تۇرعىن ءۇي شارۋاشىلىعى – قاشاننان وزەكتى ماسەلە. كەشەگى كەزەڭدە تولىقتاي مەملەكەتتىڭ موينىندا بولعان بۇل سالاعا تاۋەلسىزدىك تۇسىندا زامان تالابىنا ساي وزگەرىستەر ەنگىزىلدى. بۇرىنعى تۇرعىن ءۇي باسقارمالارىنىڭ ورنىنا پاتەر يەلەرى كووپەراتيۆتەرى (پيك), كەيىن كوندومينيۋمدار قۇرىلىپ, تۇرعىندارعا ۇيلەرىنە قاتىستى شارۋا قامى ءوز بيلىكتەرىنە بەرىلدى. بۇگىندە كوپ پاتەرلى مەكەنجايلاردىڭ كوممۋنالدىق ماسەلەسىمەن پيك, باسقارۋشى كومپانيالار, كوندومينيۋمدار اينالىسادى.
ەلىمىزدەگى تۇرعىن ۇيلەردىڭ تەحنيكالىق جاعدايى بىركەلكى دەۋگە كەلمەيدى. وتپەلى كەزەڭدە قالىپتاسقان ونى باسقارۋدىڭ مودەلى زاماناۋي تالاپتارعا جاۋاپ بەرە الماي وتىر. تۇرعىن-ءۇي كوممۋنالدىق شارۋاشىلىعىن جاڭعىرتۋ باعدارلاماسى بويىنشا قونىس نىساندارىن جوندەۋدى ۇيىمداستىرۋ, ءتيىمدى, ۇنەمدى جاعىن قاراستىرۋ جوعارىدا اتالعان قۇرىلىمدار قۇزىرىندا. بۇلار وسى شارالارمەن ءتيىستى دەڭگەيدە اينالىسىپ ءجۇر دەۋ قيىن. ماسەلەن, اتالعان باعدارلاماعا سايكەس جوندەۋ جۇمىستارىنا جىل سايىن 26 ملرد. تەڭگە جۇمسالۋى كەرەك. ال تۇرعىنداردان جينالاتىن قارجى 25 ملرد. تەڭگەدەن اسپايدى. ساراپتامالىق ماتەريالدارعا سۇيەنسەك, ۇيلەرگە كۇردەلى جوندەۋ جۇرگىزۋ ءۇشىن 200 ملرد. تەڭگە قاجەت بولسا, قىزمەت كورسەتۋ تۇرلەرىنىڭ ءوزى 100 ملرد. تەڭگەنى كەرەكسىنەدى.
باسقا دا وڭىرلەردەگىدەي جەزقازعان قالاسىندا تۇرعىن-ءۇي كوممۋنالدىق شارۋاشىلىعىن جەتىلدىرۋگە كەڭ اۋقىمدى ىستەر اتقارىلىپ جاتىر. ايتالىق, 2011-2020 جىلدارعا ارنالعان باعدارلامانىڭ ءبىرىنشى مەحانيزمى بويىنشا كوپ قاباتتى 5 ۇيگە جوندەۋ جۇرگىزىلدى.
اتاپ ايتقاندا, اسىلبەكوۆ, شەۆچەنكو, پۋشكين كوشەلەرىندەگى 97/2, 1-ءشى, 5-ءشى, 11-ءشى, 41-ءشى ۇيلەرگە تيىسىنشە 9,3, 15,9, 14,6 جانە 15,9 ميلليون تەڭگە كولەمىندە جۇمىستار اتقارىلدى. سونىڭ ناتيجەسىندە بايقوڭىروۆ, ساتباەۆ, شەۆچەنكو, پۋشكين كوشەلەرىندەگى 20-شى, 51-ءشى, 15-ءشى, 47-ءشى ۇيلەر ادام تانىعىسىز وزگەردى. مۇنىمەن قوسا گاگارين كوشەسىندەگى 80-ءشى ءۇيدىڭ ءليفتىسى اۋىستىرىلدى.
قالادا مۇنداي ىستەر الداعى ۋاقىتتا دا جالعاسىن تابادى. قارجىلىق قيىندىقتارعا قاراماستان بيىل 4 ءۇيدى جوندەۋگە 56 ميلليون تەڭگە ءبولىندى. بۇل مىندەت مىقتى مەردىگەر ۇيىمدارعا جۇكتەلدى. مىسال ءۇشىن اجىباەۆ جەتەكشىلىك ەتەتىن «اجار-4» قۇرىلىس كومپانياسى تۇرعىنداردىڭ سەنىمىن ءاردايىم اقتاۋشى تاجىريبەلى ۇجىم.
جاڭارتۋ جۇمىستارىنىڭ قانشالىقتى قاجەتى بار دەگەن اڭگىمەنىڭ ايتىلىپ قالۋى جاسىرىن ەمەس. بىلگەن ادامعا مۇنىڭ پايداسى ۇشان-تەڭىز. بىرىنشىدەن, قۋات كوزدەرىن ۇنەمدەۋگە ۇلكەن ىقپال ەتەدى. ەسىك-تەرەزەلەرى مەن قابىرعاسى بۇتىندەلگەن, جىلۋ جۇيەلەرى الماستىرىلعان باسپانالاردى جىلۋمەن قامتاماسىز ەتۋگە شىعىن از كەتەدى. ەكىنشىدەن, تۇرعىندار جەكە ارلەۋشى قۇرىلىسشىلار مەن سانتەحنيكتەر ىزدەپ اۋرە-سارساڭعا تۇسپەيدى. ۇشىنشىدەن, قالانىڭ كەلبەتى كەلىسىپ, ساۋلەتى ساندەنە تۇسەدى.
بۇعان قالاي قول جەتكىزۋگە بولار ەدى؟ ول ءۇشىن پيك-تەر الدىمەن كوندومينيۋم قۇرۋى قاجەت. ولار تۇرعىن ءۇي باسقارمالارىندا تىركەۋدەن ءوتۋى كەرەك. كوندومينيۋم ەسەبىن جىلدىق 0,3 پايىزبەن «قازپوشتا» اق ءوز موينىنا الادى. پاتەر يەلەرى كۇردەلى جوندەۋ سوماسىنىڭ ءبىر بولىگىن جيناۋلارى ءتيىس. وسىدان كەيىن عانا مەملەكەت قايتارما اقشانى بىرتىندەپ بەرە الادى. كوندومينيۋم نىسانى بولىپ تابىلاتىن ۇيلەردى مەملەكەت تەگىن جوندەمەيدى.
قۋانىشبەك سانسىزباەۆ,
جەزقازعان قالالىق تۇرعىن-ءۇي كوممۋنالدىق شارۋاشىلىعى,
جولاۋشىلار اۆتوكولىگى
جانە اۆتوكولىك جولدارى
ءبولىمىنىڭ باسشىسى.
قاراعاندى وبلىسى.