قىزىلوردا. 5 تامىز. قىزىلوردا قالاسىندا 300-گە جۋىق وتباسى قونىستانعان اپاتتى جاعدايداعى 25 تۇرعىن ءۇي بار. وسى ماسەلەنى تولىقتاي شەشۋ ماقساتىندا 2013 جىلى وبلىستىق بيۋدجەتتەن قارجى ءبولىنىپ, 6 جاڭا كوپ قاباتتى تۇرعىن ۇيلەردىڭ جوبالىق-سمەتالىق قۇجاتتامالارى ازىرلەندى. بۇل تۋرالى egemen.kz ءتىلشىسى حابارلادى.
تۇرعىن ۇيلەردىڭ 3-ءىن تيتوۆ مولتەك اۋدانىندا, قالعانىن جاپپاسباي باتىر كوشەسىنە سالۋ جوسپارلاندى. 2013 جىلى تيتوۆ مولتەك اۋدانىندا العاشقى 24 پاتەرلىك 1 تۇرعىن ءۇي قۇرىلىسى جۇرگىزىلىپ, پايدالانۋعا بەرىلدى. ال 2014 جىلى تيتوۆ مولتەك اۋدانىندا جانە جاپپاسباي باتىر كوشەسىندە 60 پاتەرلىك 2 تۇرعىن ءۇيدىڭ قۇرىلىسى باستالعان بولاتىن. بيىل جاپپاسباي باتىر كوشەسىندەگى قۇرىلىسى باستالعان ءبىر تۇرعىن ءۇيدى جىل سوڭىنا دەيىن پايدالانۋعا بەرۋ جوسپارلانۋدا. كەلەسى جىلى تيتوۆ مولتەك اۋدانىنداعى 60 پاتەرلىك تۇرعىن ءۇيدى ناۋرىز-ءساۋىر ايلارىندا, 100 پاتەرلىك تۇرعىن ءۇيدى جىلدىڭ سوڭىنا دەيىن پايدالانۋعا بەرۋ كوزدەلۋدە.
ەرجان بايتىلەس.
دەرەك: egemen.kz.
سۋرەت: thenews.kz.