پەتروپاۆل. 22 ماۋسىم. پەتروپاۆل. ايماق باسشىسى ەرىك سۇلتانوۆ اق حالاتتى جانداردى كاسىبي مەرەكەلەرىمەن قۇتتىقتاپ, اۋداندىق اۋرۋحانالار مەن قالالىق ەمحانالارعا 55 «جەدەل جاردەم» كولىگىنىڭ كىلتىن سالتاناتتى تۇردە تابىس ەتتى. بۇل تۋرالى وبلىستىق اكىمدىكتىڭ ءباسپاسوز قىزمەتى حابارلادى.
سالانىڭ ماتەريالدىق-تەحنيكالىق بازاسىن قارجىلاندىرۋعا بىلتىر 1 ميلليارد تەڭگە جۇمسالعان. 75 جاس مامان جۇمىسقا ورنالاسسا, ولاردىڭ 43 ەلدى مەكەندەردە ەڭبەك ەتىپ ءجۇر. سوڭعى بەس جىل ىشىندە حالىق دەنساۋلىعىنىڭ نەگىزگى كورسەتكىشتەرى جاقسارىپ, جالپى ءولىم-ءجىتىم 10 پايىزعا, بالا ءولىمى 24 پايىزعا كەمىگەن.
ەرىك حامزا ۇلى ءوڭىردىڭ مەديتسينا قىزمەتكەرلەرىنە تابىس تىلەي كەلىپ, ءبىر توپ دارىگەر مەن مەيىربيكەنى قۇرمەت گراموتالارمەن, العىس حاتتارمەن, دەنساۋلىق جانە الەۋمەتتىك دامۋ ءمينيسترىنىڭ «دەنساۋلىق ساقتاۋ ىسىنە قوسقان ەڭبەگى ءۇشىن» توسبەلگىلەرىمەن ماراپاتتادى. اۋداندىق اۋرۋحانالار مەن قالالىق ەمحانالار 55 «جەدەل جاردەم» كولىكتەرىنە يەلىك ەتىپ, ۇلكەن سىيعا يە بولدى.
سالتاناتتى شارا ەمدەۋ مەكەمەلەرى كوركەمونەرپازدارىنىڭ «قازاقستاننىڭ بىرلىگى–حالىققاردىڭ دوستىعىندا» اتتى بايقاۋىنا جالعاستى. ونىڭ قورىتىندىسى بويىنشا انشىلەر اراسىندا ءبىىرىنشى ورىندى ءۋاليحانوۆ ورتالىق اۋرۋحاناسىنىڭ ونكولوگ دارىگەرى قاجىمۇرات ەسىركەپوۆ, بي اتالىمىندا وبلىستىق كارديولوگيالىق ورتالىقتىڭ «التىن جۇرەك» توبى جەڭىپ الدى.
ءومىر ەسقالي.
دەرەك, سۋرەت: سولتۇستىك قازاقستان وبلىستىق اكىمدىگىنىڭ ءباسپاسوز قىزمەتى.