قوستاناي. 22 ماۋسىم. قالادا وبلىستىق قحا-نىڭ سەسسياسى ءوتتى. بۇل تۋرالى egemen.kz ءتىلشىسى حابارلادى.
حالقىمىزدا «ءبىر كۇن ۇرىس بولعان ۇيدەن قىرىق كۇن نەسىبە كوتەرىلەدى» دەگەن ءسوز بار. سىيلاستىعى, ىنتىماعى جوق, بەرەكەسىز وتباسىنىڭ ءومىر شىندىعىنان الىنعان بۇل ءتامسىلدىڭ راستىعىن اينالامىزداعى ەلدەردىڭ ومىرىنەن دە كورىپ وتىرمىز. ءبىر اۋا جۇتىپ, ءبىر جەردىڭ سۋىن ءىشىپ وتىرعان حالىقتار ءبىر-بىرىنە مىلتىق كەزەنگەن ەلدەردىڭ بەرەكەسىزدىگىنەن بالانىڭ قارنى اش, انانىڭ كوزى جىلاۋدان كەپپەيدى. ونداي ەلدەردىڭ دامۋى قۇمداي سۋدىراپ, كەيىن كەتەتىنى بۇگىنگى كۇننىڭ شىندىعىنا اينالعان. ەلباسى نۇرسۇلتان نازارباەۆتىڭ ساردار ساياساتى ارقاسىندا قازاقستاندى جايلاعان ۇلت پەن ۇلىستار سىيلاسىپ, تاتۋ-ءتاتتى ءومىر سۇرۋدە. بىرلىكتىڭ, تاتۋلىقتىڭ قازاقستاندىق ۇلگىسى جاسالدى.
جاقىندا قازاقستان حالقى قوستاناي وبلىستىق اسسامبلەياسىنىڭ ححش سەسسياسىنا قاتىسقان پارلامەنت ءماجىلىسىنىڭ دەپۋتاتى زۋحرا ساياپوۆا قازاقستاننىڭ دامۋىنا تىرەك بولار, سەرپىن بەرەر باستى كۇش – حالقىنىڭ بىرلىگى, دوستىعى, بەرەكەسى ەكەنىن ايتتى.
«قازاقستاندا 100-دەن اسا ۇلتتار وكىلدەرى تاتۋ-ءتاتتى ءومىر ءسۇرىپ جاتىر, ولار قازاقستاندى ءوزىنىڭ وتانى دەپ سانايدى. بۇل تۇرعىدا كەڭ قولتىق, مەيىرىمدى, كەڭپەيىل قازاق حالقىنىڭ ۇلەسىن, ءتيىستى ورنىن ايتۋعا ءتيىسپىز. قازاقستاندى مەكەن ەتكەن بارلىق ۇلت پەن ۇلىستاردىڭ جۇدىرىقتاي جۇمىلعان بىرلىگى سالتانات قۇرعاندا عانا ەلىمىز مەملەكەت رەتىندە دە, قوعام رەتىندە دە نىعايا, كۇشەيە تۇسەدى», دەدى دەپۋتات.
