كەشە اقوردادا قازاقستان رەسپۋبليكاسىنىڭ مەملەكەتتىك حاتشىسى گۇلشارا ابدىقالىقوۆانىڭ جەتەكشىلىك ەتۋىمەن شەتەلدە كادرلار دايارلاۋ جونىندەگى رەسپۋبليكالىق كوميسسيانىڭ كەزەكتى وتىرىسى ءوتتى.
گ.ابدىقالىقوۆا كوميسسيا جۇمىسىن اشقان سوزىندە ۇستىمىزدەگى جىلدىڭ 11 ناۋرىزىندا وتكەن «نۇر وتان» پارتياسىنىڭ XVI سەزىندە ەلباسىنىڭ 5 باستى حالىقتىق رەفورمالار جاساۋدى جانە ولاردىڭ قاتارىندا كاسىبي اۆتونوميالىق مەملەكەتتىك اپپاراتتى قالىپتاستىرۋدى ايتقانىن ەسكە سالىپ ءوتتى.
مەملەكەتتىك حاتشى اتالعان باعىتقا «بولاشاق» باعدارلاماسىمەن وقىعان جاستاردىڭ الەۋەتىن بارىنشا ءتيىمدى پايدالانۋ جانە ولاردى مەملەكەتتىك قىزمەتكە بەلسەندى تۇردە تارتۋ قاجەتتىگىن اتاپ كورسەتتى. ءبىلىم جانە عىلىم مينيسترلىگىنىڭ ءمالىمەتى بويىنشا, بۇگىنگى تاڭدا باعدارلاما تۇلەكتەرىنىڭ تەك 6,5%-ى (بۇل «بولاشاق» باعدارلاماسىمەن وقىعان 400 ستۋدەنت) عانا العان ءبىلىمدەرىن مەملەكەتتىك ورگانداردا قولدانۋدا ەكەن. وسى كورسەتكىشتى ۇلعايتۋ قاجەتتىگى تۋىنداپ وتىر, دەدى مەملەكەتتىك حاتشى.
گ.ابدىقالىقوۆا «نۇرلى جول» ينفراقۇرىلىمدىق جوباسىن ىسكە اسىرۋ اياسىندا ەل ەكونوميكاسىنىڭ باستى سالالارى مەن قازىرگى مەملەكەتتىك اپپارات ءۇشىن جوعارى كاسىبي كادرلاردى دايارلاۋ جونىندەگى كوميسسيانىڭ الدىندا تۇرعان مىندەتتەردى دە بەلگىلەپ بەردى.
وتىرىس بارىسىندا قازاقستان رەسپۋبليكاسى پرەزيدەنتىنىڭ «بولاشاق» حالىقارالىق ستيپەندياسىن ودان ءارى جۇزەگە اسىرۋدىڭ وزەكتى ماسەلەلەرى قارالدى.
اعىمداعى جىلى قازاقستاننىڭ يندۋستريالىق-يننوۆاتسيالىق دامۋ مەملەكەتتىك باعدارلاماسى ءۇشىن كادرلار دايارلاۋعا باعىتتالعان ەلىمىزدەگى جوعارى وقۋ ورىندارىنا عىلىمي كادرلاردى دايارلايتىن جاڭا Split PhD جۇيەسىن ەنگىزۋ جوسپارلانىپ وتىر.
وسى جىلدان باستاپ, «بولاشاق» ستيپەندياسى يەگەرلەرىن اعىلشىن ءتىلى بويىنشا تىلدىك دايارلاۋدىڭ جاڭا ۇلگىسى ىسكە قوسىلادى.
كونكۋرسقا قاتىسۋشى ۇمىتكەرلەردىڭ قۇجاتتارى 2015 جىلعى 13 ساۋىردەن باستاپ قابىلدانادى.
وتىرىس قورىتىندىسى بويىنشا قازاقستان رەسپۋبليكاسىنىڭ مەملەكەتتىك حاتشىسى شەتەلدە كادرلار دايارلاۋ جونىندە رەسپۋبليكالىق كوميسسيانىڭ جۇمىسىن ودان ءارى ۇيىمداستىرۋعا بايلانىستى بىرقاتار ناقتى تاپسىرما بەردى.
جاقسىباي سامرات,
«ەگەمەن قازاقستان».