مەملەكەتتىك حاتشى گۇلشارا ابدىقالىقوۆا شىعىس وڭىرىنە ەكى كۇندىك جۇمىس ساپارىمەن كەلدى. مەملەكەتتىك حاتشى ساپارىنىڭ العاشقى كۇنىن قازاقستان كونستيتۋتسياسىنىڭ 20 جىلدىعىنا ارنالعان «100 ناقتى قادام اياسىنداعى قازاقستان حالقىنىڭ بىرلىگى مەن بىرتەكتىلىگى» اتتى عىلىمي-تاجىريبەلىك كونفەرەنتسياعا قاتىسۋمەن جانە وبلىس ورتالىعىنداعى بىرقاتار الەۋمەتتىك نىساندارمەن تانىسۋدان باستادى. جيىندى ءوڭىر باسشىسى دانيال احمەتوۆ اشىپ, 2015 جىلدىڭ مەملەكەت تاريحىندا ورىن الاتىن ايرىقشا جىل ەكەنىن, ەلىمىزدە بىرنەشە اتاۋلى مەرەيتويلار اتالىپ وتەتىنىن, بىرەگەي بەيبىتشىلىك مادەنيەتى مەن رۋحاني كەلىسىمگە نەگىزدەلگەن ماڭىزدى ساياسي رەفورمالار ەنگىزىلىپ جاتقانىن ايتتى.
– كونستيتۋتسيا – كوپۇلتتى مەملەكەتىمىزدەگى ازاماتتاردىڭ قۇقىق تەڭدىگىن قامتاماسىز ەتۋدىڭ مىزعىماس كەپىلى. ەلباسى تاڭداپ بەرگەن بىرلىك جولى – ءبىزدىڭ بولاشاققا قۇيعان نەگىزگى ينۆەستيتسيامىز. 100-دەن استام ەتنوس وكىلدەرى تۇراتىن وبلىسىمىز ەلباسى نۇسقاعان جاڭا مىندەتتەردى ىسكە اسىرۋ ءۇشىن بىرتەكتى قوعام رەتىندە جۇمىلۋعا دايىن, – دەدى وبلىس اكىمى.
مەملەكەتتىك حاتشى شىعىسقازاقستاندىقتاردىڭ ەلباسىنىڭ قوعامدىق كەلىسىم مەن ۇلتتىق بىرتۇتاستىق سالاسىنداعى ساياساتىن جۇزەگە اسىرۋدىڭ جارقىن ۇلگىسىن كورسەتىپ وتىرعاندىعىن ەرەكشە اتاپ ءوتتى. – مەملەكەت باسشىسى باستاما ەتىپ كوتەرگەن 5 ينستيتۋتتىق رەفورما قازاقستاننىڭ جاھاندىق, وڭىرلىك جانە ىشكى سىن-قاتەرلەرگە دەر كەزىندەگى كەشەندى جاۋابى. جان-جاقتى رەفورمالار ۇلتتى ينكليۋزيۆتى, كەڭ اۋقىمدا دامىتۋعا باعىتتالعان. پرەزيدەنتىمىز ايتقانداي, ۇلى رەفورمالاردى باستاي وتىرىپ, ءبىز «ماڭگىلىك ەلگە» جول سالامىز. بۇل ءبىزدىڭ مەملەكەتتىك قۇرىلىستىڭ ءۇشىنشى ساتىسى بولماق, – دەدى گۇلشارا ابدىقالىقوۆا. مەملەكەتتىك حاتشىنىڭ ايتۋىنشا, ينستيتۋتتىق رەفورمالاردىڭ نەگىزگى ماقساتى – 2050 جىلعا قاراي قازاقستاندى الەمنىڭ دامىعان 30 ەلىنىڭ قاتارىنا قوسۋعا باعىتتالعان. قازاقستان حالقى اسسامبلەياسى «بىرلىك پەن بىرتەكتىلىك» باعىتىنداعى رەفورمانى جۇزەگە اسىرۋدا نەگىزگى رولگە يە. ءبىزدىڭ بىرەگەي ءبىرتەكتىلىگىمىز «ەلباسى, حالىق, «ماڭگىلىك ەل» ۇعىمىنا نەگىزدەلەدى. قوعامدىق كەلىسىم مودەلى مەن بىرتەكتىلىكتى نىعايتۋداعى جەتەكشى ءرولدى ەلىمىزدىڭ كونستيتۋتسياسى جۇزەگە اسىرادى. قازاقستاننىڭ ءىس-قيمىلىنىڭ نەگىزىن قۇرايتىن ۇستانىمداردىڭ ءبىرى – قوعامدىق