تاريح قازاقستانداعى وسىنشا ۇلتتار وكىلدەرىن ءبىر كەمەنىڭ ۇستىنە مىنگىزىپ, تاعدىرلاس ەتتى. ەندى دوستىقتىڭ شىنىسى سىنباۋى ءۇشىن ونى ايالاپ, باعاسىن ءبىلۋىمىز كەرەك. ەلباسى نۇرسۇلتان نازارباەۆتىڭ ساياساتى, ونىڭ قازاقستان حالقىنا ارناعان جولداۋلارى دا وسىعان باعىتتايدى. قازاقستان حالقى اسسامبلەياسىنىڭ ءححى سەسسياسىنىڭ شەشىمدەرىنە سايكەس اسسامبلەيالاردى دامىتۋدىڭ تۇجىرىمداماسىن جۇزەگە اسىرۋ ءۇشىن وبلىستاعى 18 وبلىستىق جانە قالالىق, اۋداندىق 60 ەتنومادەني ورتالىقتار تىنباي جۇمىس ىستەيدى. سەسسيادا بايانداما جاساعان وبلىس اكىمىنىڭ ورىنباسارى مۇرات دارىباەۆ وڭىردەگى بەرەكەلى جۇمىستار مەن جۇرتقا دوستىقتىڭ, بىرلىكتىڭ ماڭىزىن جەتكىزە تۇسەتىن شارالاردىڭ ءبىرسىپىراسىن اتاپ ءوتتى. بۇل ورايدا وبلىستىق اسسامبلەيا جانىنداعى عىلىمي-ساراپتاۋ توبىنىڭ مۇشەلەرى, ەتنومادەني ورتالىقتار جەتەكشىلەرى وبلىس قالالارى مەن اۋداندارىندا لەكتسيالار وقيدى. وبلىستىق ءماسليحات دەپۋتاتتارىنان دەپۋتاتتىق توپ قۇرىلىپ, قوعامدىق جانە ۇلتارالىق كەلىسىم ماسەلەلەرى بويىنشا جۇمىس ىستەيدى. وبلىستىق ىشكى ساياسات باسقارماسى مەن قازاقستان حالقى وبلىستىق اسسامبلەياسى بىرىگىپ, «زيالىلار قوناقجايىن» قۇردى. ەسەپتى مەرزىمدە وندا پارلامەنت ءماجىلىسى دەپۋتاتتارىنىڭ, وبلىستىق اسسامبلەيا مۇشەلەرىنىڭ, عىلىمي جانە شىعارماشىلىق, ساياسي پارتيالار, ەتنومادەني ورتالىقتارى وكىلدەرىنىڭ قاتىسۋىمەن ونشاقتى شارالار وتكىزىلدى. م.دۋلاتوۆ اتىنداعى ينجەنەرلىك جانە ەكونوميكا, ا.بايتۇرسىنوۆ اتىنداعى قوستاناي مەملەكەتتىك ۋنيۆەرسيتەتتەرىندە سوڭعى ءبىر-ەكى جىلدا قازاقستان حالقى اسسامبلەياسى كافەدرالارى اشىلىپ, ول پىكىر الماسۋ الاڭىنا اينالدى.
قازاقستان حالقى وبلىستىق اسسامبلەياسىندا باستاۋ العان جۇمىستاردىڭ بارلىعى تەك «وتسە بولدى» دەگەن شارالار ەمەس. قازىر «قول جەتىمدى» قوعامدىق بىرلەستىگىنىڭ جەتەكشىسى, پسيحولوگيا عىلىمدارىنىڭ كانديداتى ليليا ساركيسيان جۇرگىزىپ كەلە جاتقان «قازاقستان وتباسىلارىنىڭ جانە وتباسىلىق قۇندىلىقتاردىڭ بەرىك بولۋىنا باعىتتالعان شارالار» جوباسى وبلىستا كەڭ قولداۋ تاپتى. وسى جوبا شەڭبەرىندە وتباسىلىق ومىرگە دايىنداۋ ءۇشىن مەكتەپتەردەگى 10-11 سىنىپتارعا جانە كوللەدجدەردە, جوعارى وقۋ ورىندارىندا پسيحولوگيادان فاكۋلتاتيۆتىك كۋرستار ەنگىزىلدى.
