پەتروپاۆل. 22 ماۋسىم. ەسىل اۋدانىنا قاراستى گورنوە اۋىلىنا قازىرگى تالاپقا ساي جابدىقتالعان سۋ قۇبىرى ورناتىلدى. بۇل تۋرالى اۋداندىق اكىمدىكتىڭ ماماندارى حابارلادى.
بۇل ەلدى مەكەندە وسىدان 60 جىل بۇرىن «ەس- 164/4 تۇزەتۋ مەكەمەسى قونىس تەپكەن. وندا اۋىر قىلمىس جاساپ, باس بوستاندىعىنان ايرىلعان جاندار جازاسىن وتەيدى. سول كەزدە سكۆاجينا ورناتىلعانىمەن, اۋىز سۋدىڭ قۇرامىنان رودون سەكىلدى ادام اعزاسىنا وتە قاۋىپتى رادياتسيالىق زاتتار تابىلعان. نورماداعىدان 2,5 ەسە ارتقانىنا قاراماستان اۆاريالىق جاعدايداعى سۋ ناسوسىن تۇرعىندار امالسىزدان پايدالانىپ كەلگەن.
ايماق باسشىسى ەرىك سۇلتانوۆتىڭ تىكەلەي تاپسىرماسىمەن جەرگىلىكتى بيۋدجەتتەن 40 ميلليون تەڭگە ءبولىنىپ, سۋ تازالاۋ ستانساسى قويىلدى. ەندى گورنىيلىقتار ءوز دەنساۋلىقتارى ءۇشىن الاڭدامايتىن بولادى.
«سكۆاجينادان كۇنىنە 80 تەكشە مەترگە دەيىن سۋ ارنايى سۇزگىدەن وتكىزىلەدى. تىرشىلىك ءنارىنىڭ ساپاسىنا اي سايىن مونيتورينگ جۇرگىزىلەتىن بولادى», دەيدى «اقبۇلاق» كوممۋنالدىق شارۋاشىلىعىنىڭ ديرەتورى ەرمەك تاشماقانوۆ.
گورنوە اۋىلىندا 500-دەي ادام تۇرادى. بۇدان تىسقارى 600-گە جۋىق سوتتالۋشى جازالارىن وتەۋدە.
ءومىر ەسقالي.
دەرەك, سۋرەت: سولتۇستىك قازاقستان وبلىسى ەسىل اۋدانىنىڭ اكىمدىگى.