كەلىسىم. ويتكەنى, ۇلتتىق بىرتۇتاستىق بولماي ەتنوسارالىق قاتىناستاردىڭ ۇيلەسىم تابۋى مۇمكىن ەمەس. – شىعىس قازاقستان ەلباسىنىڭ قوعامدىق كەلىسىم مەن ۇلتتار تاتۋلىعى جولىنداعى دانا ساياساتىن ءتيىمدى جۇزەگە اسىرۋدىڭ جارقىن ۇلگىسىن كورسەتىپ كەلەدى. ءوڭىر تۇرعىندارىنىڭ باستاماسىمەن باستالعان «بەيبىتشىلىك پەن كەلىسىمنىڭ جول كارتاسى» اتتى جالپىۇلتتىق جوبا بۇگىندە رەسپۋبليكانى قامتىپ وتىر. اسسامبلەيا جىلى اياسىندا وڭىردە ءاربىر ءتورتىنشى تۇرعىندى قامتىعان 2600 شارا وتكەن. ال «20 يگى ءىس» اكتسياسى شەڭبەرىندە وبلىس جۇرتشىلىعى 886 ملن. تەڭگەنىڭ الەۋمەتتىك كومەگىن كورسەتىپ, رەسپۋبليكا بويىنشا رەكورد جاسادى. بۇل – شىعىسقازاقستاندىقتاردىڭ الەۋمەتتىك جاۋاپكەرشىلىككە اسا سەرگەك قارايتىنىن اڭعارتادى. وبلىستا ءوز ەلىنىڭ ناعىز پاتريوتتارى تۇرادى. سوندىقتان 100 ناقتى قادامدى جۇزەگە اسىرۋدا شىعىس ءوڭىرىنىڭ الدىڭعى قاتاردان كورىنەتىنىنە سەنىم بار, – دەدى گۇلشارا ناۋشاقىزى. شارا بارىسىندا كونفەرەنتسياعا قاتىسۋشىلار كونستيتۋتسيالىق قۇرىلىس, ەتنوسارالىق قاتىناستارداعى مەملەكەتتىك ساياساتتى جۇزەگە اسىرۋ, قازاقستاندىق بىرتەكتىلىك پەن وتانشىلدىقتى قالىپتاستىرۋداعى كەشەندى جۇمىستار, قازاقستان حالقى اسسامبلەياسىنىڭ «ۇلكەن ەل – ۇلكەن وتباسى», «مەنىڭ ەلىم» اۋقىمدى الەۋمەتتىك جوبالارىن جۇزەگە اسىرۋ, وقۋلىق باعدارلاماسىنا «ماڭگىلىك ەل» قۇندىلىقتارىن ەنگىزۋ, جالپىعا ورتاق ەڭبەك قوعامىن قۇرۋ يدەياسىن ىلگەرى جىلجىتۋ ماسەلەلەرىن تالقىلادى. – وسىعان دەيىن ەلىمىزدە 5 ساتىلى سوت جۇيەسى بولسا, ەندى 3 ساتىلى سوت جۇيەسىنە كوشۋ ماسەلەسى تالقىلانۋدا. بۇل جۇيە الەمدىك تاجىريبەدە مويىندالعان. زاڭى مىقتى ەلدىڭ ەكونوميكاسى دا مىقتى بولادى. سوندىقتان, ەلباسىنىڭ ۇلت جوسپارىنداعى 100 ناقتى قادامىندا زاڭنىڭ ۇستەمدىك قۇرۋى ءۇشىن سوت جۇيەسىن بارىنشا جەتىلدىرىپ, سوت بەدەلىن قالىپتاستىراتىن سۋديالارعا قويىلاتىن تالاپتاردى كۇشەيتۋى زاڭدى قۇبىلىس, – دەدى وبلىستىق سوت توراعاسى دوسجان ءامىروۆ. سونداي-اق, قازاقستان حالقى اسسامبلەياسى توراعاسىنىڭ ورىنباسارى, حاتشىلىق مەڭگەرۋشىسى ەرالى توعجانوۆ, كونستيتۋتسيالىق كەڭەس مۇشەسى ۆيكتور مالينوۆسكي, قازاقستان حالقى اسسامبلەياسى توراعاسىنىڭ ورىنباسارى ولەگ دىموۆ 100 ناقتى قادام اياسىنداعى ناقتى وي-ۇسىنىستارىمەن ءبولىستى. كونفەرەنتسيا سوڭىندا قحا, مەملەكەتتىك مەكەمەلەر, كاسىپكەرلىك جانە ۇكىمەتتىك ەمەس ۇيىمداردىڭ وكىلدەرىنە بىرقاتار مىندەتتەمەلەر جۇكتەلدى. ماسەلەن, «ماڭگىلىك ەل» پاتريوتتىق اكتسياسى يدەياسىن جانداندىرۋعا حالىقارالىق جانە وڭىرلىك دەڭگەيدەگى ۇنقاتىسۋ الاڭدارىن پايدالانۋ, قوعامدىق كەلىسىم مەن تاعاتتىلىقتى نىعايتۋعا جاستاردى تارتۋ, مادەني-تۋريستىك كلاستەردى دامىتۋعا قاتىسۋ سىندى ءىس-قيمىل جوبالارى بار. مەملەكەتتىك حاتشىعا وڭىردەگى قونىس اۋدارۋدىڭ ەلەكتروندى كارتاسى تانىستىرىلدى. گۇلشارا ابدىقالىقوۆا كەلەشەگى بۇلىڭعىر اۋىلدان كوشىپ كەلىپ, «جۇمىسپەن قامتۋدىڭ جول كارتاسى-2020» باعدارلاماسىنا قاتىسقان وتباسىنىڭ شاڭىراعىندا بولدى. №19 شاعىن اۋداندا تۇراتىن ءمادينا ەسىمدى جالعىزىلىكتى انا شەشەسىمەن جانە ەكى بالاسىمەن بىرگە زايسان اۋدانىنىڭ سارشي اۋىلىنان قونىس اۋدارعان. وبلىستىق جۇمىسپەن قامتۋ جانە الەۋمەتتىك باعدارلامالاردى ۇيلەستىرۋ باسقارماسىنىڭ باسشىسى ايجان سادىقوۆا جۇمىس كۇشىن تارتۋ ماقساتىندا وڭتۇستىك قازاقستان, الماتى, قىزىلوردا وبلىستارىنان 97 وتباسى كەلگەنىن جەتكىزدى. بۇگىندە وبلىستىڭ ەڭبەك رەسۋرستارى تاپشى اۋداندارىنا كوشىپ كەلۋگە نيەتتى كەز كەلگەن وتباسى قونىستانۋدىڭ ەلەكتروندى كارتاسىنا عالامتور ارقىلى ءوتىنىش جولداي الادى. سونداي-اق, وبلىس ورتالىعىندا جاڭادان بوي كوتەرگەن قان ورتالىعىنىڭ قىزمەتىمەن تانىسقان مەملەكەتتىك حاتشى سونى اپپاراتتاردىڭ مۇمكىندىگىنە نازار اۋداردى. بۇل ورتالىقتا جالعىز ءترامباتسيتتىڭ بەس مىڭ دانا دوزاسىن ساقتاۋ ءمۇمكىندىگى بار. ارنايى قۇرىلعى ونى 10 جىل كولەمىندە ساقتاي الادى. ادامنان قان قابىلداۋ, ونى ساراپتاۋ اپپاراتتارىنىڭ بارلىعى اۆتوماتتاندىرىلعان. قاندى بانككە جونەلتۋ جانە سۇرىپتاۋ قىزمەتى ادام فاكتورىنىڭ قاتىسۋىنسىز وتەدى. ال ورالحان بوكەي اتىنداعى №44 مەكتەپ-ليتسەيىندە ءبىلىم بەرۋ جانە الەۋمەتتىك قورعاۋ سالاسىنداعى اۋقىمدى جوبالار تانىستىرىلدى. اتالعان وقۋ ورنى وڭىردە ۇبت ناتيجەلەرى بويىنشا ۇزدىك كورسەتكىشكە قول جەتكىزگەن بولاتىن. سونىمەن بىرگە, مەملەكەتتىك حاتشى شىعىس ءوڭىرىنىڭ ايەلدەر قاۋىمداستىعىمەن كەزدەسۋ وتكىزدى. اتالعان شارادا قوعامداعى ايەلدەر قۇقىعىن قورعاۋ, ولاردىڭ مەملەكەتتىك قىزمەت پەن كاسىپكەرلىك جانە باسقا دا سالالارداعى بەلسەندىلىگىن جانداندىرۋ, وتباسىلىق-دەموگرافيالىق ساياساتتى جۇزەگە اسىرۋ ماسەلەلەرى ءسوز بولدى. مەملەكەتتىك حاتشىنىڭ جۇمىس ساپارى بۇگىن سەمەي قالاسىندا جالعاسادى دەپ كۇتىلۋدە.
دۋمان اناش, «ەگەمەن قازاقستان».
شىعىس قازاقستان وبلىسى.