«قحا - 20 يگىلىكتى ءىس» رەسپۋبليكالىق ەستافەتا اياسىندا قوستاناي وبلىسىندا تاڭداي قاقتىرار ىستەر جۇزەگە استى. وسى ەستافەتا شەڭبەرىندە وبلىستاعى ارداگەرلەرگە, بالالار ءۇيىنىڭ تاربيەلەنۋشىلەرىنە, الەۋمەتتىك از قورعالعان وتباسىلارىنا 29 ميلليون 200 مىڭ تەڭگە كومەك كورسەتىلدى. قازاق حالقىنىڭ اسارىنداي, جاقسى ىسكە ەتنومادەني ورتالىقتارىنىڭ بارلىعى دا اتسالىستى. مىسالى, 8 بالانى اسىراپ الىپ, ءوسىرىپ وتىرعان تولەگەنوۆتەر وتباسىنا سالىنىپ جاتقان ءۇي وسى ەتنومادەني ورتالىقتار جيناعان قارجىعا ءبىتىپ قالدى. بىرلىكتىڭ بەرەكەسى وسىنداي-اق بولار.
سەسسيادا ءسوز العاندار تاراپىنان جۇرتتى جاقسىلىققا ۇيىتا تۇسەر ۇسىنىستار دا بولدى. «ەڭبەك قوعامىن قالىپتاستىرۋ, ەڭبەكتى ناسيحاتتاۋ ءۇشىن جىل اياعىندا, ەگىن جيناۋ ناۋقانى قورىتىندىسى بويىنشا «قوستاناي وبلىسىنىڭ ۇزدىك ءوندىرىسشىسى», «قوستاناي وبلىسىنىڭ ۇزدىك ديقانى», «قوستاناي وبلىسىنىڭ ۇزدىك مەحانيزاتورى» سەكىلدى قولى كۇستەنگەن, ماڭدايىن كۇن قاقتاپ, جەل قاققان ەڭبەك ادامىن ماراپاتتايتىن ءتوس بەلگىلەر شىعارىلسا, ولاردى ىل بويى مەرزىمدى باسىلىمداردا ناسيحاتتالسىن», «بيىلعى 1 قىركۇيەكتە مەكتەپتەردە العاشقى ساباق ەلباسىنىڭ «100 قادام» ۇلت جوسپارىنان باستالسىن», «كەلەسى جىلى ى.ءالتىنساريننىڭ تۋعانىنا 165 تولۋىنا وراي, ۇلى ۇستازدىڭ يگىلىكتى ىستەرى بويىنشا تۋريستىك مارشرۋت جاسالسىن», «كەلەسى جىلى وبلىستىڭ قۇرىلعانىنا 80 جىل تولۋىنا وراي مارشرۋت جولدارىن كەڭەيتە تۇسەيىك», «بالالار شىعارمالارىن قارايتىن كوركەمدىك كەڭەس قۇرىلسىن, سول ارقىلى وبلىستاعى قالامگەرلەردى وسى يگىلىكتى ىسكە تارتايىق» دەگەن سەكىلدى ويلار ايتىلدى.
سەسسيا جۇمىسىن قورىتىندىلاعان وبلىس اكىمى, قازاقستان حالقى وبلىستىق اسسامبلەياسىنىڭ توراعاسى نۇرالى سادۋاقاسوۆ حالىق بىرلىگى ەلدەگى بارلىق دامۋ ساتىسىنا قولداۋ جاسار كۇش ەكەنىن ايتى. سوندىقتان بىرلىكتى نىعايتۋعا ۇمتىلدىراتىن مۇنداي ۇسىنىستىڭ قايسىسى دا قولداۋعا لايىق دەدى.
سەسسيا سوڭىندا قوعامدىق كەلىسىم مەن قازاقستاندىق ءپاتريوتيزمدى كۇشەيتۋگە ۇلەس قوسقان قوستانايلىقتارعا قازاقستان حالقى اسساسبلەياسىنىڭ «بىرلىك» التىن مەدالىن, «قازاقستان حالقى اسسامبلەياسىنا 20 جىل» يۋبيلەيلىك مەدالى جانە قازاقستان حالقى اسسامبلەياسىنىڭ قۇرمەت گراموتاسى مەن قازاقستان حالقى اسسامبلەياسىنىڭ العىس حاتى تابىس ەتىلدى.
ءنازيرا جارىمبەتوۆا.
دەرەك, سۋرەت: egemen.kz