استانا. 19 ناۋرىز. پارلامەنت سەناتىنىڭ سپيكەرى قاسىم-جومارت توقاەۆ پالاتانىڭ جالپى وتىرىسىندا مالىمدەمە جاسادى. بۇل تۋرالى Tengrinews.kz ءتىلشىسى حابارلادى.
قاسىم-جومارت توقاەۆ ءوزىنىڭ سوزىندە 11 ناۋرىز كۇنى «نۇر وتان» پارتياسى سەزىندە ءبىراۋىزدان ۇسىنىلعان قازىرگى مەملەكەت باسشىسى نۇرسۇلتان نازارباەۆتىڭ الداعى سايلاۋداعى پرەزيدەنتتىككە العاشقى كانديدات رەتىندە تىركەلگەنىن ەسكە سالدى.
«ەلباسى پارتيا سەزىندە قازىرگى كۇردەلى الەمدىك جاعدايدا قازاقستان ەكونوميكاسىنىڭ ءوسىمىن ارتتىرۋدى قاراستىراتىن بەس ينستيتۋتسيونالدىق رەفورما ۇسىندى. ولار - قازىرگى زامانعى جانە كاسىبي مەملەكەتتىك اپپاراتتى قالىپتاستىرۋ, زاڭنىڭ ۇستەمدىگى مەن ءادىل سوتتى قامتاماسىز ەتۋ, بىرىڭعاي كەلەشەكتى, اشىق ءارى ەسەپتى مەملەكەتتى تۇرعىزۋعا باعىتتالعان يندۋستريالاندىرۋ مەن ەكونوميكانى ءارتاراپتاندىرۋ جونىندەگى كەشەندى شارالار», - دەدى ول.
سەنات سپيكەرى دەپۋتاتتاردى نازارباەۆ يدەيالارىن ىسكە اسىرۋعا بارلىق كۇشتى جۇمساۋعا شاقىردى. «مەملەكەت باسشىسىنىڭ قوعامنىڭ ىشكى ساياسي كەلىسىمىندەگى ەل جەتىستىكتەرىنە نەگىزدەلگەن قازىرگى باستامالارى قوعامنىڭ كەلەشەكتەگى ودان ءارى تۇراقتى ەكونوميكالىق جانە ساياسي دامۋى مەن قازاقستان مەملەكەتتىلىگىنىڭ نىعايۋىنا دەگەن سەنىمدى قالىپتاستىرادى. بۇل رەفورمالاردىڭ تابىستى ناتيجەلەرگە قول جەتكىزۋى حالىقتىڭ بەرىك ەركى مەن بيلىگى جاعدايىندا عانا قامتاماسىز ەتىلۋى مۇمكىن, بۇل - ۇلكەن سىن جانە ۇلكەن جۇمىس, ول بىزگە ۇلكەن جاۋاپكەرشىلىك جۇكتەيدى. قۇرمەتتى دەپۋتاتتار, سىزدەردى «ماڭگىلىك ەل» يدەياسىن جانە پرەزيدەنتتىڭ ءبىزدىڭ الدىمىزعا قويعان كەشەندى مىندەتتەرىن ىسكە اسىرۋعا كۇش سالۋعا شاقىرامىن», - دەدى توقاەۆ.
ەسكە سالايىق, قازاقستان پرەزيدەنتىنىڭ كەزەكتەن تىس سايلاۋى 2015 جىلدىڭ 26 ساۋىرىندە وتەدى. ورتالىق سايلاۋ كوميسسياسى بۇگىنگە دەيىن ءۇش كانديداتتى تىركەۋگە الدى – «نۇر وتان» پارتياسى اتىنان ۇمىتكەر نۇرسۇلتان نازارباەۆ, قازاقستان كوممۋنيستىك حالىق پارتياسىنىڭ اتىنان ۇمىتكەر تۇرعىن سىزدىقوۆ جانە ءوزىن-ءوزى ۇسىنۋشى ابىلعازى قۇسايىنوۆ.
مۇرات ايتقوجا.
دەرەك, سۋرەت: Tengrinews.kz.