تاراز. 5 تامىز. جاقىندا «قازترانسگاز» اق «امانگەلدى» كەن ورنىنان جاڭا گەولوگيالىق قور تاپتى. قور «باتىس سۇلتانقۇدىق» قۇرىلىمىنان تابىلعان. بۇل تۋرالى egemen.kz ءتىلشىسى حابارلادى.
جاڭا كەنىشتە الدىن-الا گەولوگيالىق بارلاۋ ەسەپتەرى بويىنشا كومىرسۋتەك شيكىزاتىنىڭ قورى 32,7 ملرد. تەكشە مەتر, الىناتىن قور 24,5 ملرد. تەكشە مەتر بولادى دەپ كۇتىلۋدە. بۇل ارينە, تابيعي گاز بەن گاز كوندەنساتىن ءوندىرۋ كولەمىن ارتتىرىپ, ەلىمىزدىڭ وڭتۇستىك وڭىرلەرىن وتاندىق گازبەن قامتۋعا سەپتىگىن تيگىزەدى.
«امانگەلدى» گاز كەنىشى بۇگىندە وبلىسقا جىلىنا 330 ملن. تەكشە مەتر تابيعي وتىن بەرىپ وتىر. وتكەن جىلدىڭ سوڭىندا اشىلعان «جارقۇم» كەن ورنىنىڭ ارقاسىندا تاعى دا جىلىنا 65 ملن. تەكشە مەتر گازدى قوسىمشا الۋعا مۇمكىندىك تۋدى. «امانگەلدى» گاز كەنىشى قورىنىڭ كوبەيۋى جەرگىلىكتى حالىقتىڭ الەۋمەتتىك تۇرمىسىنا ۇلكەن سەرپىن بەرۋدە. سودان بولار, ەلدى مەكەندەردى گازداندىرۋدا سوڭعى جىلدارى وبلىستا ۇلكەن تىرلىكتەر اتقارىلىپ جاتىر. وبلىستا 373 ەلدى مەكەن بار. سونىڭ 40 پايىزدان استامى گازداندىرىلعان. قازىر جامبىل وبلىسىندا تەك مويىنقۇم اۋدانىنا عانا گاز تارتىلماعان. بيىل شۋ, قورداي اۋداندارىنىڭ تۇرعىندارى تابيعي وتىننىڭ راحاتىن كورۋدە. ەندى قاراتاۋ قالاسىنان جاڭاتاس قالاسىنا گاز قۇبىرلارىن تارتۋدىڭ قامى جاسالۋدا.
ورالحان ءداۋىت.
دەرەك, سۋرەت: egemen.kz.