پرەزيدەنت جانىنداعى ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا پارلامەنت ءماجىلىسىنىڭ دەپۋتاتتارى رومان كيم جانە ءاليحان تويباەۆ اگروونەركاسىپ سالاسىنا قولداۋ كورسەتۋدەگى اتقارىلىپ جاتقان جۇمىستار جايىندا بايانداپ بەردى.
«نۇر وتان» پارتياسىنىڭ XVI سەزىندە ەلباسى اۋىل شارۋاشىلىعى ماسەلەلەرىن قوزعاي وتىرىپ, اگرارلىق سەكتوردى دامىتۋ ىسىنە باسىمدىق بەرگەن بولاتىن. وسى تۇرعىدا بىرقاتار ماسەلەلەر تالقى بولعان جيىننىڭ ماڭىزىن تۇسىندىرگەن اگرارلىق ماسەلەلەر كوميتەتىنىڭ مۇشەسى ءاليحان تويباەۆ «اگروبيزنەس-2020» باعدارلاماسى اياسىندا اۋىل شارۋاشىلىعى سالاسىنا 3 ترلن. تەڭگە ءبولۋ جوسپارلانىپ وتىر دەپ مالىمدەدى.
سونىمەن قاتار, ءا.تويباەۆ ءۇستىمىزدەگى جىلدىڭ ەسەپتىك كورسەتكىشى بويىنشا اۋىل شارۋاشىلىعىنا 177 ملرد. تەڭگە سۋبسيديا ءبولىنىپ وتىرعاندىعىن حابارلادى. ونىڭ ىشىندە 70 ملرد. تەڭگە ەگىن شارۋاشىلىعىنا باعىتتالعان. بۇل 2013 جىلمەن سالىستىرعاندا ەكى ەسە كوپ, دەگەن كوميتەت مۇشەسى ول كەزدەگى سۋبسيديا كولەمى 87,2 ملرد. تەڭگە بولعاندىعىن ەسكە سالدى. سول جىلدارى اۋىل شارۋاشىلىعى ىشكى جالپى ءونىمىنىڭ 2,5-3%-ى سۋبسيديالانسا, قازىر ول 6-7%-عا ارتتى دەپ ويلايمىن, دەدى. ءبىزدىڭ مەملەكەتىمىزدە 7 ءىرى اۋىلشارۋاشىلىق كەشەندەرى بار. سونداي-اق, 184 مىڭنان استام كىشى اۋىلشارۋاشىلىق مەكەمەلەرى بار. ول جەردە جۇمىس ىستەيتىندەر سانى 2,5 ميلليوننان اسادى, دەگەن دەپۋتات بۇل بۇكىل جۇمىسقا جارامدى ادامداردىڭ 25%-ىن قۇرايتىندىعىن تىلگە تيەك ەتتى.
سونىمەن قاتار, ءا.تويباەۆ ءبىزدىڭ ەلدە اۋىل شارۋاشىلىعىنا ەداۋىر قولداۋ كورسەتىلىپ جاتقاندىعىنىڭ ارقاسىندا بۇل سالا جاقسى دامىپ كەلە جاتقاندىعىن اتاپ ايتتى. بۇل تۇرعىدا مىسال كەلتىرسەك, الماتى وبلىسىندا «ايدارباەۆ» شارۋا قوجالىعى 1990 جىلدارى قۇرىلعان بولاتىن. ول قازىرگى تاڭدا مەملەكەتتىڭ قولداۋىنىڭ ارقاسىندا ميللياردتان استام تەڭگەگە تاۋار شىعاراتىن ۇلكەن شارۋاشىلىققا اينالدى, دەپ اتاپ كورسەتتى.
ەلميرا ماتىباەۆا,
«ەگەمەن قازاقستان».