استانا. 14 اقپان. «بارىس» قۇرلىقتىق حوككەي ليگاسىنداعى كەزەكتى ويىنىن رەسەيدىڭ «سيبير» كومانداسىنا قارسى وتكىزىپ, 0:4 ەسەبىمەن جەڭىلىپ قالدى. بۇل تۋرالى egemen.kz حابارلادى.
نوۆوسيبيرسكىدە وتكەن ويىن حوككەيدەن گورى شارشى الاڭداعى بوكسشىلاردىڭ ايقاسىنا كوبىرەك ۇقسادى. ول ءۇشىن جالپى ويىن بارىسىندا قوس كوماندا حوككەيشىلەرى العان ايىپ ۋاقىتى 104 مينۋتتى قۇراعانىن ايتساق جەتكىلىكتى.
تارتىس ايدىن يەلەرىنىڭ شابۋىلىمەن باستالدى. ولاردىڭ العاشقى مينۋتتارداعى بۇل ۇمتىلىستارى ناتيجەسىن بەرىپ, 4-مينۋتتا ياركو كوسكيرانتا سىبىرلىك كوماندانى العا شىعاردى. ويىننىڭ 8-مينۋتىندا قوناقتار ساپىنان وسكارس بارتۋليس قارسىلاسىنىڭ باسىنا وتە قاۋىپتى سوققى جاساعانى ءۇشىن ديستسيپلينارلىق ايىپ ۋاقىتىمەن جازالانىپ 12 مينۋتقا ايدىننان قۋىلدى. ۋاقىت وتكەن سايىن ايدىنداعى باسىمدىعىن كۇشەيتكەن سىبىرلىكتەر 12-مينۋتتا ەكىنشى شايبالارىن سوعىپ, ۇزىلىسكە ايقىن باسىمدىقپەن اتتاندى. گولدىڭ اۆتورى - سەرگەي شۋماكوۆ.
ءوز كەزەگىندە «بارىس» حوككەيشىلەرى العاشقى كەزەڭدە تەك دورەكى ويىندارىمەن عانا ەستە قالدى. بارتۋليستەن بولەك, بۇل كەزەڭدە كوماندا كاپيتانى برەندون بوچەنسكي تورەشىمەن دورەكى سويلەسكەنى ءۇشىن ويىن سوڭىنا دەيىن ايدىننان قۋىلدى. بۇل كەزدە ويىننىڭ 19-مينۋتى ءوتىپ جاتقان بولاتىن.
ەكىنشى كەزەڭدە اندرەي نازاروۆ كوماندا قۇرامىنا وزگەرىس ەنگىزىپ, ءبىرىنشى بەستىككە بوچەنسكيدىڭ ورنىنا تالعات جايلاۋوۆتى شىعاردى. سونداي-اق, كونستانتين رۋدەنكونى دا العاشقى بەستىككە قوسىپ, نايدجەل دوۋستى نيكولاي انتروپوۆتىڭ قاسىنا وتكىر شابۋىل وتىنە قويدى. دەسەك تە, بۇل تاكتيكالىق شەشىم ايتارلىقتاي ناتيجە بەرگەن جوق. ەكىنشى كەزەڭدە ەسەپ وزگەرىسسىز قالعانىمەن, شەشۋشى كەزەڭدە ايدىن يەلەرى تاعى دا ەكى جاۋاپسىز شايبا سوعىپ, ءىرى ەسەپپەن جەڭىسكە جەتتى. سوڭعى ەكى گولدىڭ دا اۆتورى الەكسەي كوپەيكين بولدى. نازاروۆ العاشقى كەزەڭدەگى ەكى شايبادان كەيىن قاقپاشى يان لاتسونىڭ ورنىنا پاۆەل پولۋەكتوۆتى شىعارعانىن ايتا كەتەيىك.
ءۇشىنشى كەزەڭنىڭ سوڭعى بەس مينۋتىندا حوككەيشىلەر ايدىنعا تەك توبەلەس ءۇشىن شىققانداي اسەر قالدىردى. الدىمەن, 16-مينۋتتا دوۋس ويىن ءتارتىبىن ورەسكەل بۇزىپ, ويىن سوڭىنا دەيىن ايدىننان قۋىلسا, ارادا ءبىر مينۋت ۋاقىت وتكەن كەزدە دامير رىسپاەۆ تا كيىم اۋىستىراتىن بولمەنى بەتكە الدى. تورەشى ءداميردى «سيبير» ويىنشىسى ۆيتالي مەنشيكوۆپەن توبەلەسى ءۇشىن ايدىننان قۋدى. وسى تەكەتىرەس سالدارىنان مەنشيكوۆ 5 مينۋتتىق ايىپ ۋاقىتىمەن جازالانسا, رىسپاەۆ ويىن سوڭىنا دەيىن ءبىر-اق قۋىلدى. ناتيجەسىندە, 60 مينۋتتىق تارتىس بارىسىندا «بارىس» ويىنشىلارى بارلىعى 89 مينۋت ايىپ ۋاقىتىمەن جازالاندى. ال «سيبير» حوككەيشىلەرىندە بۇل كورسەتكىش 15 مينۋتتى قۇرادى.
سوڭعى ءۇش ويىندا قاتارىنان جەڭىلگەن ەلوردالىق كوماندانىڭ تۋرنير كەستەسىندەگى جاعدايى ناشارلاپ كەتتى. ياعني, شىعىس كونفەرەنتسياسىندا ءبىر ساتى تومەن سىرعىپ, 7-ورىنعا تابان تىرەدى. قازاقستاندىق كوماندا كەلەسى ويىندى 15 جانە 16 اقپان كۇندەرى سىرت ايدىندا حاباروۆسكىنىڭ «امۋرىنا» قارسى وتكىزەدى.
قحل-دىڭ تۇراقتى چەمپيوناتىندا «بارىستىڭ» 5 ويىنى قالدى. ەگەر سول تارتىستاردان قاجەتتى ۇپاي جيناي الماسا, بيىلعى ماۋسىمدا پلەي-وفف ساتىسىنان تىس قالۋى دا ابدەن مۇمكىن.
ەلامان قوڭىر.
دەرەك: egemen.kz.
سۋرەت: hcsibir.ru.