استانا. 19 ناۋرىز. اقمولا وبلىسىندا تۋعان اناسى باس تارتقان, باسقا جاناشىر ەشكىمى جوق 38 جاستاعى ازامات اۋرۋحانانى پانالاپ ءجۇر. بۇل تۋرالى gazeta.kz حابارلادى.
جاناربەك جانايداروۆ 3 جىل بۇرىن ينسۋلت بوپ, جەدەل جاردەممەن بۋراباي اۋداندىق اۋرۋحاناسىنا جەتكىزىلگەن. سال بوپ قالعان ناۋقاستان تۋىسقاندارى تەرىس اينالىپتى. سودان بەرى جاناربەك سىرقاتتار جۋىناتىن بولمەدە تۇنەپ, ال ءار كۇنىن ارباعا تاڭىلعان كۇيى ەمحانا دالىزىندە وتكىزەدى ەكەن. باعىپ-قاعىپ وتىرعان دارىگەرلەر دە ونى ءتيىستى مەكەمەگە ورنالاستىرا الماي اۋرە. ويتكەنى, بۇل ازاماتتىڭ ءبىر دە ءبىر قۇجاتى جوق كورىنەدى.
بۋرابايداعى اۋرۋحانانىڭ تەراپيا بولىمشەسىنىڭ دالىزىندە وتىرعان جاناربەكتىڭ 3 جىلدان بەرگى ءومىرى وسىلاي ءوتىپ جاتىر. سىرقاتتار تۇسكى ۇيقىدان ويانىپ, كەرەۋەتتەرىندە كەرىلىپ جاتسا, ول مۇگەدەك ارباسىندا تاپجىلماي وتىرادى. ويتكەنى كۇندىز وعان جاتاتىن ورىن جوق. ال كەشكىسىن مىنا سىرقاتتار جۋىناتىن بولمەنىڭ تاقتايىنا كورپە تاستاپ جانتايادى.
باس دارىگەر بارار جەرى جوق ازاماتتىڭ تاعدىرىن شەشۋ كەرەك دەپ قۇزىرلى ورىندارعا حابار بەرىپتى. بىراق سەلت ەتكەن جان بولماعان. ءۇ جىل بويى سال ادامدى تاماقتاندىرىپ, كيىندىرۋدەن مەيىربيكەلەر دە شارشاعان.
بۋراباي اۋداندىق اۋرۋحاناسى باس دارىگەرىنىڭ ورىنباسارى ءنۇرالى تۇرعىنباەۆ: «قۇجاتى جوق. ءبىز قولىمىزدان كەلگەن كومەگىمىزدى بەرىپ جاتىرمىز. تۋىسقاندارى باس تارتتى. ينسۋلت بولعان. ونى اۋرۋحانادان ەشكىم الىپ كەتكەن جوق. بۇل ماسەلەلەنىڭ شەشىمىن تاۋىپ بەرەر بىرەۋ تابىلماي تۇر», – دەيدى.
مۇگەدەكتىگىن انىقتاپ, ارنايى مەكەمەگە ورنالاستىرۋعا ءتيىس ماماندار دا جاناربەكتىڭ قۇجاتىن ىزدەپ شارشادىق دەپ وتىر.
بۋراباي اۋداندىق جۇمىسپەن قامتۋ جانە الەۋمەتتىك باعدارلامالار ءبولىمى باسشىسىنىڭ مىندەتىن اتقارۋشى قانات قوجاعۇلوۆ: «ودان تۋعان اناسى باس تارتىپ وتىر. قۇجاتىن ازىرلەۋ ءۇشىن ادىلەت مينيسترلىگىنە سۇراۋ سالدىق. ولاردان بازا مۇنداي ادام جوق دەگەن جاۋاپ كەلدى», – دەيدى
سۇراستىرا كەلگەندە ونىڭ اناسى. ءراش جانايداروۆا ششۋچە قالاسىنداعى تۋىسىنىڭ ءۇيىن پانالاپ ءجۇر ەكەن. ول: «مەن بالام ەمەس دەپ قالاي باس تارتام؟ مەنىكى بولسا. جاعداي جوق. ءوزىم قاڭعىرىپ ءجۇرمىن», – دەيدى.
كەيۋانا وسى بالاسىمەن رەسەيدەن 40 جىلعا جۋىق ۋاقىت بۇرىن كوشىپ كەلگەن ەكەن. تولقۇجاتى دا جوق جاناربەكتى الەۋمەتتىك مەكەمەلەردىڭ بىرىنە ورنالاستىرۋ ءۇشىن ەڭ بولماسا ونىڭ تۋ تۋرالى كۋالىگىن تابۋ قاجەت. شەنەۋنىكتەر سونى رەسەيدىڭ قورعان وبلىسىنان سۇراتىپ جاتقان كورىنەدى.
جولدىباي بازار.
دەرەك: gazeta.kz.
سۋرەت: alashainasy.kz.