مەملەكەتتىڭ كاسىپكەرلىك قىزمەتكە قاتىسۋىن شەكتەۋ ماسەلەلەرى ءماجىلىس توراعاسى قابيبوللا جاقىپوۆتىڭ جەتەكشىلىگىمەن وتكەن جالپى وتىرىستا تالقىلاندى. سونداي-اق, دەپۋتاتتار ەلىمىز بەن قىتاي جانە تاجىكستان اراسىنداعى توتەنشە جاعدايلاردىڭ الدىن الۋ جونىندەگى ىنتىماقتاستىق كەلىسىمىن راتيفيكاتسيالاۋ ماسەلەسىن قارادى.
ءبىرىنشى وقىلىمدا قاراۋعا ۇسىنىلعان «قازاقستان رەسپۋبليكاسىنىڭ كەيبىر زاڭنامالىق اكتىلەرىنە مەملەكەتتىڭ كاسىپكەرلىك قىزمەتكە قاتىسۋىن شەكتەۋ ءماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى بويىنشا باياندامانى ۇلتتىق ەكونوميكا ءمينيسترى ەربولات دوساەۆ جاسادى. ءمينيستردىڭ ايتۋىنشا, مەملەكەتتىك كومپانيالار ەكونوميكادا باسەكەلەستىككە قىسىم كورسەتۋ سەبەپتەرىنە بايلانىستى قازاقستاندىق بيزنەس قولايسىز جاعدايلارعا تاپ بولۋدا. سوندىقتان دا كۆازيمەملەكەتتىك سەكتوردا تۇبەگەيلى وزگەرىستەر تالاپ ەتىلىپ وتىر. ە.دوساەۆ بۇل رەتتە اقش, سينگاپۋر جانە نورۆەگيا سياقتى ەلدەردىڭ تاجىريبەسى زەردەلەنگەنىنە ەرەكشە توقتالدى.
مينيستر بايانداما سوڭىنان دەپۋتاتتار تاراپىنان قويىلعان بىرقاتار سۇراقتارعا جاۋاپتار بەردى. سونىڭ ىشىندە نۇرتاي سابيليانوۆ ماڭىزدى ماسەلەگە ەرەكشە نازار اۋداردى. ونىڭ سوزىنە قاراعاندا, مەملەكەتتىڭ قاتىسۋىمەن ومىرگە كەلگەن كاسىپورىندار ءوز جانىنان كاسىپكەرلىك سۋبەكتىلەرىن قۇرىپ جاتادى.
مىسالى, «سامۇرىق-قازىنا» ااق» اق-تىڭ قازىرگى كەزدە 600-گە جۋىق ەنشىلەس كاسىپورنى قۇرىلىپتى. دەپۋتاتتىڭ پايىمىنشا, وسىنداي ەنشىلەس كاسىپورىندار بولىنگەن قارجىنى ءتيىمسىز جۇمسايدى. وسىعان توسقاۋىل قويۋدىڭ جولىن سۇراعان دەپۋتاتقا بەرگەن جاۋابىندا مينيستر بۇل ماسەلەنى ءتيىستى ورگاندارمەن جان-جاقتى زەردەلەگەننەن كەيىن عانا جاۋاپ بەرۋگە بولارىن العا تارتتى. ال زاڭ جوباسى ءبىرىنشى وقىلىمدا ماقۇلداندى.
پالاتا, سونىمەن بىرگە, ەلىمىز بەن تاجىكستان جانە قىتاي ۇكىمەتتەرى اراسىنداعى توتەنشە جاعدايلاردىڭ الدىن الۋ جانە ولاردى جويۋ سالاسىنداعى ىنتىماقتاستىق تۋرالى كەلىسىمدى راتيفيكاتسيالاۋ ماسەلەسىن قاراپ, زاڭ جوبالارىن قولداۋ كەرەك دەپ شەشتى. زاڭدىق قۇجاتتىڭ ماقساتى ەلدەر قۇزىرەتتى ورگاندارىنىڭ ازاماتتىق قورعانىس, توتەنشە جاعدايلارىنىڭ الدىن الۋ مەن ولاردى جويۋ سالاسىنداعى ىنتىماقتاستىق نەگىزدەرىن ايقىنداۋ بولىپ تابىلادى. اتاپ ايتقاندا, تاراپتاردىڭ بىرەۋىنىڭ اۋماعىندا توتەنشە جاعدايلار ورىن العان كەزدە وسى كەلىسىمدى جۇزەگە اسىرۋعا قۇقىقتىق نەگىزدى قامتۋ كوزدەلەدى.
جانە دە كەشەگى وتىرىستا «2006 جىلعى 4 قىركۇيەكتەگى قازاقستان رەسپۋبليكاسىنىڭ ۇكىمەتى مەن وزبەكستان رەسپۋبليكاسىنىڭ ۇكىمەتى اراسىنداعى قازاقستان-وزبەكستان مەملەكەتتىك شەكاراسى ارقىلى وتكىزۋ پۋنكتتەرى تۋرالى كەلىسىمگە وزگەرىستەر مەن تولىقتىرۋلار ەنگىزۋ تۋرالى حاتتامانى راتيفيكاتسيالاۋ تۋرالى» زاڭ جوباسى دا ماقۇلداندى. ينۆەستيتسيالار جانە دامۋ ءمينيسترى اسەت يسەكەشەۆتىڭ ايتۋىنشا, حاتتامانىڭ ماقساتى – ەكى ەلدىڭ وتكىزۋ پۋنكتتەرىنە ماقتاارال ستانساسىن ەنگىزۋ. سونىڭ ناتيجەسىندە قازاقستاندىق جۇكتەردى شاردارا سۋ قويماسى اۋماعىنان وزبەكستاننىڭ ترانزيتتىك تەمىرجول ۋچاسكەسىن پايدالانا وتىرىپ, وتكىزۋ كوزدەلگەن. ويتكەنى, ماقتاارال ستانساسى بەكىتىلگەن تىزبەدە جوق بولعاندىقتان, وزبەكستان تاراپى ەلىمىز پويىزدارىن وتكىزبەۋدە.
مينيستر, بۇل رەتتە, حاتتاما بويىنشا كەدەن وداعىنىڭ ستاندارتتارىنا سايكەس كەلمەيتىن اۆتوموبيلدەر وتكىزۋ پۋنكتتەرىنىڭ سانى 10-نان 6-عا دەيىن قىسقارتىلاتىنىن ايتتى. «ءبىز مۇنداي شەشىم قابىلداماس بۇرىن ارنايى تالداۋ جۇرگىزدىك. ال وسى 10 پۋنكت نەگىزىنەن كەڭەس وداعى تۇسىندا اشىلعان بولسا, جابىلاتىن تورتەۋى سوڭعى ءۇش جىلدا سونشالىقتى پايدالانىلعان جوق. ەكىنشىدەن, بۇلار ستاندارتتارعا ساي ەمەس, ولاردى سوعان كەلتىرۋ ءۇشىن ۇلكەن قاراجات قاجەت. ۇشىنشىدەن, سوڭعى ءۇش جىلدا ءبىز وسىنى زەرتتەدىك, سوندا 6 وتكىزۋ ورنى-اق ەشقانداي اۋىرتپالىقسىز جۇمىس ىستەدى. ەكى ەل اراسىندا كۇردەلى جاعداي تۋدىرعان جوق», – دەدى اسەت ورەنتاي ۇلى.
كۇن تارتىبىنە شىعارىلعان «جول ءجۇرىسى تۋرالى» قازاقستان رەسپۋبليكاسىنىڭ زاڭىنا وزگەرىستەر ەنگىزۋ تۋرالى» جانە «وسىمدىكتەر كارانتينى تۋرالى» قازاقستان رەسپۋبليكاسىنىڭ زاڭىنا وزگەرىستەر مەن تولىقتىرۋلار ەنگىزۋ تۋرالى» زاڭ جوبالارىنا قورىتىندى ازىرلەۋ جونىندەگى ماسەلە دە ءوز شەشىمدەرىن تاپتى. العاشقى ماسەلە بويىنشا 2014 جىلى كۇشىنە ەنگەن «جول ءجۇرىسى تۋرالى» زاڭدا پوليتسيا قىزمەتكەرىنىڭ رۇقساتىنسىز جولاۋشىلارعا كولىك قۇرالىنان شىعۋعا تىيىم سالىنعان نورما بولعان-دى. ەندى سول نورما قوعام تاراپىنان سىنعا ۇشىراعاندىقتان, ونى الىپ تاستاۋدى دەپۋتاتتار ءوز پارىزدارى ساناپتى.
اسقار تۇراپباي ۇلى,
«ەگەمەن قازاقستان».