ششۋچە قالاسىندا مادەنيەت جانە سپورت مينيسترلىگىنىڭ ۇيىمداستىرۋىمەن پرەزيدەنتتىك سىناقتاردى وتكىزۋ جونىندە سەمينار-كەڭەس ءوتتى.
وعان ەلىمىزدىڭ بارلىق وبلىستارىنىڭ سپورت جانە دەنەشىنىقتىرۋ ىستەرى باسقارمالارىنىڭ وكىلدەرى, جەرگىلىكتى جەردە پرەزيدەنتتىك سىناقتى وتكىزۋگە جاۋاپتى قىزمەتكەرلەر قاتىستى.
جيىندا پرەزيدەنتتىك تەستتى تاپسىرۋ, وعان دايىندىق ءماسەلەلەرى تالقىلاندى. وندا الدىمەن مينيسترلىكتىڭ سپورت ىستەرى كوميتەتىنىڭ توراعاسى ەلسيار قاناعاتوۆ ەلىمىزدە 1996 جىلدان باستاۋ العان بۇقارالىق سپورت ءتۇرىنىڭ ماقساتى مەن مىندەتىن, ونى حالىق اراسىندا كەڭىنەن ناسيحاتتاۋ كەرەكتىگىن, وسىنىڭ ءوزى ادامنىڭ بويىنا سالاماتتى ءومىر سالتىن قالىپتاستىرۋعا سەپتىگىن تيگىزەتىنىن اتاپ ءوتتى.
– پرەزيدەنتتىك تەستىلەردىڭ ماقساتى – بالالاردى, وقۋشىلاردى جانە ەرەسەك تۇرعىنداردى دەنەشىنىقتىرۋمەن جانە سپورتپەن جۇيەلى تۇردە اينالىسۋعا تارتۋ, ولاردىڭ ءوز دەنساۋلىعى جانە ءومىردىڭ ءارتۇرلى ساتىلارىندا شىنىعۋعا دايىندىق دەڭگەيىن انىقتاۋعا دەگەن سۇرانىسىن قاناعاتتاندىرۋ, سالاماتتى ءومىر سالتىن ناسيحاتتاۋ. ال ونىڭ نەگىزگى مىندەتتەرى دەنەشىنىقتىرۋدىڭ جاي-كۇيىن باعالاۋ جانە دەنەشىنىقتىرۋ جاتتىعۋلارى ارقىلى حالىقتى ساۋىقتىرۋ, جاستاردى وقۋعا, ەڭبەك قىزمەتىنە, اسكەري قىزمەتكە دايىنداۋ, – دەدى ە.قاناعاتوۆ.
ونىڭ ايتۋىنشا, قازىرگى كەزدە پرەزيدەنتتىك سىناقتاردى وتكىزۋگە بارىنشا كوڭىل ءبولىنىپ جاتىر. مىسالى, بىلتىر ەلىمىزدە العاش رەت جازعى سپورت تۇرلەرىنەن مەملەكەتتىك قىزمەتكەرلەر اراسىندا تەستىلەر وتسە, بيىل اقپاندا قىسقى سپورت تۇرلەرىنەن سىناقتار وتكىزىلدى. دەگەنمەن, ول حالىق اراسىندا وسىناۋ شارانى ۇيىمداستىرۋعا بۇرىنعى كەڭەس وداعى كەزىندەگىدەي قارقىننىڭ بولماي جاتقانىن دا جاسىرمادى. ونىڭ سەبەبى, جەرگىلىكتى جەردە بۇقارالىق سپورتتى دامىتۋعا جاسالىپ جاتقان جاعداي كوڭىل كونشىتەرلىك ەمەس. ماسەلەن, ءۇلكەن قالالاردىڭ وزىندە اۋلالاردا سپورت الاڭقايلارى تىپتەن از بولسا, كەيبىر جەردە حالىقتىڭ سپورتپەن اينالىسۋىنا جاعداي جاسالماعان. وسى جەردە ول شىعىس قازاقستان وبلىسىندا جەرگىلىكتى جەردە سپورتتى دامىتۋعا جاۋاپتى مەكەمەلەردىڭ ءبىرى – اۋداندىق سپورت باسقارمالارىنىڭ جابىلىپ قالعانىنا نازار اۋدارتتى. «قازىر ەلىمىزدە ۇلكەن سپورت سارايلارى, كەشەندەرى سالىنىپ جاتىر. وسىنىڭ ءبارى, ارينە, بولاشاق ءۇشىن جاسالىپ جاتقان ىستەر. الايدا, حالىقتىڭ كوبى ولارعا بارا بەرمەيدى. كەز كەلگەن ادامعا ءوز اۋلاسىندا قاراپايىم سپورت الاڭى بولسا, سول ءتيىمدى. ءبىز جاڭادان قولعا الىپ, دامىتۋدى ماقسات ەتىپ وتىرعان پرەزيدەنتتىك سىناقتارعا كىشكەنتاي كەزىنەن باستاپ وسىنداي الاڭداردا شىڭدالىپ, وسكەن ادامدار عانا لايىقتى ناتيجە كورسەتە الادى», دەدى ول.
سونىمەن بىرگە, ول بولاشاقتا پرەزيدەنتتىك سىناقتاردى «قازاقستان بارىسى» سياقتى ۇلكەن جوباعا اينالدىرىپ, حالىق اراسىندا كەڭىنەن ناسيحاتتاۋعا جۇمىس ىستەۋ كەرەكتىگىن ايتتى. «ەلىمىزدە وسىنداي جوبالار كوپ بولسا, حالىقتىڭ بۇقارالىق سپورتپەن اينالىسۋى ارتادى», دەدى ە.قاناعاتوۆ.
سەمينار-كەڭەستە وسى ماسەلە بويىنشا قازاقستان رەسپۋبليكاسى تۇڭعىش پرەزيدەنتىنىڭ سىناقتارىن وتكىزۋ جانە ونىڭ ەرەجەلەرىن قابىلداۋ جونىندەگى جۇمىس توبىنىڭ وكىلى الەكسەي بەرەجنوي بايانداما جاسادى. ول مينيسترلىكتىڭ پرەزيدەنتتىك تەستىلەر بويىنشا سىناقتاردى وتكىزۋدىڭ ءتارتىبى مەن شارتتارى تۋرالى قابىلداعان بۇيرىقتىڭ ءمانى مەن ماڭىزىن, الداعى كەزدە وسىناۋ بۇقارالىق شارانى دامىتۋ ماقساتىندا ۇيىمداستىرىلاتىن جۇمىستار جونىندە ايتىپ بەردى. وسى رەتتە ول مينيسترلىك ەرلەر جانە ايەلدەر اراسىندا الدىمەن اۋداندىق, وبلىستىق, سودان كەيىن رەسپۋبليكالىق چەمپيوناتتى وتكىزۋدى جوسپارلاپ وتىرعانىن ايتتى. «بۇل جارىستار ءتورت كەزەڭ بويىنشا وتكىزىلەدى. وبلىستىق سىنداردان سۇرىنبەي وتكەندەر قازاقستان چەمپيوناتىندا جاس شاماسىنا قاراي باق سىناسادى. وندا ءبىر كوماندادا سەگىز ادام بولادى. ولار سپورتتىڭ ءار تۇرىنەن جارىسادى», دەدى ول.
وسىعان بايلانىستى ا.بەرەجنوي جەرگىلىكتى جەردە سپورت الاڭدارى مەن قۇرالدارىنىڭ جەتىسپەي جاتقانىن دا جاسىرمادى. ماسەلەن, پنەۆماتيكالىق مىلتىقپەن اتۋدان, سۋعا جۇزۋدەن جارىستار وتكىزۋ الاڭداتارلىق جاعدايدا ەكەن. بۇرىن كەڭەس وداعى كەزىندە مىلتىقپەن اتۋدان جارىستار كوپ وتەتىن بولسا, قازىر ولاردى وتكىزۋگە ەكىنىڭ ءبىرىنىڭ شاماسى كەلمەيدى. ال باسسەيندەر كوپ جەردە جوق.
جيىندا ە.قاناعاتوۆ ءارىپتەسىنىڭ پىكىرىمەن كەلىسەتىنىن, وسى ماسەلەنى شەشۋ ءۇشىن ەلىمىزدە «100 مەكتەپ, 100 اۋرۋحانا» سياقتى بولاشاقتا مەملەكەتتىك دەڭگەيدە «100 سپورت الاڭى, 100 ستاديون» باعدارلاماسىنىڭ جاسالۋى قاجەت دەگەن ويىن ءبىلدىردى. ا.بەرەجنويدىڭ ايتۋىنشا, وسىنداي مەملەكەتتىك ماڭىزدى جۇمىستار ىستەلگەن جاعدايدا عانا پرەزيدەنتتىك سىناقتاردى لايىقتى وتكىزۋگە بولادى. الايدا, ول بۇقارالىق شارانىڭ جىل سايىن قاناتىن كەڭەيتىپ, دامىپ جاتقانىن, وعان مىسال رەتىندە جازعى جانە قىسقى سپورت تۇرلەرىنەن مەملەكەتتىك قىزمەتكەرلەر اراسىندا جارىستاردىڭ قىزىقتى جانە تارتىستى ءوتىپ جاتقانىن اتاپ ءوتتى. سەمينار-كەڭەستە وسى ماسەلە تۋرالى پرەزيدەنتتىك تەستتەردى وتكىزۋگە جاۋاپتى مەملەكەتتىك جاتتىقتىرۋشى مادەنيەت جاقىپوۆ تا ايتتى. ول بۇرىن مينيسترلىك ادامداردى جارىسقا شاقىراتىن بولسا, قازىر حالىقتىڭ ءوزى سۇرانىپ, پرەزيدەنتتىك سىناقتارعا قاتىسۋعا نيەت ءبىلدىرىپ جاتقانىن جەتكىزدى. سونىمەن بىرگە, ول قازاقستان چەمپيوناتىن شىمكەنت قالاسىندا وتكىزۋ جوسپارلانىپ وتىرعانىن, وعان ءار وبلىستان جۇزدەن جۇيرىك, مىڭنان تۇلپارلار عانا قاتىساتىنىن ەسكەرتتى.
پرەزيدەنتتىك تەستىلەر تۋرالى ايتاتىن تاعى ءبىر نارسە, ول الدىمەن جالپى ءبىلىم بەرۋ مەكتەپتەرىندە, كاسىبي-تەحنيكالىق مەكتەپتەردە, كوللەدجدەردە, ليتسەيلەردە, جوعارى وقۋ ورىندارىندا وقۋدان تىس ۋاقىتتا وتكىزىلەدى. جاستار مەن ەرەسەك تۇرعىندار ءۇشىن – دەنەشىنىقتىرۋ جانە ساۋىقتىرۋ باعىتىنداعى جارىستار دا وتەدى. پرەزيدەنتتىك تەستىلەر نورماتيۆتەرىن تاپسىرۋعا دارىگەردىڭ رۇقساتى بار, سپورتپەن ءوز بەتىنشە نەمەسە ۇيىمداسقان تۇردە اينالىساتىن بارلىق ىنتالىلار جىبەرىلەدى.
پرەزيدەنتتىك تەستىلەر نورماتيۆتەرىن ورىنداۋعا دايىندىق وقۋشىلار مەن ستۋدەنتتەر ءۇشىن وقۋ ورىندارىندا وقۋ ساباقتارى جانە وقۋدان تىس دەنەشىنىقتىرۋ-ساۋىقتىرۋ جانە سپورتتىق جۇمىس بارىسىندا, جۇمىس ىستەيتىن جاستار ءۇشىن – سپورتتىق سەكتسيالاردا, جالپى شىنىعۋعا دايىندىق توپتارىندا جانە ءوز بەتىنشە جۇزەگە اسىرىلادى.
داستان كەنجالين,
«ەگەمەن قازاقستان».
اقمولا وبلىسى.
ششۋچە قالاسى.