كەشە استانادا ءبىلىم جانە عىلىم ءمينيسترى ا.ءسارىنجىپوۆ توراعالىق ەتەتىن ءبىلىم گرانتتارىن تاعايىنداۋ جونىندەگى رەسپۋبليكالىق كونكۋرستىق كوميسسيا جۇمىسىن باستادى. ونىڭ قۇرامىندا مەملەكەتتىك ورگاندار قىزمەتكەرلەرى, ۇلتتىق كاسىپكەرلەر پالاتاسىنىڭ, قازاقستان ازاماتتىق اليانسىنىڭ, عىلىم جانە ءبىلىم قىزمەتكەرلەرى كاسىپوداعىنىڭ وكىلدەرى, جوعارى وقۋ ورىندارىنىڭ رەكتورلارى بار.
ءبىلىم جانە عىلىم مينيسترلىگىنىڭ ءباسپاسوز قىزمەتى حابارلاعانداي, ۆەدومستۆو سوڭعى ۋاقىتتا ستۋدەنتتىك ورتا قۇرۋ مەن تاڭداۋ ساپاسىن كوتەرۋ باعىتىندا بىرقاتار جۇيەلى جۇمىستاردى جۇرگىزۋدە. كوميسسيا بۇل جولى دا وسى قاعيداتتى ۇستانادى. ول جوعارى وقۋ ورىندارىنا ستۋدەنتتەر قابىلداۋ ءجونىندەگى دايىندىق جۇمىستارىنىڭ قورىتىندىسىن شىعارادى. وتىرىستا 2015 جىلعا بولىنگەن 32 168 گرانت يەگەرلەرى انىقتالادى. ونىڭ 500-ءى جوعارى وقۋ ورىندارىنىڭ دايىندىق ءبولىمدەرىنە بەرىلسە, 29 668-ءى 1 كۋرسقا ستۋدەنتتەر قابىلداۋعا ارنالعان. سونىڭ ىشىندە كۇندىزگى وقۋ ءبولىمى گرانتتارىنىڭ سانى – 29 168, سىرتتاي ءۇشىن – 500. ءبىلىم گرانتتارىن قابىلداۋ قۇقىعىن كونكۋرس جولىمەن انىقتالعان 60 جوعارى وقۋ ورنى جەڭىپ الدى.
كوميسسيا وتىرىسىندا ءبىلىم جانە عىلىم ءمينيسترى اسلان ءسارىنجىپوۆ مەملەكەتتىك تاپسىرىس قۇرىلىمى ۇستىمىزدەگى جىلى قايتا قارالعانىن اتاپ ءوتتى. «مەملەكەتتىڭ الەۋمەتتىك-ەكونوميكالىق دامۋىندا ستراتەگيالىق باسىمدىققا, ەڭ الدىمەن ەلباسى جاريالاعان يندۋستريالىق-يننوۆاتسيالىق دامۋ باعىتىنا كوڭىل بولىنەدى. سول سياقتى اگروونەركاسىپ كەشەنىن دامىتۋ ماماندىقتارى ەرەكشە نازارعا الىنادى. وسىنداي مەملەكەتتىك تاپسىرىستار ەڭبەك نارىعىندا جوعارى بىلىكتى كادرلاردى دايىنداۋ قۇرىلىمىن ءتيىمدى قالىپتاستىرۋعا اسەر ەتەدى», – دەپ اتاپ ءوتتى مينيستر. كورسەتىلگەن باسىمدىقتار ەسەبىمەن 12 600 گرانت – ءتۇلەكتەردى تەحنيكالىق جانە تەحنولوگيالىق, 6000-عا جۋىق گرانت – پەداگوگيكالىق, 2 690 گرانت اۋىل شارۋاشىلىعى جانە مال شارۋاشىلىعى ماماندىقتارى بويىنشا وقىتۋعا بولىنگەن. جالپى, 2015 جىلى ءبىلىم گرانتتارىن الۋعا 67 377 تۇلەك ۇمىتكەر بولىپ وتىر. ولاردىڭ 53 162-ءسى – قازاق, 14 215-ءى ورىس مەكتەپتەرىن بىتىرگەن. سول سياقتى «ماڭگىلىك ەل جاستارى – يندۋسترياعا!» جوباسى شەڭبەرىندەگى كۆوتانى الۋ جولىنداعى باسەكەگە 6457 مەكتەپ ءبىتىرۋشى قاتىسادى. كونكۋرسقا قاتىسۋشىلار اراسىندا «التىن بەلگى» توسبەلگىسىنىڭ 2 116 يەگەرى بار. ال 2014 جىلى مۇنداي تۇلەكتەردىڭ سانى 1 732 بولعان ەدى. بۇلاردان بولەك, ءۇمىتكەرلەر اراسىندا نازارباەۆ زياتكەرلىك مەكتەپتەرىنىڭ 1 255 تۇلەگى (2014 ج. – 323), جالپى ءبىلىم بەرەتىن پاندەر بويىنشا حالىقارالىق ءجانە رەسپۋبليكالىق وليمپيادالاردىڭ 163 جەڭىمپازى (2014 ج. – 179), جالپى ءبىلىم بەرەتىن ءپاندەر حالىقارالىق جانە رەسپۋبليكالىق عىلىمي جارىستاردىڭ 930 جەڭىمپازى (2014 ج. – 921), رەسپۋبليكالىق جانە حالىقارالىق سپورت جارىستارىنىڭ 816 جەڭىمپازى (2014 ج. – 891), پرەزيدەنتتىك وليمپيادانىڭ 6 جەڭىمپازى (2014 ج. – 13) بار. ولاردىڭ ءبارى ءبىلىم بەرۋ گرانتىن تاعايىنداۋ كەزىندە باسىمدىقتارعا يە بولادى. حابارلامادا كونكۋرسقا قاتىساتىندار اراسىندا, سونداي-اق, 483 جەتىم بالانىڭ (2014 ج. – 426), I ءجانە II توپتارداعى 341 مۇگەدەكتىڭ (2014 ج. – 356) بار ەكەنى ايتىلعان. سول سياقتى سوعىسقا قاتىسۋشىلارعا تەڭەستىرىلگەن جەڭىلدىكتەر مەن كەپىلدىكتەر بويىنشا 20 ابيتۋريەنت (2014 ج. – 5) كونكۋرسقا ءتۇسىپ وتىر. مۇنىمەن قاتار قازاقستان رەسپۋبليكاسىنىڭ ازاماتى بولىپ تابىلمايتىن قازاق ۇلتىنىڭ 1 190 وكىلىنە كۆوتا بەلگىلەنگەن. 2014 جىلى ونىڭ سانى 1 194 بولعان ەدى. كوميسسيا جۇمىسىن اياقتاعاننان كەيىن ونىڭ قورىتىندىلارى رەسپۋبليكالىق رەسمي باسىلىمداردا جاريالانادى.
«ەگەمەن-اقپارات».