڭ كەز كەلگەن ارەكەتتەرىنىڭ جولىن كەسىپ, ولاردى ۋاقتىلى تۇزەتىپ, اكىمشىلىك رەسۋرستار تاراپىنان ورىن الۋى مۇمكىن ارەكەتتەردى بولدىرماۋ بويىنشا جۇمىستار جاسايتىنىن جەتكىزدى.
قوعامدىق كوميسسيا مۇشەلەرىنىڭ باسىم بولىگىنىڭ اتالعان سالادا تاجىريبەسى بار, ولار 2011 جىلى وتكىزىلگەن پرەزيدەنتتىك سايلاۋ مەن 2012 جىلعى پارلامەنتتىك سايلاۋعا بايقاۋشى ەسەبىندە بەلسەندى قاتىسقان ازاماتتار.
ساتىبالدى ءساۋىرباي,
«ەگەمەن قازاقستان».
اقتوبە وبلىسى.