استانا. 19 ناۋرىز. شىمكەنتتە بوكسشى گەننادي گولوۆكيننىڭ جانكۇيەرى سۇيىكتى سپورتشىسىنىڭ اتىن كولىگىنىڭ نومىرىنە جازىپ العان. بۇل جونىندە otyrar.kz حابارلادى.
قالالىق ءتارتىپ ساقشىلارى جۇرگىزگەن كەزەكتى رەيدتە ەرەكشە ءنومىرلى كولىك كوزگە تۇسەدى. الايدا, ول ساپىرىلىسقان قالىڭ كولىك ءنوپىرىنىڭ اراسىنا ءسىڭىپ, جوق بولادى. دەرەۋ كۇدىك تۋدىرعان كولىككە ىزدەۋ جاريالاعان ساقشىلار ارادا بەس مينۋت وتپەي جاتىپ, كيا ماركالى اۆتوكولىكتى قولعا تۇسىرەدى. كولىك شىمكەنتتىڭ رىسقۇلوۆ داڭعىلى مەن قازىبەك بي كوشەسىنىڭ قيىلىسىندا توقتاتىلدى.
كولىك جۇرگىزۋشىسى ءنومىردىڭ زاڭدى تۇردە تىركەۋدەن وتكەنىن كۇتۋگە شىدامى جەتپەگەن ەكەن. «ءنومىردىڭ شىققانىن كۇتپەي, اسىعىس جاساتىپ الدىم» دەيدى ول. ناتيجەسىندە, پوليتسيا قىزمەتكەرلەرى كولىكتى ايىپ تۇراعىنا جونەلتۋ تۋرالى شەشىم شىعاردى. بۇگىندە بۇل وقيعا بويىنشا تەكسەرۋ جۇمىستارى جۇرگىزىلۋدە.
ايتا كەتەيىك, شىمكەنتتەگى رەيد بارىسىندا ءبىر ساعاتىڭ ىشىندە كۋالىكسىز كولىك باسقارعان 40 جۇرگىزۋشى ۇستالدى.
ەلامان قوڭىر.
دەرەك, سۋرەت: otyrar.